Read Angguruk Yali MARKUS 9 Bible Online

MARKUS 9 - Angguruk Yali bible

MARKUS 9

¹”Allah ap obog toho Inikni aruhu sambil ino uwan wam fugmu hit aruma welahebon winon eke war am fug angge wereg lit ebe ine roho waharukmu yet hahup. Ari we tem toho hiyag hisaruk lahi,” ibag.

²Inggik falfalikenam welatfareg Yesusen otsi Petrus men Yakobus men Yohanes men hondog eneplug tom yaron fam lahibareg it enemu welatfag. Weregman it iniline Yesus anggelem atfag.

³Yesus anggelem atfagma asum umbagpag turuk lit yanggo ribag. Ap kinangmonen sum ik umatikim we tot yanggo ruruk. Yesus ebe anggelem atfagma asum yanggo ruruk lit umbagpag anggolo tibag.

⁴Umbagpag anggolo tibagma otsiyen yet harukmen Elia men Musa men inam atfareg Yesus men enele uruk latfag.

⁵Enele urukmu Petrusen, ”Nowe, o tuma fanoma welahe. O sabo hinahan wibul. Hat fahet eke, Musa fahet eke, Elia fahet eke tuma wit husul,” ibag.

⁶Wit husul ibag ane ari it Petrus men Yakobus men Yohanes menen inindimu enekol anggolo hibareg Petrusen un ane ibag.

⁷Ari urukmu hinan it sal enepfag. Sal enepfagma Allah ele hina apmaneyen, ”An namloho nindi reg lahiyon tu ele holtuk lamuhup,” urukmu hol hibag.

⁸Allah ele hol hibareg it Petrus menen hebeloho yet harukmen Yesus amu eneg weregma yet hibag.

⁹Yet hibareg tom famen wambik waharuk lit Yesusen, ”Hiren nit weregma yet nesehep ane ap unubam hiyag isa fug,” ulug komo enepfag. ”At ap atfahon ino war aruhureg oluk aruhumu eneg yet hehep ane ari ap hiyag isahup,” ibag.

¹⁰Ibag ane ari otsiyen wenggel haruk lit, ”War aruhureg oluk aruhu ehek ane ari nungge fahet ehek?” ulug enele sahaltuk latfag.

¹¹Sahaltuk lit, ”Nonowe, Musa wene onoluk inaben Elia tam waruhu uruk ane ari nungge fahet uruk?” ulug Yesus kapal hibag.

¹²Ari ulug kapal hibagma Yesusen te, ”We tem, Elia ino mun angge man angge halik oho tam waruhu. At ap atik ibahon ino aben anggolo wabuhupteg inda yako inggali wabuhup ulug haharoho imbibag ane nungge fahet imbibag peruk lahep?” ibag.

¹³”Elia ino tam waharisimu aben ubam tuhuk ulug inindimuwen perusa ane turusa ulug tem toho hiyag hisaruk lahi. Atam ari roho tuhup ulug haharoho imbibahon ino hikit toho turusa,” ibag.

¹⁴Enele il otsi winon wereg ambeg wambik waharukmen ap anggolo luhaleg lit weregma Musa wene onoluk inap arimano min Yesus otsi min suwahal urukmu hol-hol wambibag.

¹⁵Wamburukmu ap luhaleg latfahon arimanowen Yesus yet hibareg enehiyehen yuk lagmag ibareg folo-folo hi rik libag.

¹⁶Hi rik libagma Yesusen, ”Nungge fahet suwahal uruk lahep?” ulug umung isibag.

¹⁷Umung isibagma ap welatfahon arimano misihen, ”Nowe, an namloho undama siyag angge setan wereg lit ele uruk elehen Hat hambeg hondoholug wahi,” ibag.

¹⁸”Siyahon ino undama kil laruk lit malik ebe lisoho kinangma pilaptuk. Pilaptukmu malik ambilikmu elemahuwe salno ruruk lit ayeg kilit matuk lit ebe war atuk. War atuk lit ari turukon hotsiyen yanggaloho wilibusa pihi angge famen iren yanggaluk fug teg lit wereg,” ibag.

¹⁹Ari ibagma Yesusen, ”Hit aruma welahebon An nubam hinindi wenggel haruk lahep fug. An hit min noenam welamuhukmu An fahet honoluk aruhu? Hit fahet nindi imbik wamburuk lit ninggik noenam welaruhuk? Malik ari An nambeg tiya walug maniyek,” ibag.

²⁰Walug maniyek ibagma Yesus ambeg walug watfagma siyag angge inowen Yesus hibareg malik ino miyaloho hik isaruk latfag. Ari tirikim malik ino kinangma ying atuk lit imbil-imbil libareg elemahuwe salno ruruk latfag.

²¹Elemahuwe salno ruruk latfagma Yesusen, ”Ketiya eneg turuk ano, indam eke turuk latisi ano,” ulug ikni umung hibagma ikniyen te, ”Malik ebe fu anggema ubam atisireg ketiya oho ari eneg turuk,” ibag.

²²”Siyag angge inowen ware fesemin ulug indokma kilabil ikma pilabil til noruk latisi. Ari til noruk lit werehen Haren hihibuk teg lahen ano, hihibuk fug teg lahen ano. Hihibuk teg lahen halug hindi nisamihinteg hihit nisamihin,” ibag.

²³Ari ibagma Yesusen, ”Haren hihibuk teg lahen ano ehenon ari nangginoho ehen. Allah fam wenggel harukon inowen mun ane man ane tuk teg,” ibag.

²⁴Ari ibagma malik ikni inowen ele hum toho uruk lit, ”Nowe, Allah fam nindimu wenggel haruk lahi, amu ane wenggel haruk lahiyon ari elehap nabin,” ibag.

²⁵Ari ibagma ap anggolo luhalik waharukmu Yesusen yer isibareg malik ino undama siyag angge setan werehon ino fam, ”Hat setan siyag angge aruwen ap enele men inisanggo men siyahap eneptuk lahen,” ulug pet tibag. Pet tibareg, ”Malik aru undama welahenon wilip amin, wilip atnihinteg nin fobik kuhun fug ulug Anden yanggal haptuk lahi,” ulug pet turuk lit yanggalfag.

²⁶Yanggalfagma siyag angge inowen ele hum toho uruk lit malik ino miyaloho kinangma yinggi feselug wilip atfag. Wilip atfagma malik ino warehon hag toho yinggig lit werehen ap anggolo arimanowen yet hibareg, ”War aha,” uruk latfag.

²⁷War aha uruk latfagma Yesusen malik ino inggik seneko unduhuk fibagma fano atfag.

²⁸Fano atfagma Yesus otsi men inibam libareg enemu wereg lit, ”Nonowe, siyag angge malik undama welahayon ino hahon niren nungge fahet yanggaloho wilibuk fug teg lahe,” ulug umung hibag.

²⁹Umung hibagma Yesusen, ”Ari hahon yanggaltukmu wilip am fug teg. We sembahyang urukmu eneg wilip am teg,” ibag.

³⁰Yesus otsi men o inowen wilip atfareg o Galilea ap wereg ambeg pisan isalug laruk lit, ”Yesus waha ulug ap onolukap enebuk fug,” ibag.

³¹Ari ibareg, ”At ap atfahon ino ap ininggikmu aruhumu iren wabuhup. Wabuhupmu hup pirenam wareg nohokureg hinahaneg angge oluk aruhu,” ulug otsi hiyag isibag.

³²Hiyag isibag ane ari fahet otsi inindi su atfareg enekolen Yesus umung hibag fug.

³³Yesus otsi men o Kapernaum watfareg olma kibareg Yesusen te, ”Kema waharuk lit henele ehebon ari nungge fahet ehep?” ulug umung isibagma enele eleg angge welatfag.

³⁴Kema waharuk lit hat suwon ano an suwon ano il waharuk latfag anggeyen Yesusen umung isibagma enele eleg angge welatfag.

³⁵Enele eleg angge welatfagma Yesus hur atfareg horog tiya maniyek ulug otsi nisanggowen arimano wol enepfareg, ”An honowe aruhuk urukon ino hit honot atuk lit henemingmingangge aruhu,” ulug hiyag isibag.

³⁶Hiyag isibareg malik toron eke ma ibareg it sehelimu unduhuk fibareg mako pug toho ki reg lit wene hiyag isaruk lit,

³⁷”Ap san An nubam indi wenggel haruk lit malik toron tu hahon hondog talug foroho ahun inowen An fet nasug lit wereg,” ibag. ”Ap sa An fet nasuhon inowen An eneg fet nasug eleg, Nikni mon nabik waharisiyon ino oho foroho lit wereg,” ibag.

³⁸Ari ibagma Yohanesen Yesus fam, ”Nowe, ap eke Hat hunuk uruk lit ap unundama siyag angge werehon yanggaloho wili feserukmu harukuk. Hat hunuk uruk latisi angge famen nit men ambiyeg larukuk fug,” ibag. ”Nit men laruk lahe fureg, ’Haren siyag angge ap unundama werehon yanggaloho wilibuk fug,’ ulug komo rurukuk,” ibag.

³⁹Ari ibagma Yesusen, ”An nunuk uruk lit hihir eneptuk inaben An nabug siyahon uk fug tehen hiren ari ulug komo ruk fug,” ibag.

⁴⁰”Ap sa seliyon fil wereg elehon nit ninibil wereg.

⁴¹Hit Kristus otsi ik obok toho wahep peruk lit ik hinang hisaruk ahun ino Allahn fobik onggo og uruhu. Ari tem toho hiyag hisihi,” ibag.

⁴²”Malik toron aruma An nubam wenggel haruk angge famen aben inindi ninap toho wene inirima feseruk halug helep humon enenggolopma ililoho ik ahummu pilap isarukmu fano,” ibag.

⁴³”Hinggiken hindi ninap haptuk halug kong tebesuhun. Hinggik misig kong toho embeselug hat mondabi onoluk welamuhup ambeg lahunmu fano. Hinggik pirenet weregma siyagma indok war am fug angge mondabi naruk ambeg lahunmu mondabi siyag aruhun,” ibag.

⁴⁴

⁴⁵”Huyuhen hindi ninap haptuk halug kong tebesuhun. Huyug misig kong toho embeselug hat mondabi onoluk welamuhup ambeg kuhunmu fano. Huyug pirenet weregma siyagma hik hiyahupmu ari siyag,” ibag.

⁴⁶

⁴⁷”Hilen hindi ninap haptuk halug hililoho hik isahun. Hil fuma eneg weregma Allah wereg ambeg kuhunmu fano. Hil pirenet weregma siyagma hik hiyahupmu ari siyag,” ibag.

⁴⁸”Siyagma imbalo yaba ruruk ambeg, indoken hinaruk ambeg hik hiyahupmu mondabi hinaruk laruhu,” ibag.

⁴⁹”Ap obog toho enebene Allahn indok saho foltuk hag toho fol enebuhu.

⁵⁰Saho fano angge famen olok eleg aruhumu nin nangginoho olokap tuhup?” ibag. ”Saho fanowon foroho lit honori men suwahal uk fug angge mangno roho welamuhup,” ibag.