Read Angguruk Yali MARKUS 11 Bible Online

MARKUS 11 - Angguruk Yali bible

MARKUS 11

¹Libareg o Yerusalem horogma tom Zaitun alem keyen o Betfage men Betania men libareg Yesusen otsi piren atam lalihip ulug mon enepfag.

²Mon eneptuk lit, ”O pumbuk lindi lalihipteg keledai kabiniyon misig ap emberimu hur atusa fuhon kumbi ililigmu yet halihip. Yet halihibon ari loloho walug watihip,” ibag.

³”Ap ekeyen te, ’Nungge fahet loltuk lahep?’ uruk halug hiren te, ’Nonowe asehet tehen mon neneptuk lit nin fobik imbik lalihip ehekma loltuk lahe,’ ilihip,” ibag.

⁴Ibagma libareg funggalem o iraham ke larukon sok iraham keledai ino ililigmu yet hibareg lolfag.

⁵Loltul ulug turukmen ap unduhuk lit welatfahon arimanowen, ”Nungge fahet keledai aru loltuk lahep?” ibagma iren,

⁶”Nonowe asehet tehen mon nenebehekma loltuk lahe,” il larikim enele eleg atfag.

⁷Enele eleg atfagma keledai kabiniyon ino Yesus ambeg walug watfareg enesum nonggoloho emberimu imbibagma Yesus hur arik lahibag.

⁸Hur arik lahibagma ap luhaleg latfahon arimano it winonen enesum nonggoloho kebunggalma tuwale fibag. It winonen anggen keyen e inggik kong toho kebunggalma tuwaltuk latfag.

⁹Tuwaltuk latfagma ap arimano atam larukon men ombolim larukon menen Nonowe suwon waharuk uruk lit, ”Ninikni Allahn monde fehekma waharukon tu wel turuk lamuhup,” uruk latfag.

¹⁰”Ninikni Daud welatfahon ino ubalmangge waharukon wel turuk lamuhup. Allah poholma werehon oho wel turuk lamuhup,” uruk latfag.

¹¹Ari urukmu Yesus o Yerusalem kibareg Allah wene uruk ibam ino wereg angge obog toho walinggoho kim hibag. Kim hibareg hupmu atfagma otsi nisanggowen men wilip atfareg o Betania suhuloho nohik watfag.

¹²Likiyamon Yesus otsi men o Betanian wilip atfareg larukmen At suburu obok hibag.

¹³Suburu obok hibareg larukmen e ara soluk hag ahen misig anggen naruk ahen inggila regma yatman yet hibag. Yet hibareg anggen wereg ano ulug iraham ha libag. Iraham ha libareg kim harukmen li waharuk elehen anggen yihik elegma inggila eneg wereg latfag.

¹⁴Inggila eneg wereg latfagma Yesusen, ”E aru re, hanggen mondabi aben hinahup fug,” urukmu otsiyen hol hibag.

¹⁵Hol hibagma o Yerusalem Allah wene uruk ibam kibareg Yesusen it onggo fahet walug kuruk inap heriyeg lit werehon arimano yanggal enepfareg uang ayeg waroho emberuk ambeg e tuwalehon hebel isibareg suwe yalma ayeg waroho og isarukon emberuk ambeg tel isibag.

¹⁶Tel isibareg, ”Mun angge man angge Allah ibam ha rulug la fug,” ulug komo enepfag.

¹⁷Komo enepfareg wene hiyag isaruk lit, ”An nibam aruma ap obog toho fahet sembahyang uruk ibam aruhu haharoho imbibag angge famen hiren ap siyag ane turuk lit enebe unusulug enengge hilaruk inap inibamap tirikip,” ibag.

¹⁸Ari ibagma Allah ibam ngi inap onowesi men Musa wene onoluk inap men Yesusen ari tehek urukon hol hibareg Yesus wabuhuk ulug enele sahaltuk latfag. Sahaltuk latfag angge famen Yerusalem inaben Yesusen hiyag isibag ane holfareg we tem toho fano ane ehek ulug enekol hibag. Enekol haruken Allah ibam ngi inap arimanowen ap obog toho Yesus ibil ahasa ulug enekol hibareg wabuhuk pibag.

¹⁹Hup atfagma Yesus otsi men o pumbuk inowen wilip atfareg suhuloho watfag.

²⁰Likiyamon e ara soluk hag ahen ino alma libareg yet harukmen e ino uwahet umanggenet ilim teg latfag.

²¹Ilim tegma yet hibareg Petrusen Yesusen tam ibag ane fahet indi wenggel hibareg, ”Nowe, yet himin, e ara Haren pet tirikinon ino mondabi ilim atuk,” ibag.

²²Ari ibagma Yesusen, ”Allah fam hinindi wenggel haruk lamok,” ibag.

²³”Allah fam wirik toho wenggel harukon inowen heng timinon ari hikit toho og nuruhu peruk lit tom misig fam, ’In atmihinteg ikma hik toho wambin,’ uruk halug at ino Allahn og uruhu.

²⁴Sembahyang uruk lit heng tuhubon Allahn tem toho og nisahu ulug wenggel haruk lamuhupmu Aren og hisahu ihi ane ari holeg lamok,” ibag.

²⁵”Hunundaman honori fahet honolok haruk lahebon sembahyang uk oho lit in amuhupteg henembolma umbusuhup. Henembolma umbusuhupmu Hinikni poholmonen oho hiren siyag ane turuk lahebon ari ambolma umbusuhu.

²⁶Henembolma umbusuhup fugmu Hinikni poholmonen oho hiren siyag ane turuk lahebon eke ambolma umbusuhu fug,” ulug hiyag isibag.

²⁷Ari ibareg Yesus otsi men nin o Yerusalem libag. Libareg Allah ibam kibareg weregma Allah ibam ngi inap onowesi men Musa wene onoluk inap men Yahudi inap onowesi men Yesus ambeg watfag.

²⁸Watfareg, ”Nungge famen hine atikinteg turuk lahen? Haren turuk lahen ane aru san hineyap haptisimu mun ane man ane turuk lahen?” ulug kapal hibag.

²⁹Ari ulug kapal hibagma Yesusen, ”Anden oho hit hunubam il misig kapal hisamin. An nele atog walihipmu nineyap naptisiyon ari fahet Anden oho fag toho hiyag hisamin,” ibag.

³⁰”Ap ikma pilap eneptuk latisi ahun Yohanes ino Allahn monde fik waharisi ano, we aben monde ferusa ano, hiren oho hiyag nemek,” ibag.

³¹Ari ibagma it enele enemu sahaltuk lit, ”Allahn monde fik waharisi ulmu Aren te, ’Nungge fahet ele holtikip fug?’ ulug nit nunubam imisi,” pibag.

³²”Aben monde ferusa ila angge famen ap winonen pet nenebuk nowen ulug nenekol,” ibareg enele eleg angge welatfag. Ap obog toho arimanowen Yohanes ino fahet Allahn uruk latisi ane hiyag nisaruk latisi peruk latfag. Ari peruk ulug nenekol pibag.

³³Nenekol peruk lit Yesus fam, ”Nenepeleg,” ibag. Nenepeleg ibagma Yesusen, ”Nenepeleg ehepma An nineyap naptisiyon ino fahet oho hiyag hisamin fug,” ibag.