Read Angguruk Yali MATIUS 6 Bible Online

MATIUS 6 - Angguruk Yali bible

MATIUS 6

¹”Niren Allah olohotma fano ane tirikim ap winonen yet nisahupteg wel nenebukag peruk lamuhup fug. Hiren wel nenebukag peruk lamuhubon ari fam Hinikni poholmonen onggo og hisahu fug.

²Ap enengge elehon tor angge og isahunteg ari roho og isihi ulug ap hiyap iniline il laruk laruhun fug. Enele si uruk inap arimanowen aben wel nenebukag ulug funggalem keyen il laruk lit o sembahyang uruk ibamen oho ari il laruk. It arimano onggo og isa fug tehen, ihi ane aru we tem toho ihi.

³Ap enengge elehon tor angge og isaruk lit hinggik pikit filonen og isaruk ane hinggik hare filon apeleg toho welamag.

⁴Ap enengge elehon hirako og isaruk laruhun. Hikni hirahoman turuk ane oluk ahun inowen onggo og huruhu.”

⁵”Hiren sembahyang uruk lit ap enele si uruk inaben uruk hag toho uruk lamuhup fug. Sembahyang urukmu aben yet nisawag ulug sembahyang uruk ibamen oho ke handuhal teg ambeg oho unduhuk lit sembahyang uruk. It arimano onggo og isa fug tehen, ihi ane aru we tem toho ihi.

⁶Sembahyang imin ulug hibam nohoruk ambeg kulug sok lare felug Hikni hirahoma werehon fam sembahyang uruk lamok. Hikni hirahoman turuk ane oluk ahun inowen onggo og huruhu.

⁷Hiren sembahyang uruk lit wene enepeleg inaben uruk hag toho henele sahal-sahal uk fug. It arimanowen nit nenele anggolo ulmu Allahn hol nisamisi peruk.

⁸Ari fahet hit it hag toho welam fug. Hinikni poholmon fam uwan heng tuk fugmu hit hinindimu werehon oluk teg lit wereg.

⁹Ari fahet sembahyang tu hag toho uruk lamuhup, ’Ninikni poholmon, Hat hunuk suwon fahet nenekolen welamul. Hat hunuk uruk lit welamul.

¹⁰O aruma Hat wereg ambeg hag aruhu. It poholmonen Hat hele holeg lit wereg hag toho nit kinangmonen oho Hat hele holeg lit welamul.

¹¹Nit suburu yoho nulon Haren og nisimin.

¹²Ap aruman ninindi siyahap neneptusama niren nenepeleg aha, niren hindi siyahap haptukukmu Hat hapeleg amag.

¹³Niren siyag ane nunundaman wenggeltuk laheyon Haren elehap turuk lamin. Siyahonen nininggik lit neneptuk halug Haren windat nenebuhun. Ninikni ap suwon Hat eneg, mun angge man angge Hat holuk teg lit pohol ha kinang ha ki regman eneg welaruhun.’

¹⁴Siyag ane aben hit hunubam turukon hiren henembolma umbusuhupmu siyag ane hiren turuk lahebon oho Allahn ambolma umbusuhu.

¹⁵Siyag ane aben hit hunubam turukon hiren henembolma umbusuhup fugmu siyag ane hiren turuk lahebon oho Allahn ambolma umbusuhu fug.”

¹⁶”Sembahyang ul ulug hiyang wereg lit honorohole hinilaheg toho welam fug. Ap winonen hiyang wereg inap ukag ulug enele si ane uruk inap hag toho onorohole inilaheg atuk. It arimano onggo og isa fug tehen, ihi ane aru we tem toho ihi.

¹⁷Sembahyang imin ulug hiyang wereg lit hunggul puhun toho horohole ik umako welaruhun.

¹⁸Ap winonen kim hiyahupteg tu hiyang wereg ahun puhup fug. We Hikni hirahoma werehon inowen hat hiyang werehon yet hiyaruk lit wereg. Hikni hirahoman turuk ane oluk ahun inowen onggo og huruhu.”

¹⁹ ”Mun angge man angge kinangma werehon ip orohole turukon mabiliyen narukon aben hirag tarukon andog toho foroho lam fug.

²⁰Mun angge man angge ip orohole turuk elehon mabiliyen naruk elehon aben hirag taruk elehon andog toho poholma foroho lamuhup.

²¹Mun angge man angge andog toho foroho lahep ambeg ari hinindi oho wereg.

²²Henebe fahet hinil ari iral hag toho wereg. Hinil fano reg halug henebe abirangge seleg toho welahep.

²³Hinil siyag teg halug henebe abirangge hik toho welahep. Iral foroho lahebon ari war atuk halug hik teg ambeg ari mondabi hik teg laruhu.

²⁴Iknisi piren weregma enemingmingangge misig welam fug teg. Ikni eke indi haruk lit ikni eke irim toho wereg. Ikni ekeyen uruk ane sokowap feseruk lit ikni ekeyen urukon holtuk. Allah Hinikni weregma Mamon[1] amingmingangge welam fug teg lahep.”

²⁵”Ari fahet wene eke hiyag hisamin: Nangginoho wereg lit nungge-nungge naruk lamuhuk ulug hinindi fibuk fug. Nenebe nangginoho wereg lit nungge wan tuhuk ulug hinindi fibuk fug. Nit nenebe nonoluk welaheyon ari anggin tegma naruk angge ari se reg lit wereg. Nenebe welaheyon ari anggin tegma, nenehap selman wan turukon ari se reg lit wereg.

²⁶Suwe pohol ke larukon lahap homok. Suburu ei yag taruk eleg, ebe yahal taruk eleg, sum fam yuhat talug andog toho umbat taruk eleg angge famen Hinikni poholmonen naruk angge og isaruk. Hit ap welahebon Allah indi pulmu welahep. Suwe halug Allah ambolma wereg.

²⁷Ap war am hag tohonen indi anggin toho wereg lit tot amusun toho welaruhuk peruk angge famen oluk welam teg?

²⁸Hiren nungge fahet sum nungge wan tuhuk ulug hinindi fituk lahep? Walahen owil farema werehon yet homok. Sum yig talug suwe oruk ilil ta fug angge fano wilip atlug owil turuk.

²⁹Hun Salomo aliliyangge fano anggolo latfag angge famen walahen owil men ambi reg eleg. Ari we tem toho hiyag hisaruk lahi.

³⁰E farema werehon yoho wilip atuk halug sono indok yaltukon Allah ambolma wereg angge famen owil fanowon Allahn yig utuk. Hit ap Allah indi pulmu welahebon tam yig hisaruk laruhu. Nori, hit hinindi wenggeltuk lahep fuhon ari peruk lamok.

³¹Hinindi anggin toho wereg lit, ”Suburu nungge nahuk, ik nungge nahuk, sum nungge wan tahuk,” peruk lamuhup fug.

³²Wene inindimu eleg inaben eneg ari roho peruk. Hit ari henesehet teg lahebon Hinikni poholmon oluk teg lit wereg.

³³Allah wereg ambeg yami ruruk lit Allah wene tem toho urukon holtuk lamuhupmu mun angge man angge Aren sebe roho hit og hisahu.

³⁴Sono nangginoho welamuhuk ulug hinindi anggin toho wenggel ha fug. Sonowon fahet sono amu wenggel hahup. Hinindi anggin atuk halug yoho faheron yoho wenggel hahup, sono faheron sono wenggel hahup.”