Read Angguruk Yali MARKUS 16 Bible Online

MARKUS 16 - Angguruk Yali bible

MARKUS 16

¹O sembahyang uruk sambil welatfareg hup atfagma Maria o Magdala hiyap ino men, Yakobus isinga Maria men, Salome men itanowen Yesus ebene are ribik lahuk ulug ahaluwe fanowon onggo paloho wak libag.

²Wak libareg noholug likiyamon te hubet mo yatma waharikim sembahyang ibahon likiyamon ino owik Yesus kilapfag ambeg ino libag.

³Kema laruk lit, ”Owik elma helep humon werehon ari san miyal nisamisi,” il laruk latfag.

⁴Laruk lit yet harukmen helep humon ino imbiloho ilanma weregma owik husigmu yet hibag.

⁵Owik husigmu yet hibareg iraham libareg inggik pikit fil ap kabiniyon eke sum yanggowon yaron wan toho heriyegma hibareg yuk libag.

⁶Yuk libagma ap inowen, ”Nungge fahet yuk lahep. Yesus Nazaret ahun e fam teltuson ino yami rik wahebon an noluk. At te oluk aha, tuma wereg eleg. At emberusa ambeg tuma ha maniyek,” ibag.

⁷”At tam o Galilea lahu. O Galilea umuno lahupteg Yesusen irisi ane roho At weregma hahup. Otsi Petrus men ori winon men weregma lalihipteg unubam ari ehek ulug hiyag isa lalihip,” ibag.

⁸Hiyag isa lalihip ibagma enekolen inindi pong-pong angge ril folo-folo owik embeselug hirag-hirag libag. Libareg enekolen ap unubam tot hiyag isa fug angge welatfag. Welatfareg hiyap itano Petrus men otsi winon men enembeg libareg, ”Malaikat yet heheyon inowen ari-ari ehek,” ulug hiyag isibag. Hiyag isibagma Yesus inggareg ebenam atfareg, ”Allahn ap kinangmon mondabi fanowap enebuhuk ulug wene fanowon eleg am fuhon ino o yalimu hubulama hiyag isa laruk lamuhup,” ulug otsi hiyag isibag.[2]

⁹[3] Sembahyang ibag sambil likiyamon hubet Yesus oluk atfareg Maria o Magdala hiyap ino iline atam ebenam atfag. Hiyap ino atam siyag angge enebe sabiren undama weregma Yesusen yanggaloho wili fisibag hiyap ino iline tam ebenam atfag.

¹⁰Ebenam atfagma ap Yesus min tam welatfag inap itano enehummu siyahen uba yatuk lit weregma enembeg libareg, ”Yesus oluk ahama yet hihi,” ulug hiyag isibag.

¹¹Yesus oluk ahama yet hihireg welahi ibag ane ari hol hibag angge famen ele si ehek peruk latfag.

¹²Tot welatfareg Yesus otsi piren o pumbuk eke lul ulug kebunggalma larukmu Yesus ap amuwon hag toho ebenam atfagma yet hibag.

¹³Yet hibareg suhuloho libareg otsi winon fam, ”Yesus oluk ahama hehe,” ulug hiyag isibagma iren oho enele si ehesa peruk latfag.

¹⁴Welatfareg Yesus otsi nanggoloben suburu narukmu Yesus ebenam atfag. Ebenam atfareg, ”Nori, Nonowe oluk ahama yet hehe ehesa angge famen hiren nungge fahet enele si ehesa peruk lit hinindi sohu roho welahep,” ulug per enepfag.

¹⁵Per enepfareg, ”O munon-manon indit-indit werehon enembeg lahupteg ap munon-manon wene fanowon hiyag isahup.

¹⁶We tem peruk lamuhubon ikma pilap enebuhupmu Allahn fanowap enebuhu. Enele si peruk lamuhubon arimano fam Allahn lukuram uhureg siyahap enebuhu.

¹⁷We tem peruk lamuhubon arimanowen turuk lamuhubon fahet tu hiyag hisamin: An nunuk uruk lit ap unundama siyag angge werehon yanggaloho wili feseruk lamuhup. Ap enele wal taneg urukon holtuk lamuhup.

¹⁸Pisanggowen fato eneptukmu war amuhup fug. Aben narukmu war atuk angge nahup halug war amuhup fug. Ap ouk warukon ininggiken ki isahupmu fano amuhup,” ibag.

¹⁹Nonowe Yesusen otsi unubam ari hiyag isibagma Allahn Yesus poholman lisoho wibag. Wibagma Allah inggik pikit fil hur atfag.

²⁰Onowe poholma lahibagma Yesus otsi mun ibam man ibam libareg wene fanowon hiyag isaruk latfag. Hiyag isarukmu Yesusen it ler eneptuk lit weregma ap wene holukag ulug ouk warukon hihir eneptuk lit fano ane turuk latfag.