Read Angguruk Yali MATIUS 7 Bible Online

MATIUS 7 - Angguruk Yali bible

MATIUS 7

¹”Honoriyen hit hunubam unggum umbuk nowen[2] hiren honori unubam unggum umbuk fug.

²Hiren honori unubam unggum emberuk lahebon ariyen hebeloho hit hunubam aruhu. Hiren ap winon wirim eneptuk lahep hag toho wirimangge ari fam hir oho wirim heneptuk lamuhup.[3]

³Hinggareg hilmu uwag suwon werehon hapeleg anggeyen hare ilmu e asinggilin werehon ari nungge fahet haruk lahen?

⁴Hinggareg hilmu uwag suwon wereg angge famen hare fam te, ’E asinggilin hilmu werehon oho-fesemin,’ nungge fahet uruk lahen.

⁵Hele si uruk hahun hubam tot imin. Uwag suwon hilmu werehon ari tam oho-fesiyok. Oho-fesuhunteg hil fano aruhumu e asinggilin hare ilmu werehon oho-fusuk teg laruhun.”

⁶”Fano angge meneyen nawag ulug og isahup fug. Unuyuhen sobir isahupmu hebeloho hir oho hunusuhup tohon ilembani umbagpag turukon wam elma hik isa fug.”

⁷”Heng turuk lamok, og hisahu. Yami ruruk lamok, hiyag hisahu. Kik turuk lamok, sok hut henebuhu.

⁸Heng tuhup inap arimano og isahu. Yami ruhup inap arimano hiyag isahu. Kik tuhup inap arimano sok hur enebuhu.

⁹Ap misig fam amlohowen suburu heng turukmu helep og um teg ano?

¹⁰Amlohowen ikan heng turukmu pisanggo og um teg ano?

¹¹Hit siyahonen hunumalikisi naruk angge fanowon og isa reg halug Hinikni poholmon fanowon inowen umalikisiyen heng turukmu fano angge tem toho og isahu.”

¹²”Aben nunubam fano ane tukag puhup ane ari hiren oho unubam fano ane turuk lamuhup. Musan haharoho imbibahon men Allahn ibag ane indam hiyag isaruk latfag inaben alem misig aru fahet haharoho imbibag.

¹³Sok keleg tohon ari fam kuruk lamok. Siyagma war atuk ambeg laruk ke sok humon wereg, kebunggalem suwon haleg. Ke ariyen ap anggolo siyagma laruk.

¹⁴Honoluk fano welamuhup ambeg laruk ke sok keleg tohon wereg, kebunggalem toron haleg. Ke toron ari ap tor anggeyen hiyahuk teg.”

¹⁵”Wene hiyag husul uruk anggeyen enele si uruk inap kahal enesug lamok. Enehap selman te wam domba fanowon hag toho waharuk angge famen unundaman te olomene olokon hag toho wereg.

¹⁶Anggen yihik fuhubon ari fam honoluk aruhu. Folim alog ahen fam soluk anggen tahanuk teg? Hohom alog ahen fam sawe anggen tahanuk teg?

¹⁷E fanowon fam anggen fanowon eneg yihik feruk. E siyahon fam anggen siyahon eneg yihik feruk.

¹⁸E fanowon anggen siyahon yihik fuk fug teg. E siyahon anggen fanowon yihik fuk fug teg.

¹⁹E anggen fanowon yihik feruk elehon muhuk fesuhureg indok yale fesuhu.

²⁰Ihi ane wenggel haruk lamuhupmu anggen fam honoluk aruhu.

²¹Enembilik fam An nubam, ’Nikni, nikni,’ uruk inap arimano obog toho Allah ambeg kuhup fug. We Nikni poholmon fam inindimu wenggel haruk lit ele holtukon eneg kuhup.

²²’Ninikni, Ninikni, Hat hunuk fam wene ap hiyag isaruk latukuk fug? Hat hunuk fam setan yanggaloho wiliptukuk fug? Hat hunuk fam niren fano ane anggolo turukuk fug?’ ulug An waruhuk sambil ap anggolowen An nubam ari uhup.

²³Uhupmu Anden te, ’Hit fahet An napeleg. Siyag ane eneg turuk latikipmu aliyek,’ ulug seleg toho hiyag isahuk.”

²⁴”Anden ihi ane aru holtuk lamuhubon arimano onoluk inap hag toho welamuhup. It arimano inibam kinang inema wit taruk inap hag toho welamuhup.

²⁵Osit humon narukmu masag waharuk lit siyelu waharuk lit o ino kik turukmu kinang fanoma wirihen tukum tuhu fug.

²⁶An nele inisanggo fam holuhup angge famen ihi ane aru turuk lamuhup fuhon enepeleg inap hag toho welamuhup. It inibam masag waruk ambeg wit taruk inap hag toho wereg.

²⁷Osit humon naruk lit masag waharuk lit siyelu waharuk lit o ino kik turukmu tukum tuhu. Tukum toho aluke lahabeg mondabi wambuhu,” ulug hiyag isibag.

²⁸Yesusen ari ulug hiyag isibagma ap anggolo arimano yuk libareg enekol hibag.

²⁹Enekol hibareg, ”Musa wene onoluk inaben hiyag nisaruk hag toho hiyag nesehek fug. Wene ngi ahun tu, ele ine roho hiyag nesehek,” ulug enele sahaltuk latfag.