Read Angguruk Yali MARKUS 8 Bible Online

MARKUS 8 - Angguruk Yali bible

MARKUS 8

¹Welatfareg ap anggolo Yesus ambeg watfareg weregman suburu obok haruk lit werehen Yesusen otsi tiya maniyek ulug wol enepfag.

²Wol enepfareg, ”Ap anggolo aruma An men weregman eneg hup hinahanam ahama suburu obok haruk lit werehen nindiyen,” ibag.

³”Suburu na fug angge hinibam aliyek ulug hiyag eselema keman suburu oboken war atep. It winon inibam yatman waharuson wereg,” ibag.

⁴Ibagma otsiyen te, ”Nit aruma o eleg ambeg welahereg suburu elehen nungge minag usul,” ibag.

⁵Ibagma Yesusen, ”Suburu roti nunggeyen foroho lahep?” ulug umung isibagma, ”Suburu sabiren foroho lahe,” ibag.

⁶Foroho lahe ibagma, ”Ap arimano kinangma hur atihip,” ibareg suburu sabiren itano wibareg seneg lit sembahyang ibag. Ibareg kut-kut otsi og isibareg, ”Ap enebe wal taneg og isalihip,” ibagma og isibag.

⁷Og isibagma ikan piren hinahan eke welatfag. Ikan itano oho seneg lit sembahyang ibareg, ”Ap og isalihip,” ibag.

⁸Ibagma og isibagma it enebe obog toho nibag. Nibareg enehum ouken minggiroho imbibahon arimano palu ribagma sum sabiren keleg ibag.

⁹Ap nibahon arimano teng-teng angge 4.000 welatfag. Welatfahon arimano nibagma Yesusen, ”Nori, ketiya hinibam lalihip,” ibag.

¹⁰Hinibam lalihip ibareg Yesus otsi men folo-folo kou fam kibareg o Dalmanuta libag.

¹¹Libagma fobik Farisi inap Yesus ambeg libareg At men suwahal uruk lit, ”Poholmonen turuk ane timihinmu nit kim hulen Haren wal hamihin,” ibareg wal ha reg ano, wal ha fug teg ano aluwat hul pibag.

¹²Aluwat harukmen Yesusen undaman ngesekum ibareg, ”Poholmonen turuk ane nit kim hulen wal hamihin ulug ap aruman nungge fahet uruk. Ap ketiya kinangma werehonen kim hahup tohon tot wal hamin fug, ari we tem toho ihi,” ibag.

¹³We tem toho ihi ibareg it embeselug kou fam kibareg ik fumag nindig atfag.

¹⁴Nindig atuk lit Yesus otsiyen suburu roti enepeleg atug libag. Suburu roti misig eneg walug kou fam kibareg ik yenggelehon ahum keyen nindig atfag.

¹⁵Nindig atuk lit Yesusen, ”Sig turuk angge Farisi inap men Herodes menen forohowon siyahen hinindi anggat toho welamok,” ulug ele indit toho hiyag isibag.

¹⁶Hiyag isibagma, ”Suburu roti nenepeleg atug waheyon ino fahet uruk ano,” ulug enele umung-umung atuk latfag.

¹⁷Umung-umung atukon Yesus undaman oluk atfareg, ”Suburu eleg ulug nungge fahet hinindi anggin toho welahep. Hit hinindi anggat teg eleg angge henepeleg toho welahep? Hit hinindi sohu roho welahep?” ibag.

¹⁸”Hinil wereg angge famen haruk lahep fug? Hinisanggo wereg angge famen hol haruk lahep fug? Anden tirikikon henepeleg atisi?” ulug per enepfag.

¹⁹”Suburu fuwaben ap teng-teng angge teng fuwaben 5.000 kur isarikikmu narusareg enehum ouken emberuson sum nombaren yuhare ferikipmu keleg irisi?” ulug kapal isibagma, ”Lahabeg nisanggowen yuharoho emberukuk,” ibag.

²⁰Ibagma, ”Suburu sabiren ap teng-teng angge teng uhanen 4.000 kur isarikikmu narusareg enehum ouken emberuson sum nombaren yuhare ferikipmu keleg irisi?” ulug kapal isibagma, ”Ilihig sabiren yuharoho emberukuk,” ibagma Aren te,

²¹”Nungge fahet hinindi wenggel ha fug angge welahep?” ibag.

²²Welatfareg Yesus o Betsaida libareg weregma ap il siyahon eke oriyen hondoholug watfareg Yesus fam, ”Hinggiken ki himin,” ulug heng tibag.

²³Heng tibagma Yesusen hun ino inggik senetfareg hondoholug o pumbuk inowen wilip atug anggenma libag. Libareg wasubag sup toho ilmu imbibareg inggiken ki hibareg, ”Ketiya hilen yet haruk lahen ano?” ulug kapal hibag.

²⁴Kapal hibagma yet hibareg, ”Ap larukon fahet e hag toho larukmu yer isaruk lahi,” ibag.

²⁵Ibagma Yesusen nin eke inggiken il ki hibagma ap ino il seleg atfagma mun angge man angge fuki roho yet haruk latfag.

²⁶Fuki roho yet haruk latfagma Yesusen, ”O pumbuk wina keyen lamihin fug, we pikit hibam lamihin,” ibag.

²⁷Welatfareg Yesus otsi men o Kaisarea Filipusen witfag ibam ino walinggoho o winon pumbuk wiroho weregma libag. Kema laruk lit, ”Ap aruman An nubahet sa peruk?” ulug otsi kapal isibagma

²⁸otsiyen, ”Ap aruma winonen Hat hubahet Yohanes ap ikma pilap eneptuk latisi ahun ino uruk. It winonen Elia ino uruk. It winonen Allahn ibag ane hiyag isaruk latfag inap arimano misig waharisi uruk,” ulug hiyag itfag.

²⁹Hiyag itfagma Yesusen, ”Hiren An fahet sa peruk lahep?” il larikim Petrusen, ”Hat Mesias ino Allahn tam hiyag isaruk lit fanowap henebuhuwon waruhu ibahon ino,” ibag.

³⁰Ari ibagma, ”Hiren An nubahet At Mesias ulug ap hiyag isa fug,” uruk lit ele ine roho komo enepfag.

³¹Komo enepfareg Yesusen otsi hiyag isaruk lit, ”At ap atfahon ino aben anggolo wabuhup. Wabuhupteg it ap suwon men Allah ibam ngi inap onowesi men Musa wene onoluk inap menen At ware fusukag uhupteg pinggi ware fesuhup. Pinggi ware fesuhupmu hup pirenam wareg laruhureg hinahanehon fam oluk aruhu,” ulug hiyag isibag.

³²Wabuhup ulug otsi iniline fag toho hiyag isaruk latfagma Petrusen Yesus tot lisoho amumu hondoholug libareg, ”Nuwabuhup ehenon hele si ehen, huwabuhup fug,” ulug ele ine roho hiyag itfag.

³³Hiyag itfagma Yesusen hebeloho ambol fil otsi kilap isaruk lit Petrus pet turuk lit, ”Iblis, hat hele eleg amin, haren Allahn tohon wenggeluk fug angge aben tohon fahet eneg wenggeltuk lahen,” ulug pet tibag.

³⁴Ari ulug pet tibareg ap luhaleg latfahon men otsi men horog tiya maniyek ulug wol enepfareg hiyag isaruk lit, ”Ap san An min ambiyeg lamin peruk halug at inowen inggareg siyahap taruk lit teltuk ahen ino ha rulug nombolim laruk laruhu.

³⁵An noluk welaruhuk peruk lit wereg ahun ino oluk welaruhu fug. An men Allah wene men fahet ware fesuhubon ino we tem toho oluk welaruhu,” ibag.

³⁶”Ap misihen mun angge man angge kinangma wereg angge ngi aruhu angge famen indi wenggel ha fug angge weregma at ino mondabi war aruhu. At ino war aruhu halug nungge fahet ngi aruhu?” ibag.

³⁷”Mondabi war atuk ane nirim peruk lit noluk welale peruk halug nungge fam ayeg wabuk fug teg,” ibag.

³⁸”Ap ketiya kinangma werehonen mun ane man ane fahet siyag ane turuk lit Allah ele embeseruk. Embeserukmu ap sa it onolohotman An men nawene men fahet ininggali roho welamuhup halug At ap kinangmon atfahon ino oho it fahet inggali roho welaruhu. Fobik At ap atfahon ino Ikni Allah lehoma werehon inowen ineyap turukmu otsi poholmon malaikat fanowon men wambik wamuhup sambil it fahet inggali hahu,” ibag.