Read Angguruk Yali LUKAS 11 Bible Online

LUKAS 11 - Angguruk Yali bible

LUKAS 11

¹Misihim Yesus amumu sembahyang ik oho libareg sembahyang ibareg otsi enembeg watfagma ot misihen, ”Nowe, Yohanesen otsi sembahyang urukon hiyag isarisi hag toho Haren oho nit hiyag nisimin,” ulug heng tibag.

²Heng tibagma Yesusen it unubam, ”Sembahyang uruk lamuhubon tu hiyag hisamin,” ibareg, ”Ninikni Allah, Hat hunuk suwon fahet nenekolen welamul, Hat hunuk uruk lamul. O aruma Hat wereg ambeg hag aruhu.

³Nit suburu yoho nul perukon Haren og nisaruk laruhun.

⁴Ap aruman ninindi siyahap neneptusama niren nenepeleg aha hag toho niren Hat hindi siyahap haptukukmu Hat hapeleg amag. Siyahonen nininggik lit neneptuk halug windat nenebuhun,” ulug Yesusen otsi hiyag isibag.

⁵Nin eke hiyag isaruk lit, ”Hit welahebon ariya misihen hup humanoho hare ambeg lahunteg ubam ele uruk lit, ’Nare, numbali eke yatman wahama suburu anden isag utukon nibam elehen anden fobik ubalma og huruhuken roti hinahan og nimin,’ ulug heng tuhun.

⁶

⁷Heng tuhunmu hare olma werehon inowen, ’Elel nabuk fug, numaliki men sok laroho nohoruk lahereg og hum fug teg lahi,’ uhu.

⁸Ari uhu angge re nareyen heng nabik waha ulug in am fug teg lahi puhu angge famen inggali eleg toho sok kik turuk lit heng nabehek ulug in aruhureg heng uhu ahun ino asehet teg angge og uruhu, ari tem toho hiyag hisaruk lahi,” ulug Yesusen indit toho hiyag isibag.

⁹Indit toho hiyag isibareg ele pikit toho hiyag isaruk lit, ”Heng tiyok, Allahn og hisahu. Yami riyok, Allahn hiyag hisahu. Sok kik tiyok, Allahn hut henebuhu.

¹⁰Heng turuk lamuhupmu og hisahu. Yami ruruk lamuhupteg hiyahakup. Sok kik turuk lamuhupmu hut henebuhu,” ibag.

¹¹”Nori, hit welahebon hunumalikisi werehon welahep. Hunumalikisiyen suburu oboken namin ulug, ’Ikan misig og nimin,’ ulug heng heneptukmu hit san pisanggo og um teg?

¹²Hunumalikisiyen suburu oboken, ’Suwe anggen misig og nimin,’ ulug heng heneptukmu hit san kirimbul olokon og um teg?

¹³Hit hinindimu siyahon welahep angge famen hunumalikisi fano-fano angge eneg og isa reg lahepma Ninikni poholmon ubam heng urukon arimano Aren ahime fanowon sebe roho og isahu,” ibag.

¹⁴Ap misig setan undama weregma ele uk fug angge ambilik larehon welatfagma Yesusen setan ino fam, ”Hat wilip amin,” ulug yanggalfagma ap ino ele uruk latfag. Ele uruk latfagma ap anggolowen yet hibareg enekol hibag.

¹⁵Enekol haruk lit ap welatfahon winonen, ”Setan onowe suwon Beelzebul ino Yesus undama kirisireg ele ineyap turukmu ap unundama siyag-siyag angge werehon Aren yanggaloho wili fusuk teg,” uruk latfag.

¹⁶Ari uruk latfagma ap itano winonen Yesus aluwat hul ulug ubam enele uruk lit, ”It poholmonen turuk ane wal hamihinmu nit kinangmonen yet hulteg tem toho pulen wal himin,” ibag.

¹⁷Ari urukmen aluwat niyaruk lit uruk ulug Yesusen oluk atfag. Oluk atfareg hiyag isaruk lit, ”O pumbuk misig inap it-it seli roho wereg halug fano welamuhup fug. O misig ahunen uhe malik men seli roho wereg halug o ino siyag aruhu.

¹⁸Siyag angge Iblis urukon arimano it-it seli roho wereg halug fano welamuhup fug. Hiren te setan onowe Beelzebul undama kirisireg ap unundama setan werehon yanggaloho wilip eneptuk uruk lahebon ari nangginoho peruk lahep?

¹⁹Hiren An fahet Beelzebul unuk fam ap unundama setan werehon yanggaloho wiliptuk uruk lahepma hit honotsi menen setan yanggaloho wilip eneptuk lahebon ari san hinineyap heneptisimu wilip eneptuk lahep? Hit honotsiyen fano wilip eneptuk peruk lahep halug Anden nangginoho siyag ane tuk hag teg lahi?

²⁰Anden turuk lahiyon ari Nikni Allahn nineyap naptisimu setan yanggaloho wilip eneptuk lahi. Allahn nineyap naptisiyon ari famen hir oho Hinikni Allah aruhuwon seleg aha.

²¹Ap misig ineyon sehen inggikmu seneg halug aren angge olma werehon ari aben hila fug teg.

²²Ari reg angge famen ap misig ine anggolowon fobik waharuk lit asehen aren ino taluk taruk lit ebe ware feseruk lit anggengge olma werehon arimano obog toho hilahureg otsi fibir enebuhu,” ulug Yesusen indit toho hiyag isibag.

²³”Ap sa An men wereg elehon at ino An men seli roho wereg. Ap sa An let naptuk elehon ino suburu yahal taruk lit sum fam yunggat tamin puk fug angge hilil-halal isaruk ahun hag toho wereg,” ulug Yesusen indit toho hiyag isibag.

²⁴”Ap undaman siyag angge setan wilip aruhureg anggenma lahureg la wam turuk lit kel taruk ambeg elehen nibam embeselug waharikik ambeg suhuloho lamin puhu.

²⁵Ari puhureg ibam ino lahureg o ino fano regma anggengge puhun toho weregma kuhu.

²⁶Puhun toho weregma hahureg setan sabiren onolokon arimano wol enebuhureg enebe mangno roho o ari welamuhup. O ari hag toho setan ap undama welamuhupmu ap ino atam tot fano famen fobik mondabi siyag aruhu,” ulug Yesusen hiyag isibag.

²⁷Yesusen ari ulug hiyag isibagma ap anggolo welatfahon arimano sehelimu hiyap misihen uruk lit, ”Hiyap Hat indag haptisireg ag mon haptisiyon inowen namloho tu indag tarikik ulug ahiyeg toho welamag,” ari il larikim

²⁸Yesusen hebeloho hiyap ino hiyag utuk lit, ”An indag naptisiyon ahiyeg toho welaruhu fug. We Allah ele holtuk lit fano ane turuk inap arimano enehiyeg toho welamuhup,” ulug hiyag itfag.

²⁹Welatfagma Yesus iraham ap anggolo luhal arik watfagma Yesusen ele hiyag isaruk lit, ”Hit ketiya welahebon aruma honolok anggolo roho welahep. Poholmonen turuk ane ari yet hulen timihin ulug heng naptuk lahep angge famen ari ketiya tuk fug teg lahi. Hit honoluk toho welamuhuben Yunus ap wene hiyag isaruk latfag ahun ubam tibag ane ari fam hit honoluk amag.

³⁰Yunus ubam tibag ane ari famen Niniwe inap onoluk atfag hag toho An ap kinangmon atik iyahon nubam tuhup ane ari famen hir oho honoluk aruhu.

³¹Anden hiyap yatmon Salomo ambeg watfahon ino fahet wirimangge hiyag hisamin. Ahamu fil wereg inap onowe hiyap angge suwon welatfahon inowen te hun Salomo indimu oluk eneg tehen ele uruk ane holuhuk ulug yitmi-yatman Salomo ambeg watfag. Hun Salomoen uruk ane apma reg angge famen hiyap ino yatman ele holik watfag, an nele palimu wereg angge famen hiren holtuk lahep fug. Holtuk lahep fugmu hiyap suwon ino Allahn ap kinangmon minggir enebuhu sambil in aruhureg hit ap aruma siyag ane turuk lahep ulug hininggaliyap henebuhu.

³²Nin eke Niniwe inap Allah ubam inindi wenggel hibahon fahet wirimangge hit hiyag hisamin. Yunus inowen Niniwe inap hiren siyag-siyag ane turuk lahep ulug komo enepfagma inindi anggar atfareg Allah fam wenggel haruk latfag. Hun Yunus ele apma reg angge famen Niniwe inaben at ele holtuk latfag. An nele palimu wereg angge famen hiren holtuk lahep fug. Holtuk lahep fugmu Niniwe inap arimano Allahn ap kinangmon minggir enebuhu sambil ino in amuhupteg hit ap aruma siyag ane turuk lahep ulug hininggaliyap henebuhup,” ulug Yesusen wirim haruk lit hiyag isibag.

³³”Aben iral hunduhuk felug o inditmu umbuk fug teg. Kou po reg ambeg elma kila fuk fug teg. Ap kik waharukonen umbagpag yet hawag ulug inama leho feruk lamuhup,” ulug Yesusen indit toho hiyag isibag.

³⁴”Hinil henebe aru re iral hag toho wereg. Hinil fano wereg halug hinindi fam wenggeltukon oho fano wereg. Hinil hik teg halug hinindi fam wenggeltukon oho seleg am fug angge hik teg lit wereg.

³⁵Iral hiren foroho lahebon war aruhureg mondabi hik aruhu rohon fano roho foroho lamuhup.

³⁶Hinindi fam wenggeltukon obog toho hik teg eleg angge mondabi seleg teg laruhu halug hunubabur oho iral ambulpul turukon hag toho fano welamuhup,” ulug Yesusen hiyag isibag.

³⁷Yesusen wene ap hiyag isibareg welatfagma Farisi ahun misihen suburu nulen an nibam lul ibagma Yesus suburu nul ulug ibam kibag.

³⁸Ibam kibareg suburu narikim Farisi ahun inowen yet hibareg, ”Yihi, hun aru nungge fahet inggik umabuk fug angge suburu saliyog naruk,” undaman pibag.

³⁹Ari peruk latfagma Nonowe Yesusen hebeloho ap ino fam, ”Hit Farisi hinap, kou men ik kubag men sel fil umatuk lahep angge famen hit hinindimu honolok weregma hunundama siyag angge werehon ari hinine roho senetuk lahep.

⁴⁰Hit sohu-sohu ane wenggeltuk hinap, ahap sel fil Allahn wal tibagma undama fil ari ap ekeyen wal tibag peruk lahep?

⁴¹Hinindi famen wenggel hahupteg kou elma werehon ap enenggengge elehon minag isaruk lamuhup halug mun angge man angge aruma Allahn fanowap hisarisimu usa angge peruk lamuhup fug.

⁴²Hit Farisi hinap hinindi anggin amag! Pingga amben fano angge men mun angge man angge yahaltuk lahebon palu numen tebelug numon ino Allah fahet emberuk lahep. Hit hinindi pikiron fanowon ari Allah og utuk lahep fug. Misig fahet turuk lit misig fahet henepeleg am fug.

⁴³Hit Farisi hinap, hinindi anggin amag! Sembahyang uruk ibamen aben yet nisawag ulug lehoma hur atuk lahep. Pasar waruk ambehen ap anggolowen wel nenebusareg hi nenebukag ulug laruk lahep.

⁴⁴Hit hinindi anggin amag! Ap war atukon amigmu siye reg elehon hag toho hit welahep. Aben ari reg ambeg sobit-sobit larukmu siyag atuk,” ulug Yesusen Farisi inap per eneptuk latfag.

⁴⁵Per enepfagma Musa wene oluk ahun misihen hebeloho Yesus fam ele uruk lit, ”Nowe, Haren Farisi inap unubam hele uruk lahenon ariyen nir oho nininggaliyap neneptuk lahen,” ibag.

⁴⁶Ibagma Yesusen hebeloho ap ino fam, ”Hit Musa wene honoluk hinap aruma oho hinindi anggin amag! Hiren honori unumaloma e angginon ha riyek ulug emberuk lahep anggeyen hininggareg hininggiken ki haruk lahep fug.

⁴⁷Hit hinindi anggin amag! Wene hiyag isaruk latfag inap arimano hit hunumbusagsiyen unusibagma sal enepfag ambeg enehangge emberuk lahep.

⁴⁸Hit hunumbusagsiyen unusibagma sal enepfag ambeg hiren siye teberuk lit nunumbusagsiyen fano ane tibag peruk lahep.

⁴⁹Ari atam Allah oluk atfareg hiyag isaruk lit, ’An namingmingangge wene hiyag isawag ulug mon enebuhuk. Mon enebuhukon arimano winon unusuhupteg winon unusil laruk lit yanggal enebuhup,’ ibag.

⁵⁰Allahn pohol kinang wal tibag sambil ariyen wene hiyag isaruk inap mon eneptukmu unusibahon arimano enemep fahet wirim atuk elehen ap ketiya werehon aruma fam ayeg war aruhu.

⁵¹Atam unusibahon ari Habel tam watfareg unusil laruk lit hun Zakharia Allah ibam men wam esetuk ambeg men honggolegma ketiya watusa. It enemep fahet ap ketiya werehon ayeg war aruhu.

⁵²Hit Musa wene honoluk hinap hinindi anggin amag! Mun angge man angge honoluk amon alem hininggikmu senetuk lahep angge famen ondomi fil pen haruk lahep fug. Honori winonen alemet ondomiyet senebul peruk angge famen hiren ke paltuk lahep,” ulug Yesusen hiyag isibag.

⁵³Hiyag isibareg lamin ulug turukmen Musa wene onoluk inap men Farisi inap men arimano onolok hibag. Onolok hibareg Yesusen anggolo hiyag nisawag ulug kapal eneg haruk lit

⁵⁴Yesusen uk fug teg ane imisiyon ari fam senebuhuk ulug ambilikmu fuki roho kilaboho latfag.