Read Angguruk Yali MATIUS 25 Bible Online

MATIUS 25 - Angguruk Yali bible

MATIUS 25

¹Yesusen wene eke indit toho hiyag isaruk lit, ”Allah ap obog toho Inikni arik waruhuwon fahet hiyap numen fam wirim toho hiyag hisamin. Hiyap numen itano nenehe onggoma wam esetug waharukmu olohotma lul ulug iniral hindali ahaluwe walug laruk latusa.

²Fuwaben itano enepeleg toho weregma fuwaben onoluk toho welatusa.

³Enepeleg toho welatuson itano hindali ahaluwe tor angge kubag fam pilaboho warusa.

⁴Onoluk toho welatuson itanowen hindali ahaluwe su roho kubag fam kilaboho warusa.

⁵Keman yet teg lit weregman ap ino folo waharuk latisi fugmu noho inilen it obog toho nohoruk latusa.

⁶Nohorukmen hup humanoho atisimu ap eneleyen elel eneptuk lit, ’Hun ino waharuken ketiya olohotma lalihiben in amek’ uruk latusa.

⁷Uruk latusama hiyap itano in atusareg enehindali ahaluwe kubag fam waruson arimano wal taneg hundutuk latusa.

⁸Hundutuk lit hiyap enepeleg toho welatuson itanowen onoluk toho welatuson itano fam, ’Niniral war aruhu rohon hindali ahaluwe hiren wehebon tot og nesemek,’ ulug heng urusa.

⁹Heng urusama onoluk toho welatuson itanowen, ’A, og husulmu hiret niret hindali ahaluwe eleg arik ohoreg. Hit fahet oho ayeg waroho hilag lalihip,’ urusa.

¹⁰Ari urusama wak larukmu hun ino waharisimu hiyap hindali ahaluwe ininggikmu werehon itano men ambiyeg mangno atusareg wam esetuk ambeg ino sok laroho kurusa.

¹¹Sok laroho kurusareg weregma hiyap winon itano waharusareg, ’Ninikni, sok hut nenebin, nir oho kik wamuk ohon,’ uruk latusa.

¹²Uruk latusama ap inowen, ’A, hit tem toho napeleg, hisarikik fug,’ irisi,” ulug Yesusen indit toho hiyag isibag.

¹³Indit toho hiyag isibareg, ”Allah waruhu sul men waruhu sali men henepelehen hinindimu honoluk toho yet teg lit welamuhup,” ulug pikit toho hiyag isibag.

¹⁴”Allah ap obog toho Inikni aruhuwon ino ap eke nibam embeselug yatma lamin perisiyon fam wirim timin. Ap inowen amingmingangge wol eneptisireg anden angge aruma foroho lamuhup ulug hiyag isarisi.

¹⁵Hiyag isaruk lit namingmingangge misig tu fano roho foroho lam teg perisireg uang inggila fuwaben og itisi. Og itisireg namloho eke tu tot fano roho foroho lam teg perisireg uang inggila piren og itisi. Og itisireg namloho hinahanehon aru re fano roho foroho lam fug teg ulug uang inggila misig og itisi. Og isalug yatma larisi.

¹⁶Yatma larisimu amingmingangge fuwaben og itisiyon inowen uang ino ap og isaruk lit ayeg wat heheg waruk lit weregman sebe roho numen atisi.

¹⁷Numen atisimu amingmingangge eke uang inggila piren og itisiyon inowen oho piren og itisi angge famen hinahanehon men uhanehon men sebe roho warisi.

¹⁸Warisimu amingmingangge hinahanehon misig og itisiyon inowen uang inggila misig ikniyen og itisiyon ino kinang habuloho sale feserisireg welatisi.

¹⁹Sale feserisimu anunu roho welatusama ap itano inikni ibam waharisireg, ’Anden angge winag hulen maniyek,’ ulug amingmingangge wol eneptisi.

²⁰Wol eneptisimu waharusareg uang fuwaben og itisiyon ino waharisireg uang numen itano og itisireg, ’Nikni, fuwaben og nitikin angge famen nin fuwaben ayeg waroho warikikteg mangno roho numen foroho lahi,’ ulug ikni og itisimu

²¹ikni inowen, ’Namloho, hasukun fano reg lit anden angge fano foroho latikin. Tor angge famen fano roho foroho latikinmu anggolo roho oho foroho laruhunen hiyag huruhuk. Nibam aruma kulug hahiyeg toho welamin,’ irisi.

²²Ari irisimu uang piren og itisiyon ino waharisireg, ’Nikni, piren og nitikin angge famen ayeg waroho piren sebe roho warikikteg mangno roho uhan foroho lahi,’ ulug og itisi.

²³Og itisimu ikniyen, ’Namloho, hasukun fano reg lit tor angge famen fano roho foroho latikinmu anggolo roho oho foroho laruhunen hiyag huruhuk. Nibam aruma kulug hahiyeg toho welamin,’ ulug hiyag itisi.

²⁴Ari ulug hiyag itisimu misig og itisiyon ino waharisireg, ’Nikni, hat holok hahun angge re yatikin fuhon yahal taruk lahen, emberikin fuhon hilaruk lahen ane ari an noluk.

²⁵An hat nakolen te uang misig og nitikinon ino kinang habuloho sale ferikikteg welatikik. Haren angge tu wereg, hilamihin,’ irisi.

²⁶Irisimu ikni inowen, ’Hasukun siyag hahun hat siyag. Yatikik fuhon yahal taruk lahi ane fahet, emberikik fuhon hilaruk lahi ane fahet holuk teg lahen angge re

²⁷uang anden tohon og hitikikon ap winon og eselen. Ap og eselenma walereg anden og hitikikoner angge ayeg waroho welenoner angge wele angge famen eleg,’ irisi.

²⁸Ari irisireg amingmingangge winon fam, ’Uang misig ino taluk tilihipteg numen forohowon ino og emek,’ irisi.

²⁹’At mun angge man angge forohowon ino sebe roho og uruhu. At anggengge elehon ino we tot werehon ino taluk tahu,’ irisi.

³⁰’Namloho siyahon aru hik tegma eneyeg kilit matuk lit uba yatuk ambeg hik esemek,’ irisi,” ulug Yesusen hiyag isibag.

³¹Yesusen eke hiyag isaruk lit, ”At ap kinangmon atfahon inowen malaikat obog toho hondog enebuhureg enebe umbagpag toho wamuhupteg lehoma umbagpag turuk ambeg hur aruhu.

³²Hur aruhumu ap obog toho At alukema palu arik wamuhup. Palu arik wamuhupmu wam foroho ahunen domba hunon men heyon men minggir eneptuk hag toho[7] Aren ap arimano minggir enebuhu.

³³Minggir enebuhureg heyon inggik pikit fil umbuhureg hunon inggik hare fil umbuhu.

³⁴Umbuhureg ap suwon inowen inggik pikit fil werehon unubam ele uruk lit, ’Nori, hit An Nikniyen hi heneptisiyon maniyek, pohol kinang wal tibag sambil hit fahet o wit henepfahon ari hit ngi atihiben kik maniyek.

³⁵An suburu obok harikikmu hiren og nitikip, ik obok harikikmu hiren hinang nitikip. An pohon hag toho waharikikmu hiren o hiyag nitikip.

³⁶An sum eleg angge welatikikmu hiren sum og nitikip. An uk warukmu hiren pen niya waharikip. An ninggik hele waroho weregma hiren pen niyaruk latikip.’ Inggik pikit fil werehon unubam ari ulug hiyag isahu.

³⁷Hiyag isahumu it ap fanowon arimanowen, ’Nonowe, nosambil suburu obok toho weregma hiyarukukteg og hutukuk? Nosambil ik obok toho weregma hiyarukukteg hinang hutukuk?

³⁸Nosambil pohon hag toho waharukmu hiyarukukteg o hiyag hutukuk? Nosambil sum eleg angge weregma hiyarukukteg sum og hutukuk?

³⁹Nosambil ouk warukmu hinggik hele waroho weregma yet hiyarukukteg pen hiyaruk latukuk?’ ari ulug kapal hahup.

⁴⁰Kapal hahupmu ap suwon inowen te, ’An not siyahon misig tuma werehon fam fano ane turuk latikip ane ari An nubam turuk latikip. Ari we tem toho hiyag hisihi,’ ulug hiyag isahu.

⁴¹Ari ulug hiyag isahureg inggik hare fil werehon unubam te, ’Hit siyag ane turuk latikibon te An wereg ambeg tuma fug, aliyek. Iblis otsi men yal enebul ulug indok humon war atuk elehon munggaltusa ambeg aliyek.

⁴²An suburu obok harikikmu hiren og nitikip fug. Ik obok harikikmu hiren hinang nitikip fug.

⁴³An pohon hag toho waharikikmu o hiyag nitikip fug. Sum eleg angge welatikikmu sum og nitikip fug. An ouk warukmu ninggik hele waroho weregma pen niyarikip fug,’ ulug inggik hare fil werehon unubam ari ulug hiyag isahu.

⁴⁴Hiyag isahumu iren oho At ubam enele uruk lit, ’Nonowe, nosambil suburu men ik men obok harikinmu og hutukuk fug? Nosambil Hat pohon hag toho waharukmu, sum eleg angge weregma hiyarukukteg let haptukuk fug? Nosambil ouk warukmu hinggik hele waroho weregma yet hiyarukukteg pen hiya larukuk fug?’ ulug kapal hahup.

⁴⁵Ari ulug kapal hahupmu Aren te, ’An not siyahon misig tuma werehon fam fano ane tuk fug angge embeserikibon An numbaharuk latikip. Ari we tem toho hiyag hisihi,’ ulug hiyag isahu.

⁴⁶It ari turuk latuson arimano mondabi siyagma kuhup, it fanowon arimano Allah men mondabi onoluk welamuhup,” ulug Yesusen otsi hiyag isibag.