Read Angguruk Yali MARKUS 15 Bible Online

MARKUS 15 - Angguruk Yali bible

MARKUS 15

¹Likiyamon it Allah ibam ngi inap onowesi men ap suwon men Musa wene onoluk inap men it ap suwon eneg luhal atfareg enele sahaltuk latfareg Yesus inggik hele waroho hondoholug libareg Pilatus ap suwon ino ambeg libag.

²Ambeg libagma Pilatus inowen, ”Hat Yahudi inap onowe suwon welahen?” ulug umung hibagma Yesusen te, ”We ehen,” ibag.

³Ehen ibagma Allah ibam ngi inap onowesi arimanowen, ”Aren siyag-siyag ane eneg turuk,” ulug Pilatus hiyag utuk latfag.

⁴Hiyag utuk latfagma Pilatusen Yesus fam, ”Enele urukon atog wamihin fug? Hat hubahet siyag-siyag ane eneg turuk ulug urukon holtuk lahen fug?” ibag.

⁵Holtuk lahen fug ibagma Yesus ele uk fug angge welatfagma Pilatus akol hibag.

⁶Wam Paskah esetuk latfag sul Yahudi inaben hun Pilatus ino fam ap inggik hele waroho foroho latfahon arimano misig nit lol nisimin ulug heng teheg tirikim aren wam Paskah naruk sambil ino li waharukon fam misig-misig lol eseheg turuk latfag.

⁷O ino sambil ap eke unuk te Barabas inowen sehen seneg inap min tog aptuk lit ap eke pinggi ware fisibagma ori men ininggik hele waroho fer enesug latfag.

⁸Fer enesug lit weregma Pilatus ambeg Yahudi inap anggolo libareg, ”Ap winon lol nisaruk latikin hag toho yoho eke misig lol nisamihin,” ulug heng tibag.

⁹Heng tibagma Pilatusen Allah ibam ngi inap onowesi enehummu siyahen Yesus inggik hele waroho walug wahasa ulug undaman oluk atfareg, ”Yahudi inap onowe suwon tu lol hisaminen uruk lahep?” ulug kapal isibag.

¹⁰

¹¹Kapal isibagma Allah ibam ngi inap onowesi arimanowen ap unubam milal eneptuk lit, ”Barabas lol nisimin iyek,” ulug enele ine roho ap hiyag isaruk latfag.

¹²Ari uruk latfagma Pilatusen, ”Yahudi inap onowe suwon tu uruk lahebon ubam nangginoho timin, hiren hiyag nemek,” ibagma

¹³enele hum toho uruk lit, ”Yesus aru e fam telmihin,” uruk latfag.

¹⁴Uruk latfagma Pilatusen, ”Siyag ane nungge tirisimu uruk lahep,” ibagma iren enele obog toho uruk lit, ”Telmihin,” uruk latfag.

¹⁵Telmihin eneg uruk latfagma Pilatusen Yahudi inap enehiyehap timin pibareg Barabas ino lol isibareg, ”Yesus ware feselihipteg e fam teltihiben hondoholug aliyek,” ulug amingmingangge fam hiyag isibag.

¹⁶Ibagma sehen seneg inaben Pilatus ibam owahalma silimu Yesus hondoko imbik libareg sehen seneg inap obog toho maniyek ulug wol enepfareg

¹⁷Yesus sum huluwon ap suwon asum ulug wan tibisibareg hele alog ahele sehene hag toho mase roho unggulmu kolog tibisibag.

¹⁸Kolog tibisibareg ele ying turuk lit, ”Ninikni, Yahudi inap inikni suwon Hat,” ulug inggaliyap turuk latfag.

¹⁹Inggaliyap turuk lit e paleg fam unggul arap heheg watuk lit wasubag ubam sup heheg alukema hur atuk lit ninikni ulug hi ruruk lit inggaliyap turuk latfag.

²⁰Inggaliyap turuk latfareg sum huluwon ino nonggole fisibareg inggareg asum wan tibisibareg e fam teltul ulug hondoholug libag.

²¹Hondoholug larukmen ap eke Kirene ahun misig unuk te Simon Aleksander men Rufus men inikni ino kema salkal ibag. Salkal ibareg Simon ino sehen seneg inaben senetfareg, ”Yesus teltul ahen tu ha rin,” ulug unggulmu ha ribisibareg hondoholug libag.

²²Hondoholug laruk latfareg Golgota silimu libag. Sili ari it enele roho Golgota, nit nenele roho unuk te ”Ap unggul uwag sili” welatfag.

²³Sili ino fam libareg sig turuk angge men ik anggur ahaluwe min mangno roho namisimu il fulug tukag ulug Yesus hinang itfag angge famen imbisibag.

²⁴Imbisibagma Yesus ino e fam telfag. Telfareg Yesus asum huhul kul ulug, ”Tu san hilamisi ari san hilamisi,” ulug enehangge hik tibag.

²⁵Likiya mo lahik waharikim Yesus e fam telfag.

²⁶Telfareg Yesusen Yahudi inap onowe suwon An welahi uruk latisi ane fahet ware fesehe ulug, ”Yahudi inap onowe suwon tu,” ulug At unggul palimu hahare fibag.

²⁷Hahare fibareg ap piren eke ap hirako unusil noruk latfahon itano e fam Yesus men ambiyeg tel eneptuk lit misig inggik pikit fil, misig inggik hare fil tel enepfag.

²⁸Tel enepfag ane ari fahet atam haharoho imbibahon aru, ”At ino siyag ane til noruk inap men ambi roho wereg,” ulug haharoho imbibahon ari hikir atfag.

²⁹Tel enepfagma la wam turuk inap arimanowen unum hilik tibareg, ”Yoho, Allah ibam aru halog tuhukteg o hinahanam wuruhuk uruk latikin angge

³⁰Hat hamuwen windat talug e ari fene wambik ma,” ulug Yesus inggaliyap turuk latfag.

³¹Yesus inggaliyap turuk latfagma Allah ibam ngi inap onowesi men Musa wene onoluk inap arimano menen oho, ”Ap winon hihir eneptuk latisi angge famen inggareg hihit ta fug teg,” ulug inggaliyap turuk latfag.

³²”An Israel inap ler enebuhuk uruk latisiyon ino Israel inap onowe suwon niren yet hulteg tem toho irisi pulen e fene wambik wamag,” uruk latfag. Uruk latfagma it piren Yesus min ambimu e fam tel enepfahon itanowen oho Yesus inggaliyap turuk latfag.

³³Inggaliyap turukmu mo anum pulmu weregma o mondabi obog toho hup atfareg fobik mo haya ririkim sakan tibag.

³⁴Mo haya regma Yesusen it enele roho, ”Eloi, Eloi lama sabak tani,” ulug ele hi roho ibag. Ibag ane ari nit nenele roho, ”Allah, Allah, nungge fahet An numbahalug lahenteg hiraho lit welahen?” ibag.

³⁵Ari ibagma ap welatfahon arimanowen hol hibareg, ”Holeg lamok, Elia wol turuk,” uruk latfag.

³⁶Ap ekeyen usande nuruhum hahon wak libareg anggur ahaluwe olokon sehelimu kila fibareg fili yaron fam hak tibibareg Yesus namisi ulug ambilikmu lahabe fibag. Lahabe fibagma, ”Yoho, Elia inowen At lisoho pilabe fik watnisiyen yet hul,” uruk latfag.

³⁷Ari urukmu Yesus ele hum toho uruk lit war atfag.

³⁸Yesus war atukmu itano Allah ibam sum kebunggalma latuk asum pul ke pilang tibisik wambik watfag.

³⁹Sehen seneg inap onowe misig Yesus iraham unduhuk lit welatfahon inowen Yesus ari roho war atukmu yet hibareg, ”Yoho, ap aru tem toho Allah amloho war aha,” ibag.

⁴⁰Yesus war atukmu hiyap anggolowen yatman yet teg latfag. Hiyap yet teg latfahon arimano enesehelimu welatfahon Maria o Magdala hiyap ino men, Yakobus toron ino men Yoses ino men inisinga Maria men, Salome men itanowen yer enesug latfag.

⁴¹Yesus Galilea weregma hiyap itano At amingmingangge hag toho wereg lit let turuk latfag. Yesus Yerusalem larikim hiyap anggolo ombolim libahon arimano oho wereg latfag.

⁴²Sono sembahyang uhuk ulug weregman hup atfagma

⁴³ap eke Arimatea ahun unuk Yusuf watfag. At ino Yahudi inap onowe sehelimuwon eke welatfag angge famen Allah ap obog toho Inikni aruhu ulug indi wenggel haruk lit welatfag. Sono sembahyang uhuk sambil welamuhuk ulug Pilatus ambeg akol eleg toho libareg, ”Yesus ebe warehon pilabe fik lamin,” ulug Pilatus fam heng tibag.

⁴⁴Pilatus fam heng tibagma Pilatusen ketiya telehesa angge famen folo-folo war aha pibareg, ”Sehen seneg inap onowe ino kapal haminen watnisi,” ulug wol tibag. Wol tibagma watfagma, ”Fahe war aha ano, horog ketiya war aha ano,” ulug umung hibag.

⁴⁵Umung hibagma sehen seneg ahun inowen, ”Fahe war aha,” ulug hiyag itfagma Pilatusen Yusuf fam, ”Ebe warehon ino hilalug lamihin,” ibag.

⁴⁶Hilalug lamihin ibagma Yusufen sum yanggowon fanowon onggo paloho wak libareg Yesus ebe warehon e fene pilabe fibareg sum ino fam yinggiloho owik eke ap warehon kila feruk ambeg kila fibag. Kila fibareg helep humon imbiloho owik elma lare fisibag.

⁴⁷Lare feserikim hiyap Maria Magdala hiyap ino men Yoses isinga Maria menen Yesus emberukmu yet hibag.