Read Angguruk Yali MATIUS 4 Bible Online

MATIUS 4 - Angguruk Yali bible

MATIUS 4

¹Yesus weregman Iblisen wal hawag ulug Allah hime fanowon inowen Yesus anggenma hondoholug libag.

²Hondoholug libagma hup hunduhuk ilingge hunduhuk Yesus suburu na fug angge weregman eneg hup teng misig nubam hilag nuwalen 40 atfagma Yesus suburu obok hibag.

³Suburu obok harukmen wal hamin pibag ahun ino watfareg, ”Hat Allah amloho welahen halug helep werehon aruma suburuwap timihin,” ibag.

⁴Ari ibagma Yesusen te, ”Suburuwen eneg ap fano welam fug teg. Allah ele ambilik fam urukon ariyen oho fano welam teg ulug hahareg lit wereg,” ibag.

⁵Ari ibagma Iblisen Yesus hondoholug Allah ngi reg ambeg o Yerusalem libareg Allah ibam unggama unduhuk fik libag.

⁶Unduhuk fik libareg, ”Hat Allah amloho welahen halug hik toho wambimihin. Hik toho wambimihinmu haharehon hikit toho Allahn malaikat mon enepmisimu malaikat ininggiken aho roho humbahalusama hambilan huwatmisi fug,” ibag.

⁷Ari ibagma Yesusen te, ”Haren Hikni Allah wal hahun fug ulug hahareg lit wereg,” ibag.

⁸Ari ibagma Iblisen Yesus nin tom yaron fam hondoholug lahibareg o pumbuk obog toho men mun angge man angge fano angge kinangma werehon pilap haruk lit hiyag itfag.

⁹Hiyag itfareg, ”Nalukema hur atmihinteg nubam sembahyang imihinmu o pumbuk obog toho werehon irahandima hat ngi aruhunen og hitnin,” ibag.

¹⁰Ari ibagma Yesusen, ”Hikni Allah ubam eneg sembahyang uk teg, Aren eneg mingming habuk teg ulug hahareg lit werehen wilip amin,” ulug pet turuk lit yanggalfag.

¹¹Ari ibagma Iblis ino Yesus embeselug libagma malaikat watfareg Yesus suburu og utuk lit At let turuk lit wereg latfag.

¹²Yohanes ap ikma pilap eneptuk latisi ahun ino inggik hele watusa urukon hol hibareg Yesus o Galilea kinang fam libag.

¹³Libareg Yesus o Nazaret embeselug o Kapernaum ik yenggelehon ayegma werehon o Zebulon men o Naftali men kinangon fam libag.

¹⁴Libag ane alem ari atam Allah wene hiyag isaruk latfag ahun Yesaya inowen haharoho imbibahon hikir atfag.

¹⁵Haharoho imbibahon tu, ”Zebulon kinang, Naftali kinang ik yenggelehon fil larukon men Yordan fumag fil Galilea men ap enemu inap wereg ambeg

¹⁶it arimano hik tegma welatusa angge famen seleg humon fanowon yet harusa. It war atukon apma welatuson arimano seleg fanowon apma atusa.”

¹⁷Yohanes watfag li itano Yesusen wene hiyag isaruk lit, ”Allah ap obog toho Inikni aruhu sambil ketiya horog toho welahereg siyag-siyag ane hiren turuk lahebon ari imbisiyek,” ibag.

¹⁸Yesus ik Galilea yenggelehon ayegma larukmen hun Simon unuk eke Petrus ino men ot Andreas men weregma yer isibag. It itano ikan watuk inap wereg lit ikan watuk asum ikma pilaptukmu yer isibag.

¹⁹Yer isibareg, ”Nori, ikan fahet turuk lahep hag toho ap yami eneptuk lamuhuben Anden wol heneptuk lahireg maniyek,” ibag.

²⁰Ari ibagma ikan watuk asum ino embeselug Yesus men ambiyeg laruk latfag.

²¹Tot libareg yer isarukmen ap piren Zebedeus amloho Yakobus men are Yohanes men inikni Zebedeus men kou fam wereg lit ikan watuk asum seleben turuk lit weregma yer isibag. Weregma yer isibareg Yesusen it wol enepfagma

²²inikni men kou men embeselug Yesus men ambiyeg laruk latfag.

²³Yesus o Galilea pumbuk obog toho walinggoho laruk lit wene uruk ibamen Allah Hinikni aruhu ulug hiyag isil laruk lit enebe ouk waruk lit inine eleg toho werehon men fanowap enebil laruk latfag.

²⁴Aren ari turuk latfagma Siria kinang fam wereg inap arimanowen Aren ari turuk urukon hol hibareg enele sahalfareg ap ouk eke hag eke hag waruk lit siyag toho werehon men siyag angge unundama wereg lit nenek turukon men inil fulug turukon men unuyug siyahon men arimano og eneplug waharukmu fanowap eneptuk latfag.

²⁵Fanowap eneptil larukmu Galilea inap men Dekapolis inap, Yerusalem inap men Yudea inap men Yordan fumag fil wereg inap men At ombolim mondeg angge laruk latfag.