Read Angguruk Yali MATIUS 5 Bible Online

MATIUS 5 - Angguruk Yali bible

MATIUS 5

¹Yesusen ap anggolo arimano yer isibareg punumu lahibareg heriyegma otsi ambeg watfag.

²Watfagma Yesusen wene hiyag isaruk lit,

³”Allah olohotma enenggengge elehon enehiyeg toho welamag. It enenggengge elehon ari Allah suwon anggengge it ininggikmu wereg.

⁴Enehummu siyag toho werehon enehiyeg toho welamag. Allahn it enehiyehap enebuhu.

⁵Inindi wiyig toho werehon enehiyeg toho welamag. Allahn mun angge man angge wal tibahon kinangma werehon it amuhup.

⁶Mun ane man ane pikit aruhu ulug wenggeltukmen inindi ouk turukon enehiyeg toho welamag. Inindi ouk eleg aruhu.

⁷Ap inindi enesuhon enehiyeg toho welamag. Ir oho Allahn indi enesug laruhu.

⁸Inindi fano roho werehon enehiyeg toho welamag. Iren Allah ebe hahup.

⁹Ap hili roho werehon mangnowap eneptukon enehiyeg toho welamag. Allahn An numaliki ulug ununuk suwal enebuhu.

¹⁰Fano ane turuk famen unusulug mug eneplug larukmu enehiyeg toho welamag. Allah suwon anggengge it ininggikmu wereg.

¹¹An nubahet hininggaliyap henebil laruk lit hunusil larikim siyag ane turuk ulug henebug il larikim henehiyeg toho welamok.

¹²Ari roho hit uwanma wene hiyag isaruk latfag inap oho unusil laruk latfag. Henehiyeg toho welamok, hinindi se roho welamok, Ninikni Allahn onggo suwon poholman og hisahu.”

¹³Ap men hiyap men fahet saho hag toho hit welahep. Saho unduk siyag atuk halug nungge fam nin olokap tuhup? Nungge fahet foroho lamuhup. Ap unuyuhen sobir isawag ulug hik esemek.

¹⁴Ap men hiyap men fahet hit seleg fanowon hag toho welahep. O pumbuk tom fam wirihon hirahoma wirig lam fug teg.”

¹⁵”Iral hunduhuk felug kou apma kilabuk fug teg. Ap olma werehon obog toho unubahet umbagpag tukag ulug o tikmu emberuk.

¹⁶Hit fano ane turukmu aben yet hisahupteg iren oho Hinikni poholmon wel tuhuben hiniral enelukema ambulpul turuk lamag.”

¹⁷”Musa wene men indam nabi inap arimanowen haharoho imbibag ane men elehap tuhuwen waharisi puk fug. Elehap tuhuken waharikik fug, suwap tuhuken waharikik.

¹⁸Pohol men kinang men eleg am fug angge weregma ilanggen tor angge famen haharehon eleg aruhu fug. Hahatfag ane roho tuhu sambil eneg eleg aruhu. Ari we tem toho hiyag hisaruk lahi.

¹⁹Musan komo enepfag ane haharehon tor angge oho apma tebeseruk lit siyag ulug ap unubam hiyag isaruk ahun ino poholman te ori winon palimu weregma at apma welaruhu. Komo enepfahon hahatfag ane ino hikit toho turuk lit ap winon fam eke hiyag isaruk ahun ino poholman te palimu welaruhu.

²⁰Musa wene onoluk inap men Farisi inap menen fano ane anggolo turuk. Hiren it hag toho fano ane turuk lit nin sebe roho turuk lamuhup fugmu Allah weregma kuhup fug. Ari we tem toho hiyag hisaruk lahi.”

²¹ ” ’Ap unusuk fug, unusuruk ahun ino inggik hele wabuhup,’ ulug ninikni nunumba fam ari ibag ane hiren holtikip.

²²Ari ibag ane holtikip angge famen Anden tot hiyag hisamin. Are fahet undaman olok haruk ahun ino inggik hele wabuhup. Are pet turuk lit, ’Hat mungguwat hahun,’ uruk ahun ino inggik hele waroho ap suwon palu roho weregma hondoholug lahup. Are pet turuk lit, ’Hat hindi siyahon,’ uruk ahun ino indok suwon fam hik isahup.

²³Allah fahet hubu lahapmin ulug wam eserik oho laruk lit hindi wenggel halug, ’Nareyen an fahet undaman olok haruk,’ ulug hinggareg hundaman holuk atuk halug esetuk ane umbusuhun.

²⁴Esetuk angge embeselug hare ambeg tam lahunteg hare nim ambiyeg mangno amuhup halug eneg waruhunteg esetuk laruhun.

²⁵Paleg angge fahet suwahal uruk lit unggum kong turuk ahun ambeg lamin peruk angge famen keman suhuloho waharuk lamok. Suwahal hubam uruk ahunen hat hele waroho unggum kong turuk ahun og uruhumu at inowen hat penjara foroho ahun ino og uruhumu aren penjara hik hiyahu rohon.

²⁶Penjara hik hiyahumu paleg lahen angge obog toho og uruhunmu eneg wilip habuhu. Ari we tem toho hiyag hisaruk lahi.”

²⁷” ’Ap unuhesi yarohuk fug,’ ibag ane ari hiren holtikip.

²⁸Ari ibag ane holtikip angge famen Anden tot eke hiyag hisamin. Hiyap yet halug yarog tele undaman peruk ahun ino hiyap pal taruk ahun hag toho wereg.

²⁹Hil pikit filen yet hahunteg hindimuwen ari tele puhun halug hil hililoho hik esemok. Hubam werehon misig eneg siyag atuk halug ari fano. Hebe abirangge lisoho indokma hik hiyaruk halug ari siyag.

³⁰Hinggik pikit filen sen hahunteg ari tele puhun halug kong toho hik esemok. Hubam werehon misig eneg siyag atuk halug ari fano. Hebe abirangge indok olokon fam kuhunon ari siyag.”

³¹” ’Nuhe embesemin peruk ahun inowen imbisihi ulug suwesingga haharoho umbuhu,’ ibag ane ari holtikip.

³²Ari ibag angge famen Anden tot eke roho hiyag hisamin. Hunuhesi umbusuk fug teg, we yaying turuk hiyap eneg umbusuk hag teg. Uhe embeseruk ahun inowen nuheyen siyag ane tukag peruk lit werehen at siyag. Hiyap ahunen embeserisiyon ap ekeyen hilaruk halug aben ohowon pal tarukon hag toho wereg.”

³³”Indam ibag ane aru, ’Anden tik-tem toho ihi uruk anggeyen henele si uk fug. Allahn henele urukmu hol henesug lit weregma uruk ane fuki roho turuk lamuhup,’ ulug niniknisi unumba fam ari ibag ulug hiren holtikip.

³⁴Ari holtikip angge famen Anden tot hiyag hisamin. ’Anden we tik-tem toho ihi,’ ulug hiren te uk fug. ’An pohol apma welahiyonen tik-tem toho ihi,’ uk fug. Ari uruk lahebon ariyen Allah heriyeg ambeg heneleyen siyahap turuk lamuhup.

³⁵’An kinangma unduhuk lahiyonen tik-tem toho ihi,’ uk fug. Ari uruk lahebon ariyen Allah uyug ahongge heneleyen siyahap turuk lamuhup. ’O Yerusalem unuk uruk lahiyonen tik tem toho ihi,’ uk fug. Ari uruk lahebon ariyen Ninikni suwon ibam heneleyen siyahap turuk lamuhup.

³⁶’Ninggareg nunggul wereg hag toho tem toho ihi,’ uk fug. Hinggareg hunggulmu horuk wilibihon misig singap tuk fug teg lahen, hubuluwap tuk fug teg lahen.

³⁷Yu halug yu eneg uhup, fug halug fug eneg uhup. Tik- tem toho ihi ulug enele anggolo uruk inap ari siyahonen hiyag isarukmu uruk.”

³⁸” ’Hebeloho watuk lit il fahet il wirim tuk teg, ayeg fahet ayeg wirim tuk teg,’ ulug indam ibag ane ari hiren holtikip.

³⁹Holtikip angge famen Anden tot hiyag hisamin. Aben hit hunubam onolok ane turuk halug suwahal uk fug, horoholeanggen pikiron huwatuk halug fumag hare filon oho nuwarin ulug unug omok.

⁴⁰Aben paleg angge fahet hasum huyugmon og nimin ulug suwahal uruk halug haren te hebe famonet sebe roho og omok.

⁴¹Ele ine roho il misig kema monde nubahik lamihin uruk halug hiren il piren hondoko imbisik lahup.

⁴²Hunubam heng heneptukon og omok. Ilamna foroho laruhuk ulug heng heneptukmu umbusuk fug.”

⁴³” ’Honori hit men werehon hinindi reg lit hit men seli roho werehon hinirim teg lamuhup,’ ulug indam ibag ane ari hiren holtikip.

⁴⁴Holtikip angge famen Anden tot hiyag hisamin. Ap seliyon hinindi roho welamuhup, hinindi siyahap heneptuk lit henebe hunusuk oho turukon fahet sembahyang uruk lamuhup.

⁴⁵Hiren ari roho turuk lamuhup ane ariyen Hinikni poholmon umalikisi amuhup. Hinikni inowen ap inindi siyahon fanowon unubam asinandi tukag ulug mo lahabik waharuk, pikir ane turukon hare ane turukon unubam osit pilabik waharuk.

⁴⁶Hit inindi hisarukon eneg hinindi roho welamuhup halug Allahn onggo nungge og hisahu? Uang embelug lalihip ulug heng eneptuk inaben oho onori inindi roho wereg eleg?

⁴⁷We honori eneg hi eneptuk hinaben fano ane nungge turuk lahep? Ap winon Allah wene enepeleg inaben oho ari roho onori hi eneptuk eleg?

⁴⁸Hinikni poholmon ino fano roho wereg hag toho hir oho fano roho wereg lamok.”