Read Angguruk Yali LUKAS 16 Bible Online

LUKAS 16 - Angguruk Yali bible

LUKAS 16

¹Yesusen otsi wene hiyag isaruk lit, ”Ap suwon tung ahun misig men amingmingangge aren angge foroho latisiyon misig men welatusa. Welatusama ap ekeyen ap suwon ino fam, ’Hat hamingmingangge inowen haren angge arimano saplangge hik-hak isaruk,’ ulug hiyag itisi.

²Hiyag itisiyon hol harisireg amingmingangge ino wol tirisireg, ’Haren nanggintikinmu an holtikik? Suwesingga uang winaharuk lit hahatuk lahenon arimano kim haminen obog toho tiya imbik ma. Kim haminteg anden angge hat foroho laruhun fuhen mondabi heriye hubaharuk lahi,’ ari ulug ele olok toho hiyag itisi.

³Hiyag itisimu ap inowen inggareg fahet wenggel haruk lit, ’Nikniyen heriye nubahakumu nanggintuk laruhuk? Yabuk wit ta fug teg lahi, ap unubam heng eneptuk ane ninggali reg lahi,’ perisi.

⁴’Nikniyen heriye nubahakumu ap winonen nit nim welamuhuk nubam ukag ulug turuk latmin ane wenggel haruk lahi,’ perisi.

⁵Perisireg ap suwonen og isaruson paleg angge reg latuson arimano misig-misig wol eneptusareg te ap atam waharisiyon ino fam, ’Nikniyen angge nunggeyen paleg lahen?’ ulug kapal harisi.

⁶Kapal harisimu, ’Wam sei ahaluwe kubag teng uhan paleg lahi,’ irisimu, ’Paleg lahen angge fahet suwesingga haharoho foroho lahiyon tu wereg. Hur atmihinteg folo-folo kim haruk lit kubag teng uhan ware fesemihinteg kubag teng piren haharin,’ ulug hiyag itisi.

⁷Hiyag itisiyon ino larisimu pirenehon ino waharisimu ubam kapal haruk lit, ’Nikniyen angge nunggeyen paleg lahen?’ irisimu, ’Nasi anggen sum teng uhan paleg lahi,’ irisimu, ’Paleg lahen angge fahet suwesingga haharoho foroho lahiyon tu wereg. Sum teng uhan ware fesemihinteg sum teng hinahan haharin,’ ulug hiyag itisi.”

⁸Ari hiyag itisi ulug Yesusen otsi hiyag isibareg nin ele uruk lit, ”Ap suwon amingmingangge inowen ikni angge hondo ribisibag angge famen fobik welaruhuk ambeg nangginoho welaruhuk ulug indi anggar atisi,” ulug Yesus ap ino wel turuk latfag. ”Ap kinangmon inindi folo-folo anggar atuk angge famen it seleg tegma wereg inap arimano inindi folo-folo anggar atuk eleg,” ulug Yesusen otsi indit toho hiyag isibag.

⁹”Uang siyahon ari fam ayeg war isa fug tehen hunumbaliyen oho Allah men mondabi welamuhuk ukag ulug uang siyahon ari fam ap ari pali war enebuhup,” ulug Yesusen indit toho hiyag isibag.

¹⁰”Ap misihen tor angge famen fano roho foroho laruhu halug su angge oho fano roho foroho laruhu. Tor angge famen siyag toho foroho laruhu halug su angge oho siyag toho foroho laruhu.

¹¹Nori, uang siyahon fano roho foroho lam fug teg lahep halug anggengge fanowon nangginoho foroho lamuhup?

¹²Ap enenggengge siyag toho foroho lahepma hiren angge san og hisa reg?” ulug Yesusen kapal isibag.

¹³”Ap misig iknisi piren werehonen mingming turukmu enele fano holuk fug teg. Ikni misig fahet nirim peruk lit ikni eke fahet ele fano holmin peruk. Hebeloho re ikni misig fahet fano peruk lit ikni eke fahet nirim ulug ele holtuk eleg. Allah Ninikni apma welahe uruk lahep halug uang siyahon apma welam fug teg lahep,” ulug Yesusen hiyag isibag.

¹⁴Farisi inap uang fahet ninindi peruk latfag inap arimano Yesusen hiyag isibag ane hol hibareg ehekon ari siyag ane ehek ulug inda yako inggaliyap tibag.

¹⁵Inggaliyap tibagma Yesusen hebeloho hiyag isaruk lit, ”Hiren ap iniline niren pikir ane eneg turuk lahe uruk lahep angge famen Allahn hunundama peruk lahebon ari hisaruk lit wereg. Ap kinangmonen palimu wereg peruk ane fahet Allahn apma wereg peruk.

¹⁶Yohanes ap ikma pilap eneptuk latisi ahun uwan wam fugmu Musa wene men atam hiyag isaruk latfag inap arimanowen ibag ane men wene ari senegman eneg Yohanes kik waharisi. Yohanes kik waharisimu ketiya Allah ap obog toho Hinikni aruhu ulug wene fanowon ino hiyag isaruk. Hiyag isarukmu ap anggolo miyaltil kik waharuk,” ulug Yesusen hiyag isibag.

¹⁷”Pohol men kinang men eleg am teg angge famen wene haharehon fam ilanggen tor angge werehon eleg am fug teg.

¹⁸Aben uhe subon embeselug keron hilaruk halug siyag ane turuk. Hiyap ahun subonen embeserukon ap ekeyen hilaruk halug siyag ane turuk,” ulug Yesusen hiyag isibag.

¹⁹”Ap suwon tung ahun eke wereg lit sum fanowon eneg wan turuk lit suburu men wam men likiya hupmu naruk lit ahiyeg toho welatisi.

²⁰Ap siyahon eke anggengge eleg ahun ahap salukangge reg ahun unuk Lazarus ino

²¹suburu anggen men ahap men ap suwon inowen embeserukon namin ulug owahalma libareg yinggig latisi. Yinggigmu mene waharusareg ebene yowil arimano milang heheg naruk latusa.

²²Misihim welatusareg ap siyahon ino war atisimu malaikaren hondoholug Abraham heriyeg ambeg fanoma imbik larusa. Ap suwon ino oho war atisimu kinangma sale feserusa.

²³Sale feserusama ap warehon wereg ambeg libareg ouk anggolo waruk ambeg wereg lit yet harukmen Lazarus ino Abraham min fanoma yatma weregma yet harisi.

²⁴Yet harisireg ele hi roho uruk lit, ’Nikni Abraham, an hindi niyimin. Lazarus ino inggik tum ikma tung halug nambilikanggenma ik ahaluwe are ribik watmisiyen monde femihin. Indok aruwen siyahap naptuken ouk anggolo roho welahi,’ irisi.

²⁵Irisimu Abraham inowen, ’Namloho, hat holuk wereg lit fano roho welatikin. Lazarus oluk wereg lit siyag toho welatisi angge ketiya tuma ahiyeg toho wereg. Hat te arima siyagma welahen.

²⁶Hit honggoleg nit honggoleg fanggong yaron werehen nit filen hit fil wam fug teg. Hit filen nit fil wam fug teg,’ irisi.

²⁷Irisimu ap suwon inowen, ’Nikni, an nibam notsi fuwaben werehon

²⁸ir oho siyag ane turuk lit an welahi ambeg siyagma wamuhup tohon komo enebuhuwen Lazarus monde femihin,’ irisi.

²⁹Irisimu Abrahamen, ’Musa wene men Allah wene hiyag isaruk latfag inap enewene werehon ari fam onoluk aruhu,’ irisi.

³⁰Irisimu, ’A, nikni Abraham, ari fam onoluk aruhu fug. Atam war atisiyon oluk atug enembeg lelepma siyag ane embeselug holtep,’ irisi.

³¹Irisimu Abraham inowen, ’Musa men Allahn ibag ane hiyag isaruk latfag inap men enele holtuk eleg halug ap atam war atisiyon oluk atug hiyag isa lahumu holuhup fug,’ irisi,” ulug Yesusen hiyag isibag.