Read Angguruk Yali MARKUS 5 Bible Online

MARKUS 5 - Angguruk Yali bible

MARKUS 5

¹Ik yenggelehon ahum pali keyen o Gerasa inap wereg ambeg nindig atfag.

²Nindig atfareg kou famen wilip atfareg larukmen ap eke undama siyag angge setan wereg ahun misig ap warehon kilap eneptuk owik itano famen Yesus ambeg watfag.

³Ap ino ap warehon kilap eneptuk owik ino fam welatfag. Welatfag ahun ino aben hele kumbi ineyon fam oho inggik pug toho umbuk fug teg latfag.

⁴Aben inggik uyug ke hele pug turuk latfag angge famen inggik hele pug tibahon ino sipuk isaruk lit uyugmu pug tibahon oho tag isaruken ap misihen oho senebuk fug teg latfag.

⁵Hup hunduhuk unukoho hunduhuk ap warehon kilap eneptuk owik ino fam wereg lit punumu lahalug ngi hum uruk lit helep fam inggarehen wat taruk latfag.

⁶Ari turuk latfag ahun inowen Yesus larukmu yatma yet hibareg ambeg watfareg Yesus alukema hur atfag.

⁷Hur atfareg ele hum toho uruk lit, ”Yesus, Hat Allah poholmon amloho an nubam hele nungge imin ulug wahen? An nuwatmin ulug wahen angge famen Allahn hol nasug lit weregma nuwatmihin fug uruk lahi,” ibag.

⁸Yesusen atam, ”Setan hat siyag. Ap tu undaman welahenon wilip amin,” ibagma hun inowen ibag ane ari uruk latfag.

⁹Uruk latfagma Yesusen, ”Hat hunuk sa,” ibagma setan inowen, ”Nunuk Legion, nenebe luhaloho welahe,” ibag.

¹⁰Luhaloho welahe ibareg, ”Nit tuman yanggal nenepmihin fug,” ulug Yesus fam heng tibag.

¹¹Kono ke arimano wam anggolo wereg lit kinang hilaruk latfag.

¹²Welatfagma setan arimanowen, ”Wam unundama kulen Haren kiyek in,” ibagma, ”Kiyek,” ibag.

¹³Kiyek ibagma setan arimano ap ino undaman wilip atfareg wam unundama kibag. Kibagma wam arimano pule keyen hik-hik ikma wambibareg ik ahum keyen war atuk latfag. Wam teng-teng angge 2.000 arimano war atfag.

¹⁴War atfagma wam foroho latfag inap arimano libareg onori olma welatfahon men yabukmu welatfahon men unubam hiyag isaruk lit, ”Nenembohom war ahasa,” ulug yonggo libag. Yonggo libagma nangginehekma wam war ahasa ulug Yesus weregma isa watfag.

¹⁵Isa lul ulug waharukmen ap ino setan anggolo undama weregma nenek turuk latfahon ino indi pikir atfareg sum wan teg lit Yesus men heriyegma yet hibareg enekol hibag.

¹⁶Enekol hibagma hihitukmu yet hibahon itanowen ap ket watfahon fam, ”Nenek turuk ahun Yesusen ari roho hihirehekma wam ari roho ikma kehesa,” ulug hiyag isibag.

¹⁷Hiyag isibagma it arimanowen Yesus fam, ”Hat nit min tuma welatnihin fug, lamihin,” ulug pet tibag.

¹⁸Pet tibagma Yesus lamin ulug kou fam kurukmu ap nenek turuk latfahon inowen te, ”Hat men welamuhuken ambiyeg lul,” ibag.

¹⁹Ari ibagma, ”A, ambiyeg lul fug, hat hibam tuma wereg lit Ninikni Allahn an indi neyehekteg hihit nabehek ulug hori hiyag isil noruk laruhun,” ibag.

²⁰Ari ibagma o pumbuk numen itano o eke la o eke la turuk lit, ”Ari roho hihit naptisi,” ulug hiyag isaruk latfagma ap arimano enekol hibag.

²¹Welatfagma Yesus nin suhuloho kou fam nindihig watfareg ik yenggelehon ayegma weregma ap anggolo luhalik watfag.

²²Luhalik watfagma ap misig sembahyang uruk ibam ngi ahun unuk te Yairus watfag. Watfareg Yesus weregma kim hibareg alukema hur arik watfareg,

²³”Nahaloho ouk waruk lit war arik oho turuken hinggiken ki hamihinmu fano atnisireg oluk welaruhuwen ambiyeg lul,” ulug Yesus hiyag itfag.

²⁴Hiyag itfareg Yesus men ambiyeg larukmu ap anggolo arimano ombolim miyaloho laruk latfag.

²⁵Miyaloho larukmen hiyap eke welatfahon Yesus ambeg watfag. Hiyap ino mep wilip atukmen eneg mo ilig am wirig am turukmu nisanggowen atfag.

²⁶Mep wilip atukmen hal inap anggolowen hihitukmu aren angge obog toho arimano onggo og isibag angge famen hiyap ino fano am fug angge ouk ino anggin atfag.

²⁷Hiyap inowen hol harukmen Yesusen ap hihir eneptuk urukon hol hibareg watfareg ap iming isil iming isil Yesus ambolma watfareg Yesus asum inggiken tung hibag.

²⁸Asum tung haminteg fano atnin pibareg tung hibag.

²⁹Tung hibagma mep ino palfagma hibareg undaman fano ahi peruk latfag.

³⁰Fano ahi peruk latfagma Yesusen nubam eneg tehekma ketiya ap eke hihirihi pibareg hebeloho ambol fil yet hibareg, ”Nasum san tung neyehek?” ibag.

³¹San tung neyehek ibagma otsiyen, ”Ap anggolo aruman miyal haptuk lahason isaruk lahen fug? Nasum san tung neyehek ulug nungge fahet ehen?” ibag.

³²Ibagma Yesusen san tung neyehek ulug hebeloho ambol fil kim hibag.

³³Kim hibagma hiyap inowen an hihit nabehek ulug undaman pibareg akolen uwag elek-elek angge turuk lit alukema hur atfareg, ”An hihit nabehen,” ulug fag toho hiyag itfag.

³⁴Hiyag itfagma Yesusen, ”Nahaloho, hat hindimuwen hihit napmisi pehenon ariyen fano ahen, mep wilip atukon ari mondabi palehekma hindi se roho lamihin,” ibag.

³⁵Enele urukmu itano sembahyang uruk ibam ngi ahun ino amingmingangge piren hinahan watfag. Watfahon itanowen Yairus fam, ”Nit nonowe wene hiyag isaruk ahun aru nungge fahet hondoholug lamihin. Hahaloho mondabi war aha,” ibag.

³⁶War aha urukmu hol hibareg Yesusen sembahyang uruk ibam ngi ahun ino fam, ”Hakol ha fug, An nubam wenggel haruk lit hindi se roho welamin,” ibag.

³⁷Ari ibareg ap obog toho arimano unubam pok amek ibareg we Petrus men Yakobus men Yakobus ot Yohanes men unubam, ”Hit eneg ambiyeg lul,” ibareg hondog eneplug libag.

³⁸Libareg sembahyang uruk ibam ngi ahun ino ibam larukmen ap anggolo luhaloho wereg lit enele anggolo uruk lit ngi hum uruk lit uba yatukmu kim isibag.

³⁹Kim isibareg, ”Nungge fahet henele ngi hum uruk lit uba yatuk lahep? Malik ari war aha fug, nohoruk lit wereg,” ibag.

⁴⁰Yesusen ari ibag ane fahet ap arimano inda yatuk latfag. Inda yatuk latfagma hit obog toho selma wilip amek ulug yanggal enepfareg we malik aru ikni men isinga men at min watfahon itano men eneg malik ino yinggig ambeg it itano hondog eneplug kibag.

⁴¹Kibareg malik ino inggik sen haruk lit it enele roho, ”Talita kum,” ibag. Ibag ane ari nit nenele roho, ”Malik tu in amin!” uruk.

⁴²In amin ibagma malik ino in atfareg laruk latfag. Malik ino indag tibag sali mo ilig am wirig am turukmen nisanggowen atfag. Malik ino oluk atfagma ap arimano enekol hibareg yihi uruk latfag.

⁴³Uruk latfagma Yesusen, ”Hihirihi ane ari fahet ap hiyag isa fug,” ulug ele ine roho komo enepfareg, ”Malik aru suburu og emek,” ibag.