Read Angguruk Yali LUKAS 1 Bible Online

LUKAS 1 - Angguruk Yali bible

LUKAS 1

¹Teofilus nare, ap anggolowen nit weregma ebenam atisi ane fahet haharoho emberusa.

²Haharoho emberuson ari re atam Yesusen turuk latfag ane haruk latfag inaben wene fanowon tu ulug hiyag nisaruk latusa. Hiyag nisaruk latusa ane fahet it arimanowen haharoho emberusa.

³Anden oho haharoho emberuson ari men teko larisi ane ari men ke roho teko larisi ulug alem fuki roho yami ririkikteg buku aru fam andog toho haharoho umbuhuk perikik.

⁴Mun ane man ane hat hiyag hutuson ari we tem toho peruk laruhun ulug anden suwesingga aru hat fahet haharoho emberuk lahi.

⁵O Yudea ap suwon raja Herodes weregma imam ahun misig unuk te Zakharia umba Abia ubalmangge welatfag. Uhe Elisaber oho Harunen ondohowonen ondohowon welatfag.

⁶Ahun men uhe men itanowen Allah olohotma we fano ane eneg turuk lit Allahn ibag ane eneg turuk lit siyag-siyag ane tuk fug angge welatfag.

⁷Siyag ane tuk fug angge welatfag angge famen Elisabet malik indag ta fug angge ibili roho weregman eneg ahunet uheyet sabal atfag.

⁸Misihim hun Abia umalikisi Zakharia ori men Allah fam sembahyang uruk sambil atfagma Allah ibamen hubu lahapmin ulug olma kibag.

⁹It imam inap arimanowen turuk ane roho sa kimisi ulug enehangge hik turukmen Zakharia ubam atfagma hubu lahapmin ulug kibag.

¹⁰Ap obog toho owahalma palu arik watfareg sembahyang urukmu Zakharia ino olma hubu lahaptuk latfag.

¹¹Hubu lahaptuk lit yet harukmen malaikat Allahn monde fibagma indok iraham inggik pikit fil unduhukmu yet hibag.

¹²Unduhukmu yet hibareg yuk libareg akol hibag.

¹³Akol hibagma malaikat inowen, ”Zakharia, hat hakol ha fug. Hat sembahyang urukmu Allahn hol hiyarisi angge re huhe Elisabet ino malik ap angge indag tahu. Indag tahumu unuk Yohanes suwaluhun.

¹⁴Hiren malik indag tahupteg henehiyeg hahup hag toho ap anggolo malik ari fahet enehiyeg hahup,” ulug malaikaren hiyag itfag.

¹⁵”Allahn perukon te malik aru An nalukema suwon welaruhu ulug isingan malik ari ket indag tahumu Allah hime fanowon ubam aruhureg anggur ahaluwe men ik olokon men na fug angge welaruhu peruk.

¹⁶Aren wene hiyag isaruk laruhumu yet hahupteg Israel inap anggolo suhuloho Inikni Allah olohotma wamuhup.

¹⁷Elia ubabut hag toho ele ine roho hiyag isaruk lit Onowe suwon fobik waruhuwon ino alukema aruhu. Iniknisi unumalikisi mangnowap eneptuk lit Allah wene ninirim peruk inap inindi anggarap eneptuk lit andog enebuhuwon arimanowen Allah yet teg lit welamuhup,” ulug malaikat inowen Zakharia hiyag itfag.

¹⁸Hiyag itfagma Zakharia inowen hebeloho ele uruk lit, ”An oho nuhe oho sabal atukuk angge famen haren ehenon tem toho ehen angge famen ke roho pemin,” ibag.

¹⁹Ari ibagma malaikat inowen, ”An Gabriel, Allah amingmingangge welahiyon wene fanowon aru hiyag irik lamihin ulug mon nabehekma wahi,” ibag.

²⁰”Anden ihi ane ari fahet si ane ehek pehenma hambilik lar atmisimu hele uk fug angge welaruhun. Ihi ane aru teko lahu sambil hele uruk lit tem toho irisi puhun,” ibag.

²¹Malaikaren ele urukmu ap anggolo owahalma welatfahon arimanowen Zakharia nangno ruruk lit fahe kehek angge famen nungge fahet folo wilip atuk eleg peruk latfag.

²²Ari peruk latfagma at wilip atfareg it welatfahon arimano fam ele uk fug teg latfag. Ele uk fug teg latfagma it luhaloho welatfahon arimanowen te, ”Allahn nungge hiyag erehek?” peruk latfag. Peruk latfagma hun Zakharia inowen inggik fam hinibam aliyek ulug hiyag isibagma inibam libag.

²³Tot welatfareg Allah ibamen tuk teg ane yoho tibihi ulug ar oho ibam libag.

²⁴Ibam libareg tot welatfagma uhe Elisabet ino malik ahummu atfagma pikalem fuwaben selma la fug angge olma welatfag.

²⁵”An malik indag ta fug angge ibili atikim aben ninggaliyap naptusa angge re Allahn ninggali elehap tehek,” ulug Allah wel turuk latfag.

²⁶Elisabet ino malik fet talug latfahon pikalem falfaliken atfagma Allahn malaikat unuk Gabriel ino o pumbuk misig Galilea kinangma werehon o Nazaret ino

²⁷hiyap tuhumon misig unuk Maria weregma monde fibag. Hiyap ino Yusuf Dauren ondohowonen ondohowon inowen hilahuk ulug elenggen kuruk latfag.

²⁸Malaikat ino Maria ibam kibareg ele uruk lit, ”Nahaloho, Ninikni Allahn indi hiyarisireg hat fet hasug lit wereg,” ulug hi ribag.

²⁹Malaikaren ibag ane hol hibareg akol hibareg, ”Hi nabehekon ari nungge fahet ehek,” ulug indimuwen wenggel hibag.

³⁰Wenggel hibagma malaikat inowen, ”Maria nahaloho, hakol ha fug, Allahn indi hasug lit wereg,” ibag.

³¹”Welaruhunmu malik hahummu aruhumu malik ap angge indag tahunteg unuk Yesus suwaluhun,” ibag.

³²”At ap suwon aruhumu Allah palimu werehon amloho tu uruk lamuhup. Umbusag Daud heriyeg latfag ambeg lehoma Allahn te ubalma heriyeg laruhun uhu.

³³Yakub umalikisi fet enesugmen eneg eleg am fug angge mondabi welaruhu,” ibag.

³⁴Ari ibagma Maria ino malaikat ino fam, ”Nahun men nohuk fugmu haren ehenon ari nangginoho aruhu?” ibagma malaikat inowen,

³⁵”Allah hime fanowon hat hubam aruhu, Allah ine roho palimu werehon ino ahuhe apma welaruhun. Welaruhunon ari fam malik indag tahunon Allah amloho fanowon tu uruk lamuhup.

³⁶Howe Elisabet ibili atuk uruk latuson ino sabal atisi angge famen malik ap umalik ahummu atisi sambil ino yoho pikalem falfalikon welahe.

³⁷Allahn mun ane man ane aben tuk fug tohon tuk hag teg lit wereg,” ibag.

³⁸Ari ibagma Maria inowen, ”Nikni Allah amingmingangge an welahi angge re haren ehenon ari an nubam aruhu,” ibagma malaikat ino Maria embeselug libag.

³⁹Malaikat ino Maria embeselug libagma tot welatfareg Maria ino Elisabet ambeg lamin ulug o Yudea punumu lahibag.

⁴⁰Lahibareg Zakharia ambeg kuruk lit Marian nowe ulug hi rurukmu

⁴¹Elisabet hol hibagma malik ahummu fet talug latfahon ino lebe ruruk latfag. Lebe ruruk latfagma Allah hime fanowon ubam weregma ele ine roho uruk lit,

⁴²”O pumbuk winon hiyap anggolo wereg angge famen Allahn hat indi hiyarisireg hi haptisireg malik hahummu werehon ino oho Allahn hi ririsi.

⁴³An hiyap sa hag toho welahimu Nowe suwon isinga nambeg pen niya wahen?” ibag.

⁴⁴”Fahe nibam kik waharuk lit hi nabehenon hol hihimu malik nahummu werehon nahiyeg ulug lebe rehek.

⁴⁵Ninikni Allahn nubam irisi ane fahet tem toho ehek perikinteg hahiyeg haruk laruhun. Aren sali watisi ane tem toho teko lahu,” ulug Elisabet inowen Maria fam ari ibag.

⁴⁶Elisabet inowen ari ibagma Marian Allah wel turuk lit, ”Nikni Allah nindi fam wel turuk lahi.

⁴⁷Nikni Allahn windat nabuhu ulug nahiyeg haruk lahi.

⁴⁸An At amingmingangge apma welahiyon yet niyarisimu ketiya famen fobik welamuhubonen oho an nubahet at ahiyeg toho wereg ulug wel naptuk lamuhup.

⁴⁹At inggik ineyon inowen fano ane anggolo nubam turuk latisimu At unuk palimu welaruhuwon fahet ap obog tohowen wel turuk lamuhup.

⁵⁰Welatfahonet welamuhubonet At fahet enekol toho welamuhupmu Allahn indi enesug laruhu.

⁵¹At inggik ine roho wereg lit ininggareg wel taruk inap yanggal eneptuk laruhu.

⁵²Aren nit suwon welahe perukon apmayap enebuhureg toron inilaheg toho werehon palimuwap enebuhu.

⁵³Ininggikmu eleg angge inilaheg toho werehon Aren fano roho og isahureg nenenggengge anggolo wereg peruk inap og isa fug angge alpal enebuhu.

⁵⁴Israel inap nindi enesug lahi ulug at amingmingangge ler eneptuk laruhu.

⁵⁵Nunumba Abraham umalikisi tam welatfahon men let heneptuk laruhuk ulug sali watfahon ino hag toho let neneptuk lit eneg welaruhu,” ari ulug Marian Allah wel tibag.

⁵⁶Allah wel tibareg Maria ino Elisabet men weregman pikalem hinahan libagma ibam suhuloho libag.

⁵⁷Maria suhuloho ibam libagma hiyap Elisabet ino welatfareg malik indag taruk sambil horog atfagma malik ap angge indag tibag.

⁵⁸Indag tibagma ap it inibam walinggoho welatfahon arimano men otsi owesi menen ibili welatisi angge famen Allah indimu perisiyon fam malik indag tehek ulug it obog toho kibareg enehiyeg toho wereg lit Allah wel turuk latfag.

⁵⁹Wel turuk lit welatfagma malik ino indag tibahon sali o likin teg latfagma ambilahap paltul ulug watfareg ikni unuk suwaleg hag toho Zakharia suwaltul ulug turuk latfag.

⁶⁰Zakharia suwaltul ulug turukmen isingan hiyag isaruk lit, ”Ikni unuk fam fug, unuk Yohanes suwaltihip,” ibagma it arimanowen,

⁶¹”Hat howesi hotsi ari hag toho suwalehon wereg eleg,” ulug

⁶²ikni fam, ”Malik aru unuk sa suwaltul,” ulug ininggik tum pil haruk lit umung hibag.

⁶³Umung hibagma helep hahatuk angge heng enepfareg hahatuk lit, ”Unuk Yohanes,” hahare fibagma ap arimanowen it aruwon ununuk ari hahon eleg angge famen unuk suwalehek ulug enele sahaltuk latfag.

⁶⁴Malik ino unuk suwaltikim itano hun Zakharia ino ambilik husibareg ele uk hag teg latfagma Allah wel turuk latfag.

⁶⁵Allah wel turukmu it ambiyeg welatfahon arimano enekol hibareg ambilik husibag ane ari fahet o Yudea punumu o pumbuk obog toho welatfahon enele sahaltuk latfag.

⁶⁶Enele sahaltuk lit holfahon arimanowen, ”Malik aru Allahn inggik famen indag tarisiyon fobik su aruhureg nanggintuk laruhu,” ulug wenggel haruk latfag.

⁶⁷Yohanes ikni Zakharia ino Allah hime fanowon ubam atfagma teko lahu ane fahet hiyag isaruk lit,

⁶⁸”Nit Israel ninaben Ninikni Allah suwon wel turuk lamul. Siyag toho weregma yet nisarisireg nininggik lisoho nunumbaharisi.

⁶⁹Allah amingmingangge Daud welatfahon ubalmangge ineyon inowen nininggik lisoho nunumbahukag ulug monde ferisi.

⁷⁰Wene atam hiyag isaruk latfag inap arimano fam hiren wene aru hiyag isa laruk latihip ulug mon enepfag.

⁷¹Seliyonen nunuselep angge Aren tel nenebehekteg nit fahet inirim perukon windat nenebehek.

⁷²Ninikni nunumba fam hit nindi henesug lahi ulug hiyag isaruk lit sali watfahon ino hag toho teko lahu.

⁷³Nunumba Abraham hiyag utuk lit, ’Seliyonen hininggik hele wat henebuhupmu lol henebuhuk ulug we tem toho uruk lahi,’ ulug hiyag itfag.

⁷⁴

⁷⁵Lol nenebuhuwon ino wereg ulug nenekol eleg toho At alukema amingmingangge hag toho welamuhuk. Ari roho Allah olohotma wereg lit pikir ane eneg wenggel haruk lit weregman sabal amuhuk.

⁷⁶Hat an namloho aru Allah palimu werehon inowen hisanggoma emberuk ane haren ap hiyag isaruk laruhun. Nonowe suwon waruhuwon alukema laruk lit kebunggalem pikit toho yaho feruk laruhun.

⁷⁷Allah umalikisi hiyag isaruk lit, ’Allahn siyag ane hiren turuk latikibon ambolmayap tuhureg fanowap henebuhu,’ ulug inindi anggarap enebuhun.

⁷⁸Ninikni Allah amuwen indi nenesug lit mo lahap nisa waharuk.

⁷⁹Mo lahap nisa waharukmu o hik teg ambeg wereg inap men warehon laruk ambeg hag toho wereg inap men fahet mo asinandi umbagpag tuhu. Umbagpag tuhumu seli roho welam fug angge nit mangno roho wereg lit kebunggalem fanowon nunuyug fam sobit-sobit lahuk,” ulug Zakharian Allah wel tibag.

⁸⁰Weregman malik ino su atfareg indi anggar atfagma ap eleg ambeg anggenma welatfag. Weregman Allahn ketiya Israel inap ebenam toho hiyag isamisi pibagma anggenma ino embeselug libag.