Read Angguruk Yali LUKAS 13 Bible Online

LUKAS 13 - Angguruk Yali bible

LUKAS 13

¹Welatfagma ap Yesus ambeg wene hiyag humul ulug watfareg enele uruk lit, ”Galilea inaben wam Allah fahet yaltul ulug turukmen Pilatus otsi men waharusareg unusurusama wam mep wambirisi ambeg ap mep wambirisi ulug hiyag humulen wahe,” ibag.

²Ibagma Yesusen hebeloho hiyag isaruk lit, ”It unusuruson ari eneg siyag-siyag ane anggolo turusa peruk lahep? Winon unusurusa fuhon arimano siyag ane turusa fuhon peruk lahep?

³Enebe obog tohowen siyag ane turusa. Hiren oho siyag ane turuk lahebon umbusuhup fugmu ari hag toho hir oho hunusuhup.

⁴Yerusalem inap wereg ambeg atisi ane eke hiyag hisamin,” ibag. ”Ik Siloam sene horogma o yaron wirihon halog turuk lit ap num fimahen unusirisi. Unusirisiyon ari eneg siyag ane anggolo turusa peruk lahep? Ap obog toho Yerusalem werehon arimano siyag ane turusa fuhon peruk lahep?

⁵Enebe obog tohowen siyag ane turusa. Hiren oho siyag ane turuk lahebon umbusuhup fugmu ari hag toho hir oho hunusuhup,” ulug Yesusen hiyag isibag.

⁶Yesusen indit toho hiyag isaruk lit, ”Ap misig e ara soluk hag ahen hele anggur yatuk ambeg wilibihon ngi roho welatisi. Ap inowen anggen yihik ano ulug waharisireg kim harukmen eleg latusa.

⁷Eleg latusama amingmingangge yabuk foroho ahun ino fam, ’Kim ha waharukmen eneg mo ilig am wirig am turukmu hinahanam atisimu anggen eke yihikon harikik fug. Nungge fahet e ariyen kinang howil teg? Muhuk fisin,’ irisi.

⁸Irisimu amingmingangge inowen, ’Nikni, mo misig aru nangno hahukteg kinang alma werehon ari habuloho amug ware fuhukmu anggen yihik fuhu lit teg.

⁹Anggen mondabi eleg halug muhuk fesuhun,’ irisi,” ulug Yesusen ele indit toho hiyag isibag.

¹⁰Wene uruk sambil hari Sabat misihim Yesusen wene hiyag isarukmen

¹¹hiyap eke undama siyag angge setan weregma mo ilig am wirig am turukmu num fumag 18 atfagma ambol simbuk teg lit in am fug teg latfag.

¹²In am fug teg latfagma Yesusen hiyap ino yet hibareg wol tibareg, ”Siyag angge hubam werehon ari eleg aha,” ibareg

¹³inggik unggulmu imbibagma hiyap ino pikit in atfareg Allah wel tibag.

¹⁴Wel tibagma wene uruk ibam ngi ahun ino indimu olok hibareg Yesusen hiyap ino wene uruk sambil fanowap tehek ulug ap arimano unubam, ”O falfalikenam mun angge man angge tukon wereg angge famen wene uruk sambil nungge fahet hihit nabukag ulug waha? O falfalikenam eneg hihir enebuk tehen waharuk lamuhup,” ulug komo enepfag.

¹⁵Komo enepfagma Yesusen, ”Hit henele si uruk hinap, henembohom sapi henembohom keledai hinibam werehon hele loloho walug ik nawag ulug hondog eneplug laruk lahep fug?” ulug per eneptuk lit,

¹⁶”Hiyap aru Iblisen inggik hele waroho forohoman eneg mo ilig am wirig am turukmu num fimahen atisimu wene uruk sambil hele loluk fug teg? Hiyap aru Abrahamen ondohowonen ondoho eleg ano?” ulug kapal isibag.

¹⁷Kapal isibagma At fam wal hul pibahon arimano ininggali atfagma ap anggolo arimano fano ane tehek ulug enehiyeg hibag.

¹⁸Yesusen wene hiyag isaruk lit, ”Allah ap obog toho Inikni aruhuwon ino nungge fam wirim tuk teg?

¹⁹Soluk anggen fam wirim timin. Soluk anggen ino ap misihen wak larisireg yabukmu fok tirisimu wilip atisireg su atisi. Su atisimu suwe pohol ke larukon waharusareg inggikmu ei wirik waharusa,” ulug Yesusen indit toho hiyag isibag.

²⁰Nin eke hiyag isaruk lit, ”Allah ap obog toho Inikni aruhuwon ino nungge fam wirim timin?

²¹Sig angge fam roti wiratukon wirim timin. Sig angge ari hiyap misihen wak larisireg tepung ul ino kou hinahan winag harisireg ul ino fam kila feserisireg weregma kila feserisi angge ino unduk eneg turuk latisi,” ulug indit toho hiyag isibag.

²²Hiyag isibareg Yesus o pumbuk eke la eke la turuk lit wene ap hiyag isil noruk lit o Yerusalem fil laruk latfag.

²³Larukmen ap eke watfareg Yesus umung haruk lit, ”Nowe, ap Allah ambeg kuhubon we tor angge kuhup ano,” ulug kapal hibag.

²⁴Kapal hibagma Yesusen hebeloho, ”Sok keleg tohon ari fam kuhuben yami ruruk lamuhup. Ap anggolowen sok ari fam kuhuk peruk lit yami ruruk angge famen kuk fug teg,” ibag.

²⁵”O ngi ahun ino in aruhureg sok lare fuhumu hit selma unduhuk lit sok kik turuk lit, ’Ninikni, sok hut nenebin,’ uhupmu, ’Hit keman waharuk lahep an napeleg,’ uhu,” ibag.

²⁶”An napeleg uhumu hiren hebeloho, ’Hat halukema suburu men ik men narukmu o pumbukmuwen wene hiyag nisaruk latikin,’ uhup,” ibag.

²⁷”Uhupmu aren, ’Hit keman wahep an napeleg. Siyag ane turuk hinap anden pen hisihimu itan longgo iyek,’ uhu.

²⁸Abraham men Ishak men Yakub men atam wene hiyag isaruk latfag inap men Allah ibam weregma yer isahupteg, ’Nir oho kila angge famen yanggal nenebehesa,’ ulug heneyeg kilit matuk lit uba yatuk lamuhup.

²⁹Ap yali filon hubula filon umu filon ahamu filon wamuhupteg suburu nuk oho Allah ibam kuhup.

³⁰Ap eke fobik atuson tam amuhup, ap eke tam atuson fobik amuhup,” ulug Yesusen hiyag isibag.

³¹Welatfagma Farisi inap itanowen Yesus ambeg watfareg, ”Herodesen Hat huwatmin peruk lit werehen tuma embeselug lamihin,” ibag.

³²Ibagma Yesusen, ” ’Yoho men sono men ap unundama siyag angge werehon wili feseruk lit ouk warukon hihir eneptuk lahi. We o hinahaneg angge obog aruhu,’ ehek ulug olomene olokon ino hiyag irik lalihip,” ibag.

³³”Wene hiyag isaruk latfag inap keman unusuk fug tehen o Yerusalem pumbukmuwen eneg unusukag ulug unusuruk latfag angge An oho hup hinahaneg angge ari funggalma laruk laruhuk.

³⁴Hit Yerusalem hinap fam uruk lahi. Ap wene hiyag isaruk latfag inap arimano Allahn mon enepfagma hit Yerusalem hinaben helep fam unusuruk latikip. Suwe ayam umaliki aherabul apma wol toho kilap eneptuk hag toho Anden hat humalikisi wol toho kilap enepmin perikik angge famen ninirim irikip.

³⁵Ninirim irikipmu hinibam o foluk aruhu perikikteg ari tem toho ihi. Nori, ketiya niyahup fug, we hit henele ine roho uruk lit, ’Allah unuk fam tu waharukon Allahn fanowap timisi,’ uhup sambil ari eneg An niyahup,” ulug Yesusen ibag.