Read Angguruk Yali MATIUS 28 Bible Online

MATIUS 28 - Angguruk Yali bible

MATIUS 28

¹Sembahyang uruk sambil hari Sabat welatfareg likiyamon sehelet misig atfagma o sakan tirikim Maria Magdala hiyap ino men Maria eke winon men Yesus kilapfag ambeg kim hul ulug laruk latfag.

²Larukmen o mek hum toho turukmen malaikat Ninikni Allahn monde fibagma wambik watfareg helep ino miyaloho imbisik libareg palimu heriyeg latfag.

³Orohole lebeglu hag toho turukmu asum yanggowon ino fene ili faya rurukon wan teg latfag.

⁴Ari turuk latfagma ap kahaleg latfahon arimano enebe elek-elek angge turuk lit enekolen ap warehon hag toho welatfag.

⁵Welatfagma malaikat inowen hiyap itano fam, ”Hit henekol ha fug. Yesus e fam teltuson ino yami rik wahebon ari an noluk.

⁶At ino tuma wereg eleg, atam irisiyon hikit toho oluk ahama At yinggi fik kurusa ambeg kim ha watihip.

⁷Hinilen kim halug folo-folo lalihipteg otsi hiyag isaruk lit, ’Honowe ap war atuk ambehen oluk aha,’ ik lalihip. At tam o Galilea lahareg weregma umunowen At ino hiren yet hahup. Ari tem toho anden hiyag hisaruk lahi,” ibag.

⁸Ari ibagma hiyap itano owik kilapfag ambeg inowen wilip atfareg suhuloho laruk lit enekol hibag angge famen enehiyeg anggolo roho laruk latfag. Folo-folo libareg Yesus otsi hiyag usul ulug larukmen

⁹Yesus it enelukeman unduhuk lit naholani ulug hi enepfag. Hi enepfagma hiyap itano iraham libareg aluke fil hur atfareg uyug ki haruk lit hi ribag.

¹⁰Hi rurukmu Yesusen te, ”Henekol toho welam fug, lalihipteg nori hiyag isaruk lit o Galilea eremunowen eneg An kim niyahuben lahup ehek ulug hiyag isa lalihip,” ulug hiyag isibag.

¹¹Hiyap itano kema larukmu ap owik elma kahaleg latfag inap o Yerusalem libareg imam onowesi fam owik ino famen tibag ane hiyag isibag.

¹²Hiyag isibagma imam onowesi arimanowen Yahudi inap iniknisi men enele sahalfareg sehen seneg inap arimano uang anggolo og isibareg

¹³unubam enele uruk lit, ”Lalihipteg ap hiyag isaruk lit hubanggo nit nohorukmu Yesus otsi arimano wahasareg ebe hirag talug lahasa ulug hiyag isaruk lamuhup.

¹⁴Hiyag isaruk lamuhup ane kinang seneg ahun hinikni inowen holuhureg hit hunubam alem umbuhu rohon niren at ubam nenele uhuk,” ibag.

¹⁵Ari ibagma kahaleg latfag inap arimanowen uang ino hilibareg it unubam komo enepfag ane ino hag toho turuk latfag. Kahaleg latfag inap arimanowen uruk latfag ane ariyen ketiya oho Yahudi inaben, ”Otsiyen Yesus ebe wareg angge hirag ta libag,” uruk.

¹⁶Yesus otsi nanggoloben itano o Galilea punumu Yesusen hiyag isibag ambeg ino lahibag.

¹⁷Lahibareg wereg lit Onowe yet hibareg alukema hur atfareg hi ruruk lit it winonen tem toho waha ano ulug inindi piren-paren uruk lit welatfag.

¹⁸Ari perukmu Yesus it sehelimuwen ele hiyag isaruk lit, ”Poholma kinangma werehon obog toho fahet An palimuwap nabehekteg nineyap nabehek.

¹⁹Ari fahet lalihipteg o pumbuk obog toho An numalikiyap eneptuk lit Ninikni unuk fam, amloho unuk fam, Allah hime fanowon unuk fam ikma pilap eneptuk lamuhup.

²⁰Anden hiyag hisaruk lit komo heneptuk latikik ane obog toho it milal eneptuk lamuhup. An likiya hupmu hit men wereg lit let heneptukmen eneg pohol kinang eleg aruhu. Ari tem toho hunundama honoluk teg lit welamuhup,” ulug hiyag isibag.