Read Angguruk Yali MARKUS 1 Bible Online

MARKUS 1 - Angguruk Yali bible

MARKUS 1

¹Yesus Kristus Allah amloho wene fanowon alem tu.

²Yesaya Allahn ibag ane hiyag isaruk latfag ahun inowen haharoho imbibahon tu, ”Allahn ele irisiyon tu: Yet teg lamok, An not misig Hat halukema monde fuhuk, Hat laruk ke aren hale fuhuwen at monde fuhuk.

³At farema wereg lit, ’Nonowe suwon waharuk ke hale feruk lit pikit toho yaho fiyek,’ ulug ele hi roho uruk lit wereg.” Allahn ibag ane Yesayan haharoho imbibahon aru.

⁴Haharoho imbibahon hikit toho Yohanes ap ikma pilap eneptuk latfag ahun ino watfag. Watfareg farema wereg lit ap hiyag isaruk latfag. Hiyag isaruk lit, ”Siyag ane wenggeltuk lahebon ari imbisiyek. Siyag ane turuk lahebon ari Allahn ambolmayap turuk lit elehap tuhuwen anden ikma pilap heneptuk laruhuk,” ulug hiyag isibag.

⁵Hiyag isarukmu Yudea inap men Yerusalem inap men obog toho Yohanes ambeg waharuk latfag. Yohanes ambeg watfareg, ”Niren siyag ane ari-ari turuk latukuk,” ulug Yohanes fag toho hiyag utukmu Yordan ikma pilap eneptuk latfag.

⁶Yohanes ino sum wam unta oruk yiko welatfahon wan teg latfag. Wam sapi ahap ahele eke alunggu ke pug teg lit herenangge men kin altap men naruk latfag.

⁷Ari roho wereg lit ap hiyag isaruk lit, ”At suwon fobik waruhureg an siyag nahun nubam At suwon inowen, ’Hur amin, sepatu Anden tohon lole nubahin,’ uhu fug,” ulug hiyag isibag.

⁸”Anden ik fam eneg pilap heneptuk lahi angge famen At suwon inowen Allah hime fanowon hunubam pilabik waruhu,” ulug hiyag isibag.

⁹Ari ulug hiyag isarukmen Yesus ibam Nazaret o Galilea embeselug Yohanes ambeg wirig atfag. Wirig atfagma Yohanesen Yesus Yordan ikma pilapfag.

¹⁰Pilapfagma ikman lahik waharuk lit yet harukmen pohol fo roho Allah hime fanowon suwe yalma hahon At ubam wambik waharikim yet hibag.

¹¹Yet hibagma, ”An namloho nindi reg lahiyon Hat, An Hat fahet nahiyeg toho welahi,” ulug Allah ele poholman urukmu hol hibag.

¹²Hol hibareg weregman Allah hime fanowon inowen Yesus farema hondoholug libag.

¹³Hondoholug libagma wereg lit hup teng misig nubam hilag nuwalen 40 farema welatfag. Farema weregman Iblisen Allah ubam indi wenggel haruk ano ulug Yesus ele ying turuk latfag. Ele ying turuk latfagma Yesus suwe pak wereg ambeg farema welatfag. Weregman Allah otsi poholmon malaikat wambik watfareg let turuk lit foroho latfag.

¹⁴Yesus ino weregman Yohanes inggik hele watug libagma Yesus o Galilea watfareg Allah wene fanowon hiyag isaruk latfag.

¹⁵Wene hiyag isaruk lit, ”Allah ap obog toho Inikni aruhu sambil ketiya horog toho welahe. Siyag ane wenggeltuk lahebon ari imbisiyek, Allah wene fanowon ari hinindi wenggel haruk lamuhup,” ulug hiyag isaruk latfag.

¹⁶Hiyag isaruk latfareg Yesus ik Galilea yenggelehon ayeg ke laruk lit Simon men ot Andreas men ikan yuhar atuk asum ikma pilaptukmu yer isibag. It piren itano ikan watuk inap welatfag.

¹⁷Ikan watuk inap welatfagma Yesusen yer isibareg, ”Hit An men lulen tiya maniyek. Ikan yami ruruk latikip hag toho ap wene hiyag usul ulug yami eneptuk lamuhup,” ibag.

¹⁸Yesusen ari ibagma ikan watuk asum lin isalug Yesus min ambiyeg libag.

¹⁹Tot horogma libareg Zebedeus amlohoki Yakobus men ot Yohanes men kou fam heriyeg lit ikan watuk asum seleben turukmu yer isibag.

²⁰Yer isibareg wol enepfag. Wol enepfagma it inikni Zebedeus men amingmingangge men lin isalug Yesus min ambiyeg libag.

²¹Yesusen otsi wol enepfahon itano min ambiyeg o Kapernaum libag. Libareg weregman sembahyang uruk sul atfagma sembahyang uruk ibam kibag. Kibareg Yesusen wene ap hiyag isibag.

²²Hiyag isarukmu ap welatfahon arimano yuk libareg, ”Musa wene onoluk inaben hiyag nisaruk hag toho Aren hiyag nisaruk eleg, Aren hiyag nisaruk ane aru ele ine roho hiyag nisaruk,” uruk latfag.

²³Ari uruk latfagma Yesusen kim harukmen sembahyang uruk ibam ap misig undama siyag angge werehon eke welatfag.

²⁴Ap welatfahon inowen ele hum toho uruk lit, ”Hat Yesus Nazaret hahun nit min welamul fug, nit nunusik oho wahen. Hat Allahn mon haptisimu wahenon an noluk,” ibag.

²⁵Ari ibagma Yesusen siyag angge ino fam, ”Hat hele eleg angge welamin, ap aru undama werehon wilip amin,” ulug pet tibag.

²⁶Wilip amin ulug pet tibagma siyag angge setan ino wilip atuk lit hun ino miyaloho hik isibareg ele hum toho il laruk lit wilip atfag.

²⁷Setan ino wilip atfagma ap welatfahon arimano obog toho enekol hibareg it-it umung-umung atuk lit, ”Ap tu sa hag toho wereg? Wene keron ele ine roho hiyag nisaruk,” ibag. ”Siyag angge setan ap unundama werehon Yesusen komo eneptikim ele holtuk,” ulug uruk lit enekol hibag.

²⁸Enekol hibareg Yesusen ari roho tehek ulug o pumbuk Galilea werehon obog toho hiyag isil noruk latfag.

²⁹Larukmu sembahyang uruk ibam inowen wilip atfareg Simon men Andreas men inibam it Yesus men Yakobus men Yohanes men ambiyeg kibag.

³⁰Kurukmen Simon iyamalhe ouk waruk lit ubam inahanen yinggig latfag. Yinggigmu ap welatfahon arimanowen ouk waruk ulug Yesus hiyag itfag.

³¹Hiyag itfagma Yesus at wereg ambeg libareg inggik seneko unduhuk fibag. Unduhuk fibagma inahan ino eleg atfag. Eleg atfagma fano atfareg suburu isag isibag.

³²Hup atfagma mo wambirikim ap ouk warukon men nenek turuk inap men obog toho Yesus ambeg hondog eneplug watfag.

³³Hondog eneplug watfareg ap o pumbuk ino welatfag inap arimano obog toho sokolma luhal arik watfag.

³⁴Luhal arik watfareg weregman ap anggolo ouk eke hag eke hag waruk lit siyag toho welatfahon arimano oho Yesusen hihir enepfag. Siyag angge ap unundama welatfahon anggolo yanggaloho wilip eneptuk latfag. Wilip eneptukmu siyag angge arimanowen, ”Hat fahet nit nonoluk toho welahe,” elep angge famen Yesusen, ”Hit henele uk fug!” ulug per enepfag.

³⁵Hubet mo wam fugmu Yesus in atlug wilip atfareg farema libareg sembahyang uruk latfag.

³⁶Sembahyang ik libagma Simon min at min welatfahon itano Yesus kema laha ulug yami rik libag.

³⁷Yami ril larukmen weregma hiyahibareg, ”Ap anggolo arimanowen At kema laha ulug yami haptuk,” ulug Yesus hiyag itfag.

³⁸Hiyag itfagma Yesusen, ”O pumbuk winon eke wene hiyag isaminen lul. Ari fahet waharikik,” ibag.

³⁹Ari ibareg o Galilea walinggoho werehon arimano pumbuk eke la pumbuk eke la turuk lit sembahyang uruk ibamen wene hiyag isaruk latfag, siyag angge ap unundama werehon oho yanggaloho wilibi feseruk latfag.

⁴⁰Wilibi feseruk latfagma ap eke ebene yowilangge rehon Yesus ambeg libag. Libareg Yesus alukema hur atfareg, ”Hat hindimuwen hihit napmin pehen halug hihit napmihin,” ulug Yesus fam ari ibag.

⁴¹Ari ibagma Yesusen nindi hibareg ap ino ubam inggik tung hibareg, ”Hihit habihi, fano amin,” ibag.

⁴²Fano amin ibagma yowilangge arimano eleg atfagma ahap fano atfag.

⁴³Fano atfagma Yesusen ele ine roho, ”Ketiya lamihin,” ibareg,

⁴⁴”Hihit habihi ane ap fam hiyag isa fug,” ulug komo ribag. ”Allah ibam foroho inap wereg ambeg lamihinteg hebe unug hamihin. Hebe unug hamihinteg Musan haharoho imbibahon hikit toho Allah fahet hubu lahapnihin,” ibag. ”Ap aru Musa wene apma wereg pelusan hubu lahapnihin,” ibareg monde fibag.

⁴⁵Monde fibagma ap ino libareg, ”Yesusen ari roho hihit nabehek,” ulug ap iniline hiyag isil noruk latfag. Noruk latfagma Yesus ap enembeg la fug angge inam am fug angge farema welatfag. Farema eneg weregman ap anggolo ambeg laruk latfag.