Read Angguruk Yali MATIUS 26 Bible Online

MATIUS 26 - Angguruk Yali bible

MATIUS 26

¹Yesusen wene arimano hiyag isibareg otsi fam ele uruk lit,

²”Suburu roti sig elehon nahup sambil Paskah ino o ha welamuhukon ari hit honoluk. At ap atik ibahon ino e fam teloho ware fesuhuben ap ininggikmu aruhu,” ulug hiyag isibag.

³O ino sambil imam usa inap onowesi men Yahudi inap onowesi men imam onowe suwon unuk Kayafas ino ibam palu ribag.

⁴Palu ribareg nungge fam Yesus ino alem ubam embelug senebuhukteg ware fesuhuk ulug enele sahaltuk lit,

⁵”Roti sig elehon nahuk sambil ino fug, ino sul ap anggolo wereg angge re enele anggolo uk nowen,” uruk latfag.

⁶Yesus ino o Betania Simon yowilangge reg latfag ahun ino ibam kibareg weregma

⁷hiyap misig ahaluwe amben mondabi fanowon kubag fam hinanggoho walug kibag. Walug kibareg Yesus suburu naruk lit heriyegma ik ahaluwe ino Yesus unggulmu hilili fibag.

⁸Hilili ferukmu Yesus otsiyen yet hibareg, ”Nungge fahet ik ahaluwe amben fanowon ari saplangge hililtuk?

⁹Ahaluwe amben fanowon ari fam uang teng-teng angge ayeg waroho walug ap enengge elehon og isawon famen turuk,” uruk latfag.

¹⁰Iren uruk latfag ane ari Yesusen oluk atfareg Yesusen, ”Hiyap tuwen tehek ane nubam fano ane tehek angge famen nungge fahet hiren at indi angginap turuk lahep?

¹¹Ap enengge eleg inap likiya hupmu hit men welamuhup angge famen An hit men likiya hupmu noluk welamuhuk fug.

¹²Ahaluwe amben fanowon nebene hilil nabehekon ariyen nebe warehon owikmu kilap nabuk ohoma nubam tuhu ane roho tehek.

¹³Mun ibam man ibam Allah wene hiyag isaruk lit at tuwen tehek ane fahet hiyag isaruk lamuhup. Hiyag isarukmu aren tehek ane aru fahet wenggel haruk lamuhup. Ari tem toho hiyag hisaruk lahi,” ibag.

¹⁴Yesus otsi nisanggowen itano misig unuk Yudas Iskariot ino imam usa inap onowesi enembeg libag.

¹⁵Libareg hiyag isaruk lit, ”Ketiya At ino senetihip ulug huruwe henembeg waruhukmu hiren an onggo nungge og numuhup,” ulug kapal isibagma iren uang inggila teng misig nubam hilag hinahan 30 og itfag.

¹⁶Og itfagma Yesus hirahoma lahumu huruwe lahuk ulug indimu wenggel haruk latfag.

¹⁷Suburu roti sig elehon naruk ane ak tibag sul Yesus otsiyen At ubam enele uruk lit, ”Nonowe, wam domba Paskah o keman eserik lalusama nul peruk lahen?” ulug kapal hibag.

¹⁸Kapal hibagma Yesusen, ”O pumbukmu lalihipteg ap misig welatnisiyon fam, ’Nonoweyen te An nubam am teg ane horog atuken hat hibamen An notsi men wam esetihipmu nul ehek,’ ilihip,” ibag.

¹⁹Ari ibagma otsi itano libareg Onoweyen ibag ane roho wam domba Paskah ino osoko tug turuk latfag.

²⁰Hup atfagma Yesus otsi nisanggowen itano men o ino kibareg heriyeg lit esetfag angge arimano naruk latfag.

²¹Suburu naruk lit itano Aren te, ”Hit aruma welahebon misihen An nuwabukag ulug huruwe lamin peruk lit wereg. Ari tem toho uruk lahi,” ibag.

²²Ari ibagma otsi inindi su atfareg it enele uruk lit, ”Nowe, an fahet ehen ano,” ulug it enebe wal tanehen Yesus kapal haruk latfag.

²³Kapal haruk latfagma Yesusen, ”Kubag misig fam nininggik ambiyeg kila felug naruk laheyon misihen fahet ihi, aren An fahet huruwe lahu,” ibag.

²⁴”At ap kinangmon atfahon ino fahet atam haharoho imbibahon hikit toho At war aruhu. War aruhu angge famen ap huruwe lahu ahun ino eneg indi anggin amag, at ino isingan endetep fugmu fano,” ibag.

²⁵Ari ibagma huruwe lamin pibag ahun Yudas inowen, ”Nowe, an fahet ehen ano,” ibagma Yesusen, ”Hinggarehen ehen,” ibag.

²⁶Yesusen ari ibareg it suburu narukmu suburu roti wibareg seneg lit sembahyang ibareg kut-kut otsi og isaruk lit, ”Wemek, amiyek, An nebe tu og hisaruk lahi,” ibag.

²⁷Ari ibareg ik anggur ahaluwe kubag fam hinanggoho werehon lisoho wibareg sembahyang ibareg it og isaruk lit, ”Kubag aru fam werehon hit obog toho nalihip.

²⁸An namep aru ap anggolowen siyag ane turukon eleg amag ulug wilip aruhu. Wilip aruhumu Allahn fanowap henebuhuk ibag ane tem toho ibag peruk lamuhup,” ibag.

²⁹”Yoho famen hit men An men ahaluwe aru ambiyeg nahuk fug. We Allah weregma wereg lit eneg hit men ahaluwe keron nahuk, ari ihiyon tem toho hiyag hisihi,” ibag.

³⁰Allah sini yunggulfareg Yesus otsi men Zaitun punumu lahibag.

³¹Kema laruk lit Yesusen, ”Yoho hup An fahet hit obog tohowen hinindi nonghong ik ohoreg. Allahn ele uruk lit, ’Wam domba inikni ino ware fesuhukmu ambohom arimano linggik-longgo uhup,’ ulug haharoho imbibahon hikit toho tilihip.

³²Ari tuhup angge famen noluk aruhukteg hit uwanma An tam o Galilea lahukteg welaruhuk,” ibag.

³³Ari ibagma Petrus inowen, ”It obog toho aruma Hat fahet inindi nonghong imisi angge famen anden eneg nindi nonghong imisi fug,” ibag.

³⁴Ari ibagma Yesusen, ”Yoho hubanggo suwe ayam ele uk fugmu haren An nubahet hinahanam hun ari an tem toho napeleg ulug awiya wamihin,” ibag.

³⁵Ari ibagma Petrusen te, ”Haret andet pinggi nunusul ulug turukmu anden Hat fahet hun ari napeleg ulug awiya wele fug,” ibagma ori winonen oho ambi ane ibag.

³⁶Enele ari il-il Yesus otsi men silimu misig unuk Getsemani libag. Libareg otsi unubam ele hiyag isaruk lit, ”An sembahyang lindima ik laminen hit tiya heriyeg lamok,” ibag.

³⁷Ari ibareg Petrus men Zebedeus umalikisi piren men ambiyeg lul ulug hondog eneplug libag. Libareg Yesus indi anggin hibareg akol peruk lit

³⁸otsi fam te, ”War arik oho lit hag toho nindi anggin haruk lahireg hit tuma wereg lit hinil wirik toho welamek,” ibag.

³⁹Ari ibareg horog tot libareg kinangma hur atfareg sembahyang uruk lit, ”Nikni Allah, ik kubag aben og numuson ari namin fuhen Haren helelenma fano pihi angge famen Anden perukon famen fug, we Haren perukon famen timihin,” ibag.

⁴⁰Ari ibareg otsi wereg ambeg ari suhuloho waharukmen it nohoruk latfag. Nohoruk latfagma Petrus fam te, ”We tor oho An men hinil wirik toho welahep ha fug teg?

⁴¹Siyahonen hinindi ninap heneptuken hinil wirik toho wereg lit sembahyang uruk lamek. Hinindimu tehe ha reg peruk lahep angge famen hininggiken tuk fug teg lahep,” ibag.

⁴²Ari ibareg pireneg angge sembahyang imin ulug libareg, ”Nikni, ik kubag aben og numuson Haren hilag wam fug teg lahen halug naminmu Haren peruk lahen ane teko lamisi,” ibag.

⁴³Ari ibareg suhuloho otsi enembeg waharukmu otsi noho inilen nohorukmu isa watfag.

⁴⁴Isa watfareg nin hinahaneg angge sembahyang ik libareg ambi ane ino ik libag.

⁴⁵Ari ik libareg otsi enembeg watfareg it unubam hiyag isaruk lit, ”Hit nohoruk lit kel taruk lahep. Ketiya At ap kinangmon atfahon ino ap siyag ane turuk inap ininggikmu atmisiyen yet hemek.

⁴⁶Huruwe lahayon ino horogma tuma waharuken luk ohon in amek,” ibag.

⁴⁷Yesusen otsi unubam ele irikim itano otsi nisanggowen itano misig unuk Yudas inowen ap karohet firet seneg inap anggolo il oko hondog eneplug waharuk latfag. It waharuk latfahon arimano imam usa ane onoluk inap onowesi men Yahudi inap iniknisi menen mon enepfagma hondog eneplug waharuk latfag.

⁴⁸Huruwe libag ahun inowen ap arimano fam tam hiyag isaruk lit, ”Anden mako pug toho hi riminon ino hiren senetihip,” ulug tam hiyag isibag.

⁴⁹Waharuk lit itano Yesus iraham libareg Nowe uruk lit mako pug toho hi ruruk latfag.

⁵⁰Hi rurukmu Yesusen te, ”Ap o nare, nungge ane timin ulug wahen,” ibag. Ari urukmu itano ap arimano watfareg Yesus ki ribag.

⁵¹Yesus ki rurukmu itano ap Yesus men welatfahon itano misihen karog lisoho wibareg imam onowe suwon amingmingangge misig karog fam kong turuk lahi ulug turukmen isanggo eneg sanog tibisibag.

⁵²Isanggo sanog tibisibagma Yesusen te, ”Karog ari ei elma kilabe fisin,” ibareg, ”Ap san karog senetuk halug at ino karog fam siyag aruhu,” ibag.

⁵³”An nikni fam heng telema malaikat asan nisanggowen An let nabukag ulug Nikniyen mon eneplebon hat hapeleg?

⁵⁴Malaikaren let naplepma ari roho tuhup ulug atam haharoho imbibag ane nangginoho hikir alep?” ibag.

⁵⁵Ari ibareg ap anggolo arimano fam, ”Hiren ap unusuruk ahun pehepteg karohet firet walug wahepteg sen nabul ulug wahep? Likiya hupmu Allah ibam heriyeg lit hiyag isaruk latikik angge famen sen naptikip fug.

⁵⁶Hiren turuk lahebon aru atam wene hiyag isaruk latfag inaben haharoho imbibahon hikir amag ulug turuk lahep,” ibag. Ari urukmu itano otsi arimano obog toho At embeselug linggik-longgo ibag.

⁵⁷Yesus senetfareg hondoholug imam onowe suwon Kayafas ambeg Musa wene onoluk inap men Yahudi inap iniknisi men palu roho weregma walug libag.

⁵⁸Walug larukmu Petrus ino onombolim mug eneplug imam onowe suwon ibam horogma libareg owahalma libareg nungge ane ulusa ulug imam enemingmingangge arimano men ambiyeg heriyeg latfag.

⁵⁹Imam onowesi men palu roho welatfag inap arimano obog toho menen pinggi ware fusukag ulug un ane ubam lombohap turuk latfag.

⁶⁰Ap anggolowen enele si un ane ubam lombohap tibag angge famen alem suwon ubam umbukon eleg latfag.

⁶¹Eleg latfagma ap piren in atfareg hiyag isaruk lit, ”Allah ibam halog tebesuhukteg nin hup hinahanam wiruhuk ulug hun tuwen irisi,” ibag.

⁶²Ari ulug hiyag isibagma imam onowe suwon in atfareg Yesus fam, ”Ap aruman Hat hubam lombohap haptuk ane fahet Haren hebeloho hiyag isa fug teg lahen?” ibag.

⁶³Ari ibagma Yesus ele eleg angge welatfag. Welatfagma imam onowe suwon inowen ubam ele uruk lit, ”Mesias Allah amloho welahen halug hiyag nisimin. Ari Allah oluk werehon unuk uruk lit heng haptuk lahi,” ibag.

⁶⁴Ari ibagma Yesusen, ”Haren ehen ari. Yoho famen At ap kinangmon atfahon ino Allah suwon inggik pikit fil heriyegma hina poholmon fene wambik waruhumu yet hahup. Aru tem toho hiyag hisaruk lahi,” ibag.

⁶⁵Ari ibagma imam onowe suwon ino indi oloken inggareg asum tararag taruk lit, ”Hun tuwen Allah abug urukmu hit obog tohowen holehep anggeyen nungge fahet alem winon yami ruruk lit ap winon kapal usul?

⁶⁶Hiren nungge peruk lahep?” ibagma it arimanowen, ”At pinggi ware feselihip,” ibag.

⁶⁷Ari ibareg olohotma wasubag sup isaruk lit ininggik holum watuk lit oroholeanggenma ware feseruk latfag. Winonen At watuk lit,

⁶⁸”Hat Mesias angge re ap san huwarehek, hiyag nisimin,” ulug umungguruk latfag.

⁶⁹Iren ari tirikim Petrus owahalma silimu heriyeg lit welatfag. Heriyeg lit weregman ap suwon amingmingangge hiyap angge misig watfareg, ”Har oho Yesus Galilea ahun ino men likiya hupmu ambiyeg welatikip,” ibag.

⁷⁰Ari ibagma Petrusen, ”Hat hindimu wenggel hehenteg ehenon ari an napeleg,” ulug ap obog toho iniline awiya wibag.

⁷¹Awiya wibareg elehet sok horogma libareg weregman amingmingangge winon misihen yet hibareg ap welatfahon arimano hiyag isaruk lit, ”Hun tu Yesus Nazaret ahun ino men ambiyeg welatisi ahun,” ibag.

⁷²Ibagma Petrusen ele ine roho, ”Tik-tem toho ap ino an napeleg,” ulug awiya wibag.

⁷³Tot welatfareg ap welatfahon arimano Petrus ambeg watfareg enele uruk lit, ”Hele famen eneg tehen har oho it men welatikinon,” ibag.

⁷⁴Ari ibagma Petrus inowen lukuram sipuk tibareg awiya waruk lit, ”Hiren hun ari fahet uruk lahebon an we tik tem toho napeleg,” ibag. Ari uruk li itano suwe ayam ele ibag.

⁷⁵Suwe ayam ele ibagma Yesusen te, ”Suwe ayam ele uwan uk fugmu haren hinahanam An fahet awiya wamihin,” ulug hiyag itfag ane ino Petrus undama oluk atfagma indimu siyag atfagma selma wilip atfareg uba yatuk latfag.