Read Angguruk Yali MARKUS 10 Bible Online

MARKUS 10 - Angguruk Yali bible

MARKUS 10

¹Ari ibareg Yesus o inowen wilip atfareg o Yudea keyen tulug ik Yordan fumag fil nindig atfag. Nindig atfagma nin ap anggolo luhalik watfagma wene atam hiyag isaruk latfag hag toho hiyag isibag.

²Hiyag isarikim Farisi inap watfareg, ”Nonowe, aben uhe oho angge famen umbusuk hag teg ano, umbusuk fug teg ano,” ulug kapal haruk lit fano ane imisi ano, siyag ane imisi ano aluwat hul pibareg kapal hibag.

³Kapal hibagma Yesusen, ”Musan alem ari fahet nungge haharoho imbibag?” ibag.

⁴Ibagma iren, ”Suwesingga fam hiyap tu imbisihi ulug hahatuk lit hiyap oho angge famen umbusuk hag teg ulug Musan haharoho imbibag,” ibag.

⁵Ari ibagma Yesusen, ”Hit mondabi hinindi sohu roho welahebon fahet Musan ari roho turuk lamuhup ulug hit fahet haharoho imbibag.

⁶Allahn mun angge man angge wal tibareg ap men hiyap men wal enepfahon ari famen

⁷ahunen ikni men isinga men embeselug uhe men enebe misig hag toho welamuhup pibag.

⁸Enebe piren hag toho wereg angge famen fobik enebe misig hag toho welamuhup ibag ane ariyen hili roho welam fug teg, we mangno roho welam teg,” ulug hiyag isibag.

⁹”Allahn mangnowap enepfahon ari aben minggibuk fug teg,” ibag.

¹⁰Ari ibareg otsi men inibam watfareg otsiyen, ”Ehen ane ari nungge fahet ehen?” ulug Onowe umung hibagma

¹¹Yesusen, ”Aben uhe subon embeselug keron hilaruk halug uhe subon ino indi siyahap turuk lit ap unuhesi umung isarukon hag toho wereg.

¹²Hiyaben ahun subon embeselug ap eke ambeg wing kuruk halug hiyap inowen ap pal taruk hag toho turuk,” ibag.

¹³Weregman malik toron Yesusen sembahyang uruk lit inggik ununggulmu embemisi ulug inisingasiyen hondog eneplug watfag. Hondog eneplug watfagma Yesus otsiyen malik toron tuma fug ulug per enepfag.

¹⁴Per eneptukmu Yesusen yer isibareg olok haruk lit, ”Malik aruma An nambeg fano wahasama hiren per enebuk fug. Allah ap obog toho Inikni aruhu sambil ino malik aruma hag toho werehon eneg Inikni aruhu,” ibag.

¹⁵”Malik toronen, ’Allah ap obog toho Inikni aruhuwon nir oho Ninikni,’ uruk. Ap san malik toronen uruk hag toho uruk elehon ino Allah weregma kuk fug teg. Ihiyon ari tem toho ihi,” ibag.

¹⁶Tem toho ihi ibareg malik arimano inggik ununggulmu emberuk lit mako pug toho hi enepfag.

¹⁷Hi enepfareg Yesus wilip atfareg funggalma larukmen ap misig orohole paloho watfareg alukema hur atfareg, ”Nowe, Hat fano hahun, Allah men mondabi noluk welaruhuken nanggin-nanggin turuk laruhuk, Haren tot hiyag nimin,” ibag.

¹⁸Hiyag nimin ibagma Yesusen, ”Nungge fahet fano hahun ehen. Ap sa fanowon wereg eleg, we Allah misig eneg fano,” ibag.

¹⁹”Allah wene numon ibahon hat holuk teg lahen, ’Ap hiyap unusuk fug, ap unuhesi pal ta fug, aben tohon hirag ta fug, ap enebug henele si uk fug, ap enengge taluk toho hila fug, hikni hisinga hindi enesug laruhun,’ ibag ane hat holuk teg lahen,” ibag.

²⁰Hat holuk teg lahen ibagma ap inowen, ”Nowe, an malik toron hag tegma noluk latisi angge ketiya oho holtuk lahi,” ibag.

²¹Holtuk lahi ibagma Yesusen ap ino indiyen orohole kim hibareg, ”We misig eneg hindimu wereg eleg,” ibag. ”Lamihinteg haren angge obog toho ayeg waroho ap og isamihinteg uang ayeg waroho og humuson itano obog toho ap enengge elehon saplangge og isamihin. Og isamihinteg haren tohon poholma welaruhu. Poholma werehen An nambeg watnihinmu An men mangno roho welamuhuk,” ibag.

²²Yesusen ari ibagma ap inowen nanggengge anggolo werehen nangginmin ulug indi anggin atfagma mondabi libag.

²³Mondabi libagma Yesusen otsi ambolma hebeloho kim isibareg, ”Ap enengge anggolo werehon Allah weregma nangginoho kuhup,” ibag.

²⁴Nangginoho kuhup ibag ane fahet otsi enekol hibag. Enekol hibagma Yesusen nin eke, ”Numaliki, mun angge man angge fahet wenggeltuk inap nangginoho Allah weregma kuhup,” ibag.

²⁵”Wam unta lisu fo reg keyen kuk hag teg? Ari hag toho ap enengge anggolo werehon Allah weregma kuk fug teg,” ibag.

²⁶Ari ibagma otsi yuk lagmag ibareg, ”Ap sa nangginoho Allah weregma kuhu?” ulug umung-umung atuk latfag.

²⁷Umung-umung atukmu Yesusen kim isibareg, ”Aben tuk fug teg ane ari Allahn eneg tuk hag teg, mun ane man ane Allah amuwen eneg tuk hag teg lit wereg,” ibag.

²⁸Ari ibagma Petrusen, ”Niren angge mun angge man angge obog toho embeserukukteg Hat men ambiyeg laruk lahe,” ibag.

²⁹Ari ibagma Yesusen, ”Wene fano ulug An nubam ebet haruk inap arimano inibam onotsi onowesi inisingasi iniknisi unumalikisi iniyabuk iren angge umbusuhup halug

³⁰Allahn teng obog toho sebe roho og isahu. Ketiya kinangma tuma wereg li hinibam men hiniyabuk men honowesi honotsi men hinisingasi men hunumalikisi men tuma wereg ulug Allahn hiyag isaruk. Aben wene fahet unusurukmu Allahn o keron hiyag isaruk. Kinang ketiya welaheyon eleg aruhumu Allahn keron wal tuhuwon ino fam it arimano mondabi onoluk welamuhup. Ihi ane ari we tem toho ihi,” ibag.

³¹”Ap anggolo enelukema werehon enembolma amuhup. Ap enembolma werehon enelukema amuhup,” ibag.

³²Welatfareg Yesus otsi men Yerusalem lul ulug laruk lit keman Yesus tam atfag. Yesus tam atfagma laruk lit otsi enekol anggolo roho laruk latfagma onombolim laruk latfahon arimano oho enekol hibag. Laruk lit Yesusen otsi nisanggowen itano fam niraham tiya maniyek ulug wol enepfareg ketiya nuwabuhup angge honoluk toho ulug hiyag isibag.

³³Hiyag isaruk lit, ”Nit Yerusalem laruk lahe,” ibag. ”Aben At ap atfahon ino inggik hele waroho Allah ibam ngi inap onowesi men Musa wene onoluk inap men enembeg hondoholug lahup,” ibag. ”Hondoholug lahupmu ap tu ware fusukag uhupteg Allah unuk enepeleg inap wereg ambeg hondoholug lahup.

³⁴Hondoholug lahupmu iren inda yako inggaliyap turuk lit orohole ke wasubag sup isaruk lit e paleg fam watuk lit pinggi wabuhup. Pinggi wabuhupmu hup pirenam wareg nohokureg hinahaneg angge oluk aruhu,” ibag.

³⁵Ari ibagma Zebedeus amlohoki Yakobus men Yohanes men Yesus iraham watfareg, ”Nonowe nit nunubahet Haren tuhu peruk lahe ane ari heng habulen wahe,” ibag.

³⁶Ari ibagma Yesusen, ”Hit hunubahet nungge tuhuk ane fahet heng naplihip?” ibagma

³⁷iren, ”Hat Allahn suwap habuhumu nit hiyag nisaruk lit hat eke ninggik pikit fil tu hur arik ma, hat eke ninggik hare fil tu hur arik ma ulug nunubam uhunen heng haptuk lahe,” ibag.

³⁸Ari ibagma Yesusen, ”Hiren uruk lahep ane ari hinindi anggat teg elehen uruk lahep. Kubag Anden nahukon ari fam hir oho nenggep ha reg lahep? An ikma pilap nabuhup hag toho hit eke wambehep ha reg lahep?” ulug ele indit toho umung isibag.

³⁹Umung isibagma iren te, ”Ari fano, ik kubag fam nengge ha reg lahe, ikma wambehe ha reg lahe,” il larikim Yesusen, ”Kubag Anden nahukon ino fam hir oho nahup. An ikma pilap nabuhubon ino hag toho hir oho pilap henebuhup.

⁴⁰Ninggik pikit fil hare fil hur arik maniyek urukon ari Anden uhuk fug. Allah inggareg indiyen wol enebuhuwon itano eneg An niraham hur amuhupteg welamuhup,” ibag.

⁴¹It Yakobus men Yohanes men enele ari urukmu onori winon welatfahon arimanowen hol hibareg unundama onolok hibag.

⁴²Onolok haruk latfagma Yesusen hit obog toho tiya maniyek ulug wol enepfareg, ”Ap suwon pemerintah urukon o kema-kema werehonen enele ine roho uruk lit ap enele ying eneptuk ane ari hit honoluk. Ap onowesi suwon arimanowen enele onolok toho uruk lit unusuruk ane ari hit honoluk,” ibag.

⁴³”Hiren ari tuk fug. Ap san an ap suwon aruhuk perukon ino hit henemingmingangge aruhu.

⁴⁴Ap san an honowe aruhuk perukon ino hit honot aruhu,” ibag.

⁴⁵”At ap atfahon ino ap mingming enebuhuk ulug waharisi fug. Ap enemingmingangge aruhuk ulug waharisi. Ap anggolo ininggik hele waroho wereg hag toho werehon arimano Allahn lol enebuhumu fano roho welamuhubon fahet At ino ware fesuhup,” ibag.

⁴⁶Fobik Yesus men otsi men o Yerikho libareg nin wilip atug ap anggolo ambiyeg larukmen ap il siyahon hun Timeus amloho Bartimeus ino kema heriyeg latfag. At ino il siyag tehen kema wereg lit ap la wam turukon fam suburu heng eneptuk latfag.

⁴⁷Heng eneptuk lit weregma Yesus Nazaret ahun waharuk urukmu hol hibareg, ”Yesus Nowe, Hat Daud amloho welahenonen an hindi niyimin,” ulug ele hi roho ibag.

⁴⁸Ibagma ap anggolo welatfahon arimanowen hele imbisin ulug pet tibag. Pet tibag angge famen ele ine roho, ”Daud amloho, hindi niyimin,” ulug hi roho uruk latfag.

⁴⁹Ele hi roho uruken Yesus laruk latfag angge in atfareg wamag tohon wol tiyek ibagma iren il siyahon ino fam, ”Hindi se roho wereg lit wol haptuken in amin,” ibag.

⁵⁰Ari ulug hiyag itfagma asum hik isibareg in atfareg folo-folo Yesus ambeg watfag.

⁵¹Watfagma Yesusen, ”Nanggin hapninen hele ine roho uruk lahen?” il larikim ap il siyahon inowen, ”Nowe, nil fano ale peruk lit uruk lahi,” ibag.

⁵²Ari ibagma Yesusen te, ”Hat we tem hihit napmisi pehenon ariyen hil fano ahenma hibam lamihin,” ibag. Ari ibagma il fano atfareg Yesus men ambiyeg laruk latfag.