Read Angguruk Yali LUKAS 14 Bible Online

LUKAS 14 - Angguruk Yali bible

LUKAS 14

¹Welatfareg o wene uruk sambil hari Sabat Yesus Farisi inap onowe suwon ibam kibareg suburu naruk lit weregma ap arimanowen Yesusen wene uruk sambil famen tuk fug ane timisi ano ulug kilap haruk lit welatfag.

²Welatfagma ap misig ebe inggiket uyuhet firuhukon eke kik watfag.

³Kik watfagma Yesusen Musa wene onoluk inap men Farisi inap men unubam kapal isaruk lit, ”O wene uruk sambil ap ouk warukon hihibuk teg ano, hihibuk fug teg ano?” ulug kapal isibagma enele eleg angge welatfag.

⁴Enele eleg angge welatfagma Yesusen ap ino sen hibareg fanowap tibareg, ”Lamihin,” ibag.

⁵Lamihin ibagma ap ino libagma Yesusen ap arimano unubam, ”Henemloho eke henembohom eke ik senema wamburuk halug o wene uruk sambil welahep angge famen lisoho waruk lahep fug?” ulug kapal isibag ane fahet enele uk fug angge welatfag.

⁷Yesus ap suwon ino ibam weregma umbalisi eke kik watfareg leho ambeg eneg hur amul ulug turukmu Yesusen yer isibag. Yer isibareg indit toho hiyag isaruk lit,

⁸”Ap ekeyen seni eserik oho lit hat eke wol haptuk halug waruhunteg lehoma hur aruhun fug. Hur aruhunmu umbali suwon misig waruhumu seni ngi ahun inowen, ’Hat heriyeg lahen ambeg ari kolo rebesin, at hur arik watnisiyen,’ uhumu hat hinggali hahunteg hirahoma ap enembolma hur arik lahun tohon.

¹⁰Ap seni ngi ahun inowen wol haptuk halug waruhunteg hirahoma hur atmin ulug turukmen ap inowen yet hiyahureg, ’Nare, horog tiya hur arik ma,’ uhumu lahunteg iraham hur aruhunmu umbalisi winon arimano iniline nare ulug hi habuhu,” ulug Yesusen indit toho hiyag isaruk latfag.

¹¹Hiyag isaruk lit, ”Ap san inggarehen palimuwap tarukon apma aruhu. Inggarehen apmayap tarukon palimu aruhu,” ulug hiyag isibag.

¹²Yesusen hiyag isaruk lit ap suwon wol tibahon ino fam ele uruk lit, ”Hat unukoho men hupmu men seni isag isamin ulug ap wol enebuhun halug humbalisi men hori men hotsi howesi men tung inap hat hiraham ke werehon men wol eneptuk laruhun fug. Wol enebuhunmu iren oho seni isag isahunon fahet har oho ayeg waroho isag humul ulug wol habuhup tohon.

¹³Haren seni eseruhun halug ap enenggengge elehon men enembol simbuk tohon men unuyug siyahon men inil siyahon men wol eneptuk laruhun. It ari rohon arimanowen ayeg waroho isag hum fug teg lamuhupmu Allahn hi haptuk lit it inindimu wenggel harukon ari Allahn onolukap enebuhu sambil onggo og huruhu,” ulug Yesusen hiyag itfag.

¹⁵Hiyag isibahon ari ap at men suburu naruk latfahon misihen hol hibareg, ”Ap Allah weregma kuhupteg suburu nahubon arimano enehiyeg toho welamuhup,” ulug Yesus fam ari ibag.

¹⁶Ibagma Yesusen ele indit toho hiyag isaruk lit, ”Ap ekeyen seni suwon eseruhukon hit ap anggolo seni nahuben wamuhup ulug hiyag isarisi.

¹⁷Hiyag isarisireg seni esetuk sambil ino amingmingangge arimano misig fam, ’Seni osoho fihiyon nalihiben maniyek ehek ulug hondog enebik lamihin,’ ulug monde ferisi.

¹⁸Monde feserisimu larisireg hiyag isarisimu ap arimanowen, ’Nare, nit pok amulon fahet hindimu siyag am fug,’ uruk latusa. Ap misihen, ’Yabuk onggo paltikikteg yabuk nasehet tehen ha laminen pok atminon fahet hindi siyag am fug,’ irisi.

¹⁹Irisimu ap ekeyen te, ’Wam sapi numen ket onggo paltikikteg nasehet tehen kim isa laminen pok atminon fahet hindi siyag am fug,’ irisi.

²⁰Irisimu ap ekeyen, ’Hiyap ket hilarikikteg pok atmin,’ irisi.

²¹Irisimu amingmingangge ino ikni ambeg suhuloho waharisireg iren urusa ane hiyag itisimu ap suwon ino olok harisireg amingmingangge fam uruk lit, ’Folo-folo lamihinteg ap owahalem ke werehon enenggengge elehon, enembol simbuk tohon, inil siyahon, unuyug siyahon hondog eneplug watmihin,’ irisi.

²²Ari irisimu ap ino larisireg hondog eneplug waharisireg, ’Nikni, haren ehenon hag toho hondog enebik lahi angge nin kolo reg ambeg wereg,’ il larikim

²³ikni inowen, ’An nibam keleg toho hur amusan lamihinteg kebunggalem ke, ke ilan ke werehon arimano hele ine roho hondog eneptug watnihin,’ ulug monde ferisi.

²⁴’Ap atam wol enebihiyon pok ahasama seni eserihiyon aru tor angge oho nalusa fug, ari tem toho ihi,’ irisi,” ulug Yesusen indit toho hiyag isibag.

²⁵Misihim sambil Yesus kema larukmu ap anggolo mondeg angge laruk latfagma Yesusen hebeloho yer isibareg hiyag isaruk lit,

²⁶”Ap misig An men ambiyeg larukon inowen ikni isinga men uhe umalik men owesi otsi men irim teg lit wereg elehon ino inggareg fahet irim teg lit wereg elehon ino An namloho am fug teg.

²⁷Ap misihen An men lamin peruk anggeyen teltuk ahen ha rulug nombolim laruk elehon ino An namloho am fug teg.

²⁸Hiren te o yaron eke wibuk oho lit hur amuhupteg obamangge waruk inap men o wituk inap men fahet onggo og isarukon ari winag haruk lamuhup fug?

²⁹Winag haruk lamuhup fugmu o ino olun warukmen onggo eleg laruhumu it winonen yet hisahupteg inda yag henebuhup.

³⁰Inda yatuk lit ap aru o witmin ulug olun oho fehek angge famen onggo eleg ahama lin esehek ulug hininggaliyap henebuhup,” ulug Yesusen indit toho hiyag isibag.

³¹Nin eke hiyag isaruk lit, ”Ap suwon ekeyen o pumbuk eke min tog abul ulug otsi men laruk lit hur amuhupteg otsi unubam kapal isaruk lit, ’Nit ap teng numen aruwen teng likin fimahon nim ambi roho abehe ha reg,’ ulug otsi kapal isahu fug?

³²Kapal isahumu ambi roho welahe fug ulug ot eke monde fuhumu yoho tog abul fug ulug hiyag isa lahu,” ulug Yesusen indit toho hiyag isibag.

³³Hiyag isaruk lit, ”Ihi ane ari hit fam wirim turuk lahi: Hit henenggengge foroho lahebon ari embeselug la fug teg lahepma An notsi am fug teg lahep,” ulug Yesusen hiyag isibag.

³⁴”Saho fano angge famen olok eleg atuk halug saho olok turuk hag angge nungge nahup?

³⁵Saho olok elehon wen isapma kinang sei aruhu ulug kilabuk fug tehen hik isahup. Ap sa isanggo wereg halug isanggo fam holtuk laruhu,” ulug Yesusen indit toho hiyag isibag.