Read Angguruk Yali MARKUS 7 Bible Online

MARKUS 7 - Angguruk Yali bible

MARKUS 7

¹Welatfagma Musa wene onoluk inap o Yerusalemen ilihig watfareg Farisi inap men mangno roho Yesus ambeg palu arik watfag.

²Palu arik watfareg Yesus otsiyen suburu roti ininggik umaho eleg angge saliyog narukmu yer isibag.

³Yahudi inap men Farisi inap men obog toho arimanowen inikni umban tibag ane hikit toho suburu enehap umaho eleg angge saliyog naruk eleg.

⁴Mun angge man angge ayeg waroho hilalug nuk oho lit saliyog nul fug ulug ininggik umag talug eneg naruk. Inikni umban ekeyon-ekeyon anggolo tibag ane roho iren oho anggolo turuk. Ikag men kubag men kou men fam saliyog nul fug ulug ik umatuk.

⁵Farisi inap men Musa wene onoluk inap arimanowen, ”Hat hotsiyen nunumbasiyen ibag ane holuk fug anggeyen ininggik ik umaho eleg anggeyen suburu saliyog nungge fahet naruk,” ulug Yesus umung hibag.

⁶Umung hibagma Yesusen, ”Hit hinindi piren teg lahebon hunubahet Yesayan pikit tem toho haharoho imbibag. Allahn hiyag itikim haharoho imbibahon tu hiyag hisamin, ’Ap aruman enembilik fam eneg wel naptuk lit inindiyen An nele embeseruken un ane peruk lit wereg.

⁷Iren we hasabut Ninikni uruk, An nawene hiyag isawon famen aben uruson eneg hiyag isaruk.’ Yesayan indam haharoho imbibahon ari wirim toho hit aruman turuk lahep.

⁸Hit aruman Allahn komo enepfag ane ino embeseruk lit aben ibag ane eneg holtuk lahep,” ibag.

⁹”We hit hininggarehen peruk ane eneg turuk lamuhuk ulug Allahn komo henepfag ane ino sokowa feseruk lahep.

¹⁰Musa inowen, ’Hikni hisinga hindiyen welaruhun,’ ibareg, ’Ikni isinga fam siyag ane uruk ahun ino war aruhu,’ ibag.

¹¹Musan ari ibag angge famen hiren hiniknisi hinisingasi hiyag isaruk lit, ’Hit og hisila angge famen Allah fahet imbihi,’ uruk lahep.

¹²Allah fahet imbihi uruk lahep anggeyen fobik hiniknisi hinisingasi tot og isaruk lahep fug.

¹³Hiren og isa fug angge hit hinindi henemu wenggeltuk lahep ane ariyen Allahn ibag ane ari apmayap turuk lahep. Hiren ari roho anggolo turuk lit likiya hupmu Allah wene siyahap turuk lahep,” ulug Yesusen hiyag isibag.

¹⁴Ari ibareg ap luhaleg latfahon unubam maniyek ulug wol enepfareg, ”An nele fum toho holeg lamek,” ibag.

¹⁵”Mun angge man angge sel fil werehon aben nahupmu siyag amuhup fug. Ap siyahap eneptukon ino mun angge man angge ap inindimu weregma wenggel harukon ariyen eneg siyahap eneptuk,” ibag.

¹⁶Hit hinisanggo wereg halug Anden uruk lahiyon ari fano holtuk lamok.

¹⁷Ap luhaleg latfahon arimano embeselug olma kibagma otsiyen, ”Hele indit toho hiyag esehenon ari nungge fahet hiyag esehen?” ulug Onowe umung hibag.

¹⁸Umung hibagma Yesusen, ”Hit hinindi anggat teg elehon welahep? Mun angge man angge sel fil werehon aben nahupmu siyag amuhup fug ane ari henepeleg toho welahep?

¹⁹Nahup angge ino hinindimu welaruhu fug, we henehummu kuhureg yog men pikit lahu,” ibag. Ari ulug Yesusen mun angge man angge saliyoha fisibag.

²⁰Saliyoha fisibareg, ”Ap unundaman wenggel haruk ane ariyen ap siyahap eneptuk,” ibag.

²¹”Siyag ane ap inindimuwen wenggel harukon aru: Hiyap yarog enebil larukon men, aben tohon hirag tarukon men, ap unusurukon men,

²²ap unuhesi pal tarukon men, ap enenggengge helele perukon men, siyag-siyag ane turukon men, indi piren tohon wenggel harukon men, suburu abuwap tohon men, indimu het teg lit werehon men, ap unubam ele siyag ane urukon men, awelwel tubat tarukon men, indi elehon men alem obog toho ariyen ap siyahap eneptuk.

²³Mun angge man angge siyahon ap unundaman wenggel harukon ariyen eneg ap siyahap eneptuk,” ibag.

²⁴Welatfareg o inowen wilip atfareg o Tirus libareg o misig kibag. Olma kibareg hirako welatnin pibag angge famen At waha ulug ap arimanowen onoluk atfag.

²⁵O ino hiyap eke ahaloho undama siyag angge setan werehon welatfag. Hiyap inowen Yesus wereg urukon hol hibareg Yesus ambeg watfareg alukema hur arik watfag.

²⁶Hiyap ino amu hiyap unggul unuk Yunani ibam Siro-Fenisia hiyap welatfag.[1] Hiyap inowen, ”Siyag angge nahaloho undama werehon ari Haren yanggaloho wili fesemihin,” ulug Yesus fam heng tibag.

²⁷Heng tibagma Yesusen, ”Suburu malik toron ininggikmu werehon iniknisiyen taluk toho mene og isarukon ari siyag. Malik toron tam naruk lamuhup,” ulug ele indit toho ibag.

²⁸Ibagma hiyap inowen, ”Nikni, we tem toho ehen angge famen suburu anggen siyahon maliken pila ferukon mene apma werehonen ondol heheg narukon ari fano,” ibag.

²⁹Ibagma Yesusen, ”Hat hele fano ehenma hibam lamihin. Siyag angge hahaloho undama werehon ino wilip aha,” ibag.

³⁰Wilip aha ibagma isinga ibam libareg kim harukmen ahaloho undama siyag angge werehon ino wilip atfagma heniyema fano roho yinggig lit weregma libag.

³¹Welatfareg o Tirus inowen wilip atug libareg o Sidon keyen tulug ik Galilea yenggelehon ayegma o pumbuk numen wirigmu libag.

³²Libagma aben isanggowet eleyet lareg ahun eke hondoholug watfareg, ”Ninikni, Hat hinggiken ki himin,” ulug hiyag itfag.

³³Hiyag itfagma ap anggolo luhaloho werehen Yesusen ap ino hondoholug amumu anggenma libareg inggik tum isanggoma imbibareg wasubag inggik tummu sup tibibareg ambilikanggenma tung hibag.

³⁴Tung hibareg poholma lahap haruk lit indiyen ngesekum tibareg it enele roho, ”Efata,” nit nenele roho husukag ulug ap isanggo larehon ino fam ibag.

³⁵Ari ibagma isanggo husibareg ambilikanggen lebe ruruken ele pikit toho uruk latfag.

³⁶Pikit toho uruk latfagma Yesusen, ”Ap winon fam hiyag isa fug,” ulug ap welatfahon arimano komo enepfag. Komo enepfag angge famen ari roho hihirehek ulug hiyag isil noruk latfag.

³⁷Hiyag isil norukmu ap arimanowen, ”Mun angge man angge fanowap turuk lit inisanggo larehon hur eneptuk, enele larehon hur eneptuk,” urukmu hol hibareg enekol anggolo haruk latfag.