Read Angguruk Yali MATIUS 27 Bible Online

MATIUS 27 - Angguruk Yali bible

MATIUS 27

¹O sakan tirikim itano imam onowesi men Yahudi inap iniknisi menen Yesus pinggi ware fusukag ulug kong tibag.

²Kong tibareg inggik hele pug tibareg hun Pilatus kinang seneg ahun ambeg hondoholug libareg og itfag.

³Og itfagma Yudas huruwe libag ahun inowen Yesus pinggi ware fusukag urukon hol hibareg indi anggin atfag. Indi anggin atfareg uang inggila teng misig nubam hilag hinahan 30 og itfahon ino uwag oko imam onowesi men Yahudi inap iniknisi men enembeg imbisik libag.

⁴Imbisik laruk lit, ”Ap siyag ane turuk elehon famen amep hinang tawag ulug henembeg huruwe waharikik ari an siyag,” ibag. Ari ibagma ap arimanowen, ”Niren nungge ane hiyag numusa ulug wahen? Hinggarehen hal tamihin,” ibag.

⁵Ari ibagma Yudasen uang ino Allah ibam hik-hak isalug wilip atfareg hele anggolopma ililoho inggarehen wat taruk tibag.

⁶Wat taruk tibagma imam usa ane onoluk inap arimanowen uang hik isibahon ino palu ribareg, ”Uang ap mep faheron kubag Allah fahet kilaptukon fam kilabuk fug teg,”

⁷ulug enele sahaltuk latfareg ap pohon war atukmu sal eneptuk ambeg fahet kinang misig unuk Kinang Laltuk Ahun onggo palfag.

⁸Onggo palfag angginang ino ketiya oho aben te unuk Mep Kinang uruk.

⁹Alem tibag ane ari hun Yeremia Allah wene atam hiyag isaruk latfahon inowen haharoho imbibahon hikit toho tibag. Haharoho imbibag ane aru, ”Uang inggila teng misig nubam hilag hinahan arimano ap ayeg watukon uang ari roho waruk lamuhup ulug atam kong tibahon hikit toho hilarusa.

¹⁰Hilarusareg uang ino kinang laltuk ahun fam kinang onggo paltusa. Ari roho tuhup ulug Allahn hiyag nitisi,” ulug Yeremia inowen haharoho imbibag.

¹¹Yesus ino hun Pilatus kinang seneg ahun ambeg walug libagma hun inowen kapal haruk lit, ”Hat Yahudi inap onowe suwon raja welahen ano?” ibagma Yesusen, ”We haren ehen,” ibag.

¹²Ari ibagma imam onowesi men Yahudi inap iniknisi menen alem ubam lombog turukmu Yesus ele uk fug angge welatfag.

¹³Welatfagma Pilatus inowen, ”Alem angginon hubam lombohap turuk ane holtuk lahen fug,” ibagma

¹⁴Yesus ele uk fug angge welatfagma Pilatus ino akol hibag.

¹⁵O Paskah seni suwon esetuk sambil ino mo eke fam mo eke fam ap suwon kinang seneg ahun inowen ap ininggik hele warehon arimano misig-misig tu lol nisimin ulug aben heng turukon lol isaruk latfag.

¹⁶O ino sambil ap misig unuk Barabas unuk eke Yesus at olok ane turukon fahet ap obog tohowen onoluk ahun hele waroho foroho latfag.

¹⁷Yahudi inap arimano palu arik libagma hun Pilatusen te kapal isaruk lit, ”Sa lol hisamin, Barabas unuk eke Yesus ino ano, Yesus unuk Kristus urukon ino ano?” ulug kapal isibag.

¹⁸Kapal isibag ane ari Yahudi inap arimanowen Yesus turuk ane fahet enehummu siyahen walug wahasa ulug Pilatus oluk atfareg kapal isibag.

¹⁹Pilatus ino unggum kong turuk ambeg heriyeg lit weregma uheyen te ap siyag ane turuk eleg ahun ari fahet yoho hup nei og hihi ane fahet nindi anggin ahama haren ap ari fahet alem haluk fug ulug amingmingangge monde fibag.

²⁰Imam onowesi men Yahudi inap iniknisi menen ap anggolo arimano unubam milal eneptuk lit, ”Yesus pinggi ware fesemihinen Barabas lol nisimin iyok,” ulug milal eneptuk latfag.

²¹Milal eneptuk latfagma Pilatus inowen ap anggolo arimano kapal isaruk lit, ”Hit hinindimuwen ap piren ariya sa lol nisamisi peruk lahep,” ulug kapal isibagma iren te, ”Barabas,” uruk latfag.

²²Barabas uruk latfagma hun Pilatus inowen, ”Hiren ari ehepma Yesus unuk eke Kristus aru fam nangginmin,” il larikim it obog tohowen, ”At e fam tele fusukag,” ulug enele hum toho uruk latfag.

²³Ari uruk latfagma, ”Hun aruwen siyag ane nungge tirisimu uruk lahep?” ibagma enele ngi hum uruk lit, ”E fam tele fusukag,” uruk latfag.

²⁴Tele fusukag uruk latfagma Pilatus inowen ap anggolowen ngik ngog turukmu yer isibareg anden nungge tuk fug teg lahi ulug ik wak libareg ap arimano onolohotman inggik umatuk lit, ”Ap aru amep wambimisi ane an te fug, we hiren famen tilihip,” ibag.

²⁵Ari ibagma ap anggolo arimanowen, ”At amep wambimisiyon ari nit men nunumalikisi men nunubam wambimisi,” uruk latfag.

²⁶Ari uruk latfagma, ”Barabas ino lol isaruk lit Yesus e paleg fam watihipteg e fam teltihip,” ulug otsi hiyag isibareg og isibag.

²⁷Pilatus kinang seneg ahun otsi sehen seneg inap arimanowen Yesus hondoholug unggum kong turuk ambeg libareg onori winon anggolo luhaloho maniyek ulug wol enepfagma Yesus walingguruk latfag.

²⁸Walinggoho wereg lit At asum nonggoloho hik isibareg sum huluwon wan tibisibareg

²⁹alog ahele mase roho unggulmu kolog tibisibareg fili paleg misig inggik pikiron fam imbibareg Yesus alukema hur atuk lit, ”Yahudi inap onowe suwon ninikni hi haptuk lahe,” ulug inggaliyap turuk latfag.

³⁰Inggaliyap turuk lit wasubag ebene sup isibareg fili ino lisoho unggul arap toho watuk latfag.

³¹Ari turuk lit inggaliyap tibareg sum huluwon ino nonggole fibareg inggareg asum ino wan tibil laruk lit e fam teltul ulug hondoholug wilip atfag.

³²O inowen wilip atfareg larukmen ap misig unuk Simon Kirene ahun men salkal ibareg at ino inggik lisoho teltuk ahen aru ha rin ulug hiyag itfag.

³³Hiyag itfareg laruk lit sili misig unuk Golgota nit nenele roho ”Ap unggul uwag silimu” ino libag.

³⁴Libareg ik namisi ulug hele anggur ahaluwe men sig turuk angge men mangno roho og itfagma tot nek harukmen sig turuken namin fug ulug imbisibag.

³⁵E fam tele fisibareg asum arimano wal taneg hulul ulug enehangge hik tibag.

³⁶Enehangge hik tibareg welatfareg heriyeg lit At foroho latfag.

³⁷Yahudi inap onowe suwon welahi uruk latisiyon fahet tele fesehe ulug At unggul palimu Yesus Yahudi inap onowe suwon tu ulug haharoho lombog tibibag.

³⁸Yesus tele fisibareg ap hirako unusuruk latfag inap piren oho misihon inggik pikit fil misihon inggik hare fil tele fisibag.

³⁹ La wam turuk latfag inap arimanowen, ”Haren Allah ibam halog tuhukteg o hinahanam wuruhuk irikin angge re Hat Allah amloho welahen halug hinggarehen holukap tamihinteg e tel habeheson ari famen wambik ma,” ulug unum hilik uruk lit At inggaliyap turuk latfag.

⁴⁰

⁴¹Inggaliyap turukmu imam onowesi men Musa wene onoluk inap men Yahudi inap iniknisi arimanowen oho inggaliyap turuk lit,

⁴²”Ap winon fanowap eneptuk latisi angge famen inggareg fanowap ta fug teg. At ino Israel inap onowe suwon wereg halug e fene ari wambik watmisimu niren yet hulteg tem toho pul,” uruk latfag.

⁴³Ari uruk lit, ”An Allah amloho welahi ulug Allah fam indi wenggel haruk latisi angge re Allahn indi reg halug let timisi,” uruk latfag.

⁴⁴Ap piren ap unusuruk latfag inap At men ambiyeg telfahon itanowen oho ambi ane uruk lit inggaliyap turuk latfag.

⁴⁵Inggaliyap turukmu mo anum pulmu weregman famen o mondabi hup atuk hag atfareg mo haya regma itano sakan tibag.

⁴⁶Mo haya regma itano Yesusen ele hi roho uruk lit, ”Eli, Eli, lama sabakhtani?” ibag ane ari nit nenele roho ”Allah, Nikni Allah, nungge fahet An numbahakenteg welahen?” ibag.

⁴⁷Ari irikim ap welatfahon arimano winonen hol hibareg, ”Elia wol turuken holeg lamek,” ibag.

⁴⁸Ari ibareg ap misig folo-folo watfareg usande nuruhum hahon wak libareg hele ahaluwe sihon fam kila fibareg Yesus namisi ulug fili yaron fam hak toho Yesus og itfag.

⁴⁹Og itikim itano ap winonen, ”Imbisin, Elia ino watnisireg At lisoho pilabik watnisiyen niren yet hulen imbisin,” uruk latfag.

⁵⁰Ari urukmu itano Yesus ele hum toho uruk lit sat eleg atfag.

⁵¹Sat eleg atukmu itano Allah ibam kuruk ambeg sok latuk asum ino pul ke pilang tibisibag. Pilang tibisibagma o mek turuk lit tom oho pul ke pilang tibag.

⁵²Ari turuk lit ap sal enepfag ambeg arimano oho sok husoho libareg ap inindi fanowon tam war atfahon arimano onoluk atfareg in atfag.

⁵³Yesus oluk atfag sambil ino it tam war atfahon oho sal enepfag ambehen wilip atfareg Allah ibam Yerusalem pumbukmu kibareg ap anggolo iniline inam atfag.

⁵⁴Sehen seneg inap onowe men otsi men Yesus foroho latfahon arimanowen o mek tibag ane men teko libag ane obog toho yet hibareg, ”Ap tu tem toho Allah amloho war aha,” uruk lit enekol hibag.

⁵⁵Yesus Galilea weregma let turuk lit ambiyeg laruk latfag hiyap arimano eke enebe anggolo roho yatma wereg lit yet haruk latfag.

⁵⁶Yet haruk latfahon arimano enesehelimu Maria Magdala hiyap ino men, Yakobus Yusuf inisinga Maria men, Zebedeus amlohoki inisinga men welatfag.

⁵⁷O hupmu atfagma ap misig anggengge anggolo wereg ahun unuk Yusuf Arimatea ahun Yesus ele oho holtuk latfag ahun ino welatfag.

⁵⁸Welatfareg at ino Pilatus ambeg libareg Yesus ebe wareg angge heng tibagma Pilatusen hilag lamisi ulug otsi hiyag isibag.

⁵⁹Hiyag isibagma Yesus ebe wareg angge e famen pilabe fibareg og itfagma sum yanggowon fanowon fam hililip toho

⁶⁰helep owik ket inggareg fahet habulfag ambeg kila fibag. Kila fibareg owik elma helep humon imbiloho sok lare fibag.

⁶¹Lare felug libagma Maria Magdala hiyap ino men Maria winon eke men owik ino sokole fil heriyeg latfag.

⁶²Likiyamon Allah wene uruk sambil hari Sabat sakan tibagma imam onowesi men Farisi inap men Pilatus ambeg libareg:

⁶³”Nonowe, ele si ane uruk latisi ahun ino oluk wereg lit o hinahaneg angge noluk aruhuk uruk latisi ane nit nonoluk.

⁶⁴Otsi lalusareg At ebe wareg angge hirag talug lalusareg ap winon hiyag isaruk lit, ’Nonowe ap war atuk ambehen oluk aha,’ uhup tohon haren sehen seneg inap mon enepmihinmu owik ino forohoman o hinahanam aruhu. Otsiyen nonowe ap warehon sehelimuwen oluk atisi uhupteg enele si uruk lit tam uruk latusa ane ari tot, fobik enele si uruk lamuhup ane anggolo roho uruk lamuhup,” ulug Pilatus hiyag itfag.

⁶⁵Ari ulug Pilatus hiyag itfagma Pilatusen te, ”Notsi sehen seneg inap tuma werehon hondog eneplug lalihipteg owik ino fano kahaleg latihip,” ibag.

⁶⁶Ari ibagma it sehen seneg inap hondog eneplug owikmu libareg sok ino fam enehangge imbibareg kahaleg latfag.