Read Angguruk Yali MARKUS 3 Bible Online

MARKUS 3 - Angguruk Yali bible

MARKUS 3

¹Misihim sambil Yesus sembahyang uruk ibam kibag. Kurukmen ap inggik siyahon eke welatfag.

²Welatfagma ap winon welatfahon arimanowen, ”Yoho sembahyang uruk sul hari Sabat wereg lit mun ane man ane tuk fug teg angge famen Yesusen ap aru hihitnisi ano?” ulug kilap haruk latfag. Hihituk halug niren alem ubam umbuhuk peruk latfag.

³Ari peruk lit weregma Yesusen ap inggik siyahon ino fam, ”In atug pulmu tiya ma,” ibag.

⁴Ari ibareg Yesusen it unubam kapal isaruk lit, ”Sembahyang uruk sul welahe angge famen siyag ane turuk lit fano ane tuk fug teg? Ap unusuk teg ano, windar enebuk teg ano?” ulug umung isibagma it enele eleg angge welatfag.

⁵Enele eleg angge welatfagma Yesusen ap welatfahon arimano walinggoho kim isibareg undaman ap aruma sohu ane eneg turuken nundama siyag peruk lahi pibareg inggik siyahon ino fam, ”Hinggik pok himin,” ibagma inggik pok hibagma fano atfag.

⁶Fano atfagma Farisi inap welatfahon arimano folo-folo wilip atfareg Herodes otsi men mangno roho luhalfareg Yesus nangginoho wabuhuk ulug enele sahaltuk latfag.

⁷Welatfareg Yesus otsi min ik yenggelehon ayeg ke larukmu Galilea inap anggolo luhalfareg ombolim laruk latfag.

⁸Libareg weregma Yudea inap men Yerusalem inap men Idumea inap men, ik Yordan fumag fil inap men, Tirus inap men, Sidon inap men it arimanowen, ”Yesusen mun ane man ane turuk latisi,” urukon hol hibareg luhaloho At ambeg kik waharuk latfag.

⁹Waharuk latfagma Yesusen ap anggolo hihir enepfagma ap anggolo ouk warukon ap iming isil Yesus ebe nininggiken ki hul ulug kuruk latfag. Kuruk latfagma Yesusen otsi fam, ”Ap anggolo aruma nambeg kik waharuken kou fam ik ahum ke lulen kou misig niraham imbik maniyek,” ibag.

¹¹Imbik maniyek ibagma siyag angge unundama werehon arimanowen Yesus hibareg alukema hur atfareg enele hum toho, ”Hat te Allah amloho,” uruk latfag.

¹²Ari uruk latfagma Yesusen, ”At Allah amloho ulug ap iniline fag toho hiyag isa fug,” ulug ele ine roho komo enepfag.

¹³Fobik punumu lahibareg wereg lit ap winon hondog enepmin pibareg wol enepfagma ambeg luhal arik watfag.

¹⁴Ambeg luhal arik watfagma ap nisanggowen An men wereg lit Allah wene ap hiyag isa lahuben mon enebuhuk ulug in enepfag.

¹⁵”Siyag angge ap unundama werehon yanggaloho wili feseruk lamuhup,” ulug otsi enele ineyap enepfag.

¹⁶Ap nisanggowen An men welamuhuk ulug in enepfahon ununuk te, ”Simon hunuk eke Petrus welaruhun,” ulug unuk suwalfag.

¹⁷Zebedeus amlohoki Yakobus men ot Yohanes men unubam, ”Hit hununuk Boanerges nit nenele roho ululu umalikisi suwal henebihi,” ibag.

¹⁸Nin eke Andreas men Filipus men Bartolomeus men Matius men Tomas men Alfeus amloho Yakobus men Tadeus men Simon Zelot ahun men

¹⁹Yudas Iskariot ino Yesus wabukag ulug huruwe libahon ino men wol enepfag.

²⁰Welatfareg Yesus ibam watfareg weregma ap anggolo ambeg luhal arik watfag. Ap anggolo luhal arik watfagma Yesus otsi men suburu na fug teg latfagma

²¹Yesus isinga men otsi yuhon menen suburu na fug teg lit wereg urukon hol hibareg nenek turuk pibareg, ”Lulteg inggik seneko hondoholug wamul,” ulug ambeg libag.

²²Larukmen Musa wene onoluk inap arimano o Yerusalemen ilihig watfareg, ”Setan onowe suwon Beelzebul ino Yesus undama kirisireg ele ineyap turukmu ap unundama siyag angge werehon heneko wilip eneptuk,” uruk latfag.

²³Ari uruk latfagma Yesusen, ”An nambeg tiya maniyek,” ulug wol enepfareg ele indit toho hiyag isaruk lit, ”Iblis ekeyen te Iblis eke nangginoho yanggaloho wili fusuk teg,” ibag.

²⁴”O pumbuk misig inaben seli roho wereg lit fano welam fug teg,” ibag.

²⁵”Ap yowi misig inaben seli roho wereg lit fano welam fug teg,” ulug ele indit toho hiyag isibag.

²⁶”Ari hag toho Iblis inowen inggareg wat taruk lit hili roho wereg halug fano welam fug teg, siyag aruhu.

²⁷Ap ekeyen olok ahun anggengge anden taluk tamin peruk halug ngi ahun ino weregma ibam kuk fug teg. We inggik hele ware felug eneg ibam kuk teg, inggik hele ware felug eneg aren tohon taluk toho hila reg,” ulug ele indit toho hiyag isibag.

²⁸”Aben siyag-siyag ane turuk halug Allahn ambolmayap turuk lit elehap tuk teg. Allah fahet abug uruk halug ari eke ambolmayap turuk lit elehap tuk teg,” ibag.

²⁹”We Allah hime fanowon fahet abug uruk ahun ino mondabi fano am fug teg. Ari uruk ahun ino mondabi siyag ane ehek ulug at mondabi siyahap tuhu. Ari we tem toho uruk lahi,” ibag.

³⁰Ap arimanowen, ”Yesus undama siyag angge wereg,” uruk latfag ane fahet Yesusen ari ulug hiyag isibag.

³¹Hiyag isarukmu Yesus isinga men otsi yuhon men watfareg selma wereg lit Yesus nit nenembeg wilibig watnisiyen hiyag itlihip ulug hiyag isibag.

³²Hiyag isibagma ap anggolo Yesus walinggoho heriyeg latfahon arimanowen, ”Yesus, Hat hisinga men hotsi men selma wereg lit wol haptuk,” ibag.

³³Wol haptuk ibagma Yesusen te, ”An nisinga notsi sa men fahet ehep?” ibareg

³⁴ap walinggoho heriyehon kim isaruk lit, ”An nisinga men notsi men tuma wereg,” ibag.

³⁵”Allahn peruk ane hikit toho turuk inap fahet eneg An not An nerek An nisinga ihi ha reg,” ibag.