Read Angguruk Yali MATIUS 8 Bible Online

MATIUS 8 - Angguruk Yali bible

MATIUS 8

¹Yesus punumuwen wamburukmen ap anggolo mondoko ambiyeg laruk latfag.

²Ambiyeg laruk latfagma ap misig ahap salukangge rohon ambeg watfareg olohotma kunuk toho hur atfareg, ”Nowe, Haren an fahet fanowap timin peruk lahen halug an fanowap nabin,” ibag.

³Ari ibagma Yesusen inggik fam ap ino ki hibareg, ”Anden hat fanowap hapmin peruk lahi,” ibareg, ”Fano amin,” ibagma ahap salukangge arimano fano atfag.

⁴Fano atfagma Yesusen, ”Anden hat hubam tihi ane ap winon hiyag isa fug. We imam inap enembeg hahap kim halusan lamihinteg fano ahi ulug Musa wene fam haharoho imbibahon ino hikit toho Allah fahet hubu lahapmihin. Hubu lahapmihinon ari famen imam inap arimano onoluk amag,”[4] ulug Yesusen ap ino hiyag itfag.

⁵Yesus o Kapernaum kibareg weregma Roma inap sehen senehon onowe suwon misig watfareg Yesus fam hiyag utuk lit,

⁶”Nowe, an namingmingangge eke uyug siyahon ouk anggolo waruk lit olma eneg yinggig lit wereg,” ibag.

⁷Ari ibagma Yesusen, ”Anden fanowap timinen ambiyeg lul,” ibag.

⁸Ambiyeg lul ibagma sehen seneg inap onowe inowen, ”Nowe, an siyag ane turuk nahun nibam lamihin fuhen we tiyan hele imihinmu namingmingangge ino fano atmisi.

⁹An oho nowesi enepma welahimu an napma oho notsi wereg. Anden oho not eke fam, ’Lag!’ uruk lahimu laruk, not eke fam, ’Ma!’ uruk lahimu waharuk. Namingmingangge ubam, ’Yabuk wirin,’ uruk lahimu wituk,” ibag.

¹⁰Ibag ane ari Yesusen hol hibareg fano ehek ulug ombolim waharuk latfag inap arimano hiyag isaruk lit, ”Ap tuwen tem toho An nubam wenggel hehek hag toho Israel inap misihen oho an nubam wenggel harukon harikik fug,” ibag.

¹¹”Ap anggolo yali fil hubula fil werehon arimano wamuhupteg Abraham men Ishak men Yakub men Allah wereg ambeg heriyeg lit suburu ambiyeg nahup.

¹²Allah wereg ambeg ngi ninap urukon arimano hik tegma hik isahupmu uba yatuk lit eneyeg kilit matuk lit welamuhup. Ihiyon ari tem toho hiyag hisaruk lahi,” ibag.

¹³Ari ibareg sehen seneg inap onowe ino fam, ”Hundaman wenggel hehenon ari fam teko lamisiyen hibam lamihin,” ibag. Ari ibagma amingmingangge olma werehon ino fano atfag.

¹⁴Yesus Petrus ibam kibareg kim harukmen Petrus iyamalhe ouk waruk lit inahanen yinggigmu kim hibag.

¹⁵Kim hibareg inggiken sen harukmu itano inahan eleg atfag. Eleg atfagma in atfareg Yesus let turuk latfag.

¹⁶Let turuk lit weregma o hup arik ohoma ap anggolo unundama siyag angge werehon arimano Yesus ambeg hondog eneplug watfagma ele ine roho uruk lit siyag angge arimano wilip eneptuk lit ouk warukon arimano fanowap enepfag.

¹⁷Alem tibag ane aru atam Allah wene hiyag isaruk latfag ahun Yesayan haharoho imbibahon hikit toho teko libag. Haharoho imbibag ane aru, ”At inowen nit ninine elehon let neneptuk lit ouk nunubam werehon fanowap neneptisi.”

¹⁸Ap anggolo Yesus walinggoho weregma kim isibareg ik ahum keyen ik fumag nindig amul ulug otsi fam hiyag isibag.

¹⁹Hiyag isibagma Musa wene oluk ahun misig watfareg, ”Nowe, Hat kema-kema larukmu an oho Hat men ambiyeg laruk laruhuk,” ibag.

²⁰Ari ibagma Yesusen, ”Olomene nohoruk ambeg ei helep elma wereg. Nin ari hag toho suwe nohoruk ambeg oho ei e fam wirig. At ap kinangmon atik ibahon ino ibam yugmu unggul leko nohoruk ambeg eleg,” ibag.

²¹Ari ibagma ot misihen Yesus fam ele uruk lit, ”Nowe, an nikni tam indok yale fesuhuken lamin ulug heng haptuk lahi,” ibag.

²²Ari ibagma Yesusen, ”Ap warehon arimanowen ap war atukon yal enebukag tohon hat te An nombolim laruk lamin,” ibag.

²³Ari ibareg Yesus kou fam kibagma otsi oho ombolim ambiyeg kibag.

²⁴Kibareg ik ahum pali ke larukmen siyelu humon waharuk lit haglaburen kou ino hondo rurukmen Yesus nohoruk latfag.

²⁵Ari turukmu otsi Onowe iraham watfareg, ”Nonowe, ik haglabut anggolowen nit war amuk oho turuk lahereg let nenebin,” ulug Onowe elelfag.

²⁶Elelfagma Aren otsi unubam, ”Hit An nubam hinindi wenggel ha fug anggeyen nungge fahet henekol toho welahep?” ibag. Ari ibareg in atfareg siyelu men ik men pet tibagma ik haglabut ino mondabi yuwag atfag.

²⁷Ik ahum ino yuwag atfagma ap arimano yihi ibareg, ”Siyelu men ik menen ap aru ele holehesareg eleg ahayon ari ap aru sa hag toho wereg,” ulug enele sahaltuk latfag.

²⁸Ik ahum pali keyen nindig atfareg Gadara inap enengginang fam libagma ap piren setan siyag angge unundama werehon ap warehon sal eneptuk ambehen wilip atug Yesus ambeg watfag. It piren itano onolok anggolo rehen ap winon it wereg ke ari enekolen laruk latfag fug.

²⁹It piren itano watfareg enele hum toho uruk lit, ”Hat Allah amloho nit nunubam nungge ane timihinen wahen? Nit uwan lahe angge famen nunusimin ulug wahen?” uruk lit enele hi roho uruk latfag.

³⁰It wereg ambeg itano horog toho wam anggolo roho kinang waruk lit welatfag.

³¹Welatfagma setan piren itanowen, ”Yanggal nenepmin peruk lahen halug wam unundama kilihip ulug hiyag nisamihin,” ulug Yesus ubam heng tibag.

³²Heng tibagma Yesusen, ”Aliyek,” ulug hiyag isibagma it itano libareg wam unundama kibag. Kibagma wam arimano pule keyen imbil-imbil ik ahum ke waroho lin ibag.

³³Waroho lin ibagma wam foroho inap arimano olma libareg ap winon unubam hiyag isaruk lit ap piren siyag angge unundama werehon itano men wam anggolo war atfahon arimano men fahet hiyag isibag.

³⁴Hiyag isibagma o pumbuk ino welatfag inap arimano obog toho wilip atug Yesus ambeg libareg, ”Hat te o aru welatmihin fug, hamumu lamihin,” ulug enele hum toho uruk lit yanggalfag.