Read Angguruk Yali MARKUS 2 Bible Online

MARKUS 2 - Angguruk Yali bible

MARKUS 2

¹Farema hup pirenam hinahanam welatfareg Yesusen nin o Kapernaum kik watfareg weregma ibam waha urukmu hol hibareg

²ap anggolo luhal arik watfag. Olma luhal arik watfareg keleg ibareg sokolma luhalegma wene hiyag isaruk latfag.

³Hiyag isaruk lit weregma ap uhanen ap uyug siyahon eke Yesus ambeg paya roho walug watfag.

⁴Walug watfareg kim harukmen ap anggolo keleg tehen nangginoho walug kul fug ulug unggama lahibareg Yesus unggul ke ungga piyar isibareg uyug siyahon ilit heniyeyer angge hele fam ililoho pilabe fibag.

⁵Pilabe fibagma Yesusen fuki roho kim hibareg Anden hihit nisamisi ulug unundaman pehesareg walug wahasa pibareg uyug siyahon ino fam ele uruk lit, ”Namloho, haren siyag ane tirikinon ino Allahn ambolmayap tehekma eleg aha,” ibag.

⁶Ari ibagma Musa wene onoluk inap heriyeg lit welatfahon itanowen,

⁷”Ehek ane ari nungge fahet ehek, Allah fahet abug ehek,” pibag. ”Aben siyag ane turukon ari re Allahn eneg eleg aha uk teg,” ulug unundaman peruk latfag.

⁸Unundaman ari peruk latfag ane Yesus oho undaman oluk atfareg, ”Hit hunundaman anden uk fug teg peruk lahep ane ari nungge fahet peruk lahep?” ibag.

⁹”Ap uyug siyahon aru fam nungge ihi ha reg, ’Siyag ane tirikinon Allahn ambolmayap tehekma eleg aha,’ ihi ha reg? ’In amin, heniye seneko lamihin,’ ihi ha reg lahi?” ulug it ap welatfahon unubam umung isibag.

¹⁰”At ap atfahon inowen ap kinangmonen siyag ane turukon ari Allahn ambolmayap tehekma eleg aha uk hag teg ane ari honoluk amag,” ibag.

¹¹Honoluk amag ibareg ap uyug siyahon ino fam, ”Hat in amin, halit heniye ki rimihinteg hibam lamihin ulug hubam uruk lahi,” ibag.

¹²Hat hubam uruk lahi ibagma ap ino in atfareg alit heniye seneko wilip atukmu ap obog toho arimanowen yet hibag. Yet hibareg it enekolen Allah wel turuk lit, ”Ap winonen oho ari roho hihitukon isarukuk fug,” uruk latfag.

¹³Welatfareg Yesus ik Galilea yenggelehon ayegma libag. Libagma ap anggolo Yesus ambeg watfagma wene hiyag isaruk latfag.

¹⁴Wene hiyag isibareg larukmen Alfeus amloho Lewi ap unubam uang heng toho emberuk ibam heriyeg lit weregma Yesusen yet hibag. Lewi ino pemerintah amingmingangge uang embelug lalihip uruk ahun welatfag. Weregma Yesusen yet hibareg, ”An min ambiyeg lulen ma,” ulug wol tibagma Yesus men ambiyeg libag.

¹⁵Ambiyeg libareg hun Lewi ino ibam kibareg suburu naruk lit weregma pemerintah amingmingangge uang embelug lalihip uruk inap anggolo roho, siyag ane turuk inap anggolo roho Yesus otsi men weregma kibareg ambiyeg olma suburu naruk latfag. Ap anggolo arimano Yesus men ambiyeg libareg kibag.

¹⁶Kibagma Farisi inap Musa wene onolukon arimanowen pemerintah amingmingangge men siyag ane turuk inap men Yesus min suburu narukmu yer isibareg, ”Yesus men suburu naruk inap aruma pemerintah amingmingangge uang embelug lalihip uruk inap min siyag ane turuk inap min nungge fahet suburu ambiyeg naruk,” ulug otsi unubam ari ibag.

¹⁷Otsi unubam ari urukmu Yesusen hol isibareg, ”Ap fano werehonen ap ekeyen hihit nenebukag peruk eleg, ouk waruk inap inindimuwen ap ekeyen hihit neneplep peruk,” ulug ele indit toho hiyag isibag. ”Fano ane turuk inap wol enebuhuk ulug waharikik fug, siyag ane turuk inap wol enebuhuk ulug waharikik,” ibag.

¹⁸It Yohanes otsi men Farisi inap men sembahyang uk oho lit suburu hiyang welatfag. Hiyang welatfagma ap winon Yesus ambeg watfareg, ”Yesus, Yohanes otsi men Farisi inap onotsi men sembahyang uk oho lit it suburu na fug anggeyen hiyangangge wereg. Hiyangangge weregman Hat hotsi nungge fahet sembahyang uk oho lit suburu naruk,” ulug umung hibag.

¹⁹Umung hibagma Yesusen, ”Hiyap ikni isingan wam hop turukon ino ori isag isaruk halug ori itano wam na fug angge hiyangangge welam teg? Wam isag isalug hiyangangge welam fug teg,” ulug ele indit toho hiyag isibag.

²⁰”Ari turuk ahun ino fobik aben hondoko longgo uhup. Hondoko longgo uhup sambil ino eneg ori itano hiyangangge welamuhup,” ibag.

²¹”Sum obog kiririp teg asum hekel keron fam seleben tuk fug teg. Seleben tuhupmu hekel keron weregman miningon tararag tuhu,” ulug ele indit toho ibag.

²²”Ik eleruk fano ahik ino ikag onggorik sog tohon fam hinangguk fug teg. Hinanggurukmu ik onggorik sog teg keyen wamburuk lit ik eleg atuk. Ik eleruk fano ahik ino ikag fanowon fam hinangguk teg,” ulug ele indit toho ibag.

²³Misihim sambil sembahyang uruk sul hari Sabat Yesus otsi men suburu inggilama laruk latfag. Laruk lit roti anggen ondomi keyon Yesus otsiyen lol til laruk latfag.

²⁴Lol til larukmu Farisi inaben yer isibareg Yesus fam, ”Yesus, sembahyang uruk sul welahe angge famen hotsi aruman nungge fahet tuk fug teg ane turuk,” ibag.

²⁵Ari ibagma Yesusen, ”Daud men welatfag inap itanowen suburu obok teg lahe ulug tibag ane ari suwesingga fam haharoho imbibahon irikip fug?” ibag.

²⁶”Hun Abyatar ino Allah ibam ngi inap onowe suwon welatfagma Allah ibam ino kibareg suburu roti Allah fahet imbibahon itano nibag. We Allah ibam ngi inap itano eneg suburu roti ari na reg angge famen Dauren nibareg at men watfahon eke kur isibag ane fahet suwesingga fam haharoho imbibahon irikip fug?” ulug umung isibag.

²⁷”Allahn sembahyang uruk sul o sabit ari kel taruk lamuhup pibag. Inindi anggin toho welamuhup pibag fug. Sembahyang uruk sul o sabit ari ap enehiyeg toho welamuhup pibag,” ulug Yesusen hiyag isibag.

²⁸”Sembahyang uruk sul ari we At ap kinangmon atfahon inowen eneg ngi reg lit wereg,” ibag.