Read Angguruk Yali MATIUS 3 Bible Online

MATIUS 3 - Angguruk Yali bible

MATIUS 3

¹Welatfareg Yohanes ap ikma pilap eneptuk latfag ahun ino Yudea farema wereg lit Allah wene hiyag isaruk latfag.

²Hiyag isaruk lit, ”Siyag-siyag ane turuk lahebon ari imbisiyek. Allah ap obog toho Inikni aruhuwon ino horogma waharuk,” ulug hiyag isaruk latfag.

³Yohanes ino fahet Yesayan tam haharoho imbibag. Haharoho imbibag ane tu, ”Wene hiyag isaruk ahun misig farema wereg lit, ’Nonowe suwon waharuk abunggalem hale fiyek, waharuk ke pikit toho yaho fiyek!’ ulug ele hi roho hiyag isaruk,” ulug haharoho imbibag.

⁴Yohanes ino sum wam unta oruk fam ibahon wan teg lit wam sapi ahap ahele nunggulig alunggu ke pug teg lit herenangge men kin altap men naruk latfag.

⁵Ari reg lit weregma o Yerusalem inap obog toho, Yudea kinang fam werehon obog toho, Yordan ikma wereg inap obog toho at ambeg palu roho kuruk latfag.

⁶It arimano obog toho kuruk lit, ”Siyag-siyag ane ari-ari turuk latukuk,” ulug fag turuk latfagma Yohanesen Yordan ikma pilap eneptuk latfag.

⁷Ari turuk lit Farisi inap men Saduki inap men enebe anggolo roho ikma pilap nenepmisi ulug watfahon arimano Yohanesen yer isibag. Yer isibareg it unubam ele hiyag isaruk lit, ”Hit pisanggo umalikisi nori, Allahn olok ane tuhu sambil ino nungge fahet nit tam wilip amuhuk peruk lahep?

⁸Hiren siyag ane turuk lahebon embeseruk lit anggen fanowon yihik feruk lamuhup.

⁹Hit hinindimuwen ninikni Abraham wereg uhuk peruk lamuhup fug. Nori, Abraham fahet Allahn helep aruma fam malik werehap tuk teg. Ari we tem toho hiyag hisaruk lahi.

¹⁰Allahn yaha e murik oho lahi ulug umanggen sam warehek. E anggen fanowon yihik feruk elehon muruhureg indok yale fesuhu.

¹¹Hiren siyag ane turuk lahebon umbusuhuk pehepteg wahepma anden ikma pilap henepmin. At fobik waruhuwon ino an apma weregma At palimu wereg. At suwon waruhuwon inowen, ’Sepatu lole nubahin,’ ulug an siyag teg lahiyon nubam uhu fug. At palimu werehon inowen Allah hime fanowon og hisaruk lit indok fam puhunap henebuhu.

¹²Aben sinali ei indokma wiratug ininggikmu lilibug toho embelug alinglongangge fu isalug anggen naruk hag toho Allahn oho ari hag toho tuhuwon inggikmu wereg. Anggen fanowon umbat talug alinglongangge arimano indok mondabi ambulpul turukon fam yale fesuhu,” ulug hiyag isaruk latfag.

¹³Hiyag isibareg weregman Yesus o Galilea embeselug Yohanesen ikma pilap nabukag ulug Yordan ikma Yohanes wereg ambeg libag.

¹⁴Libagma Yohanesen, ”Hat Nowe suwonen an ikma pilap nabuk teg angge famen an toron nubam ikma pilap napmisi pehenma nirim,” ibag.

¹⁵Ari ibagma Yesusen, ”Nare, ari hag toho uk fug. Niren turuk laheyon ari Allahn tam perukon fam turuk lahe,” ibagma Yesusen ibahon hikit toho Yohanesen At ikma pilapfag.

¹⁶Ikma pilapfagma Yesus ikman laharukmen pohol fo roho Allah hime fanowon suwe yalma hahon At ubam wambik waharukmu yet hibag.

¹⁷Yet hibagma Allah ele poholman uruk lit, ”An namloho At fahet Anden fano peruk lit nindi reg lahiyon tu,” urukmu hol hibag.