Read Angguruk Yali LUKAS 17 Bible Online

LUKAS 17 - Angguruk Yali bible

LUKAS 17

¹Yesusen otsi komo eneptuk lit, ”Ari roho tin ulug ap inindi kahaltukon ari wereg laruhu famen ap ari roho tin ulug inindi kahaltuk ahun ino inggareg indi anggin aruhu.

²Ap inine elehon inindi kahal enebuhu rohon ap ino helep simbuk humon anggolopma ililoho ik ahummu hik isahupmu fano.

³Hininggareg anggat toho welamok! Hare misig siyag ane turuk halug komo riyok. Nambiken tirikik ulug wenggel haruk halug eleg aha piyok.

⁴Hareyen hat hubam o misihim sambil sabirenam olok ane turuk halug sabirenam hambeg suhuloho waharuk lit, ’Nare, hubam siyag ane tihireg mangno ul,’ uruk halug nindimu eleg aha uhun,” ibag.

⁵Yesus otsiyen Onowe fam heng turuk lit, ”Nonowe, ninindi Allah fam wenggel harukon ninineyap nenebin,” ibag.

⁶Ibagma Yesusen, ”Hinindi Allah tem peruk lit wene soluk anggen hahon hunundaman tot welalep halug hiren, ’E ara ahen umanggener angge heneko ik ahummu yag arik lag,’ elepma yag arik lelep,” ulug ele indit toho hiyag isibag.

⁷”Hit aruma welahebon sehelimu misig amingmingangge werehon eke wereg. Amingmingangge ino yabuk wituk angge wam foroho angge ibam waharuk halug, ’Suburu hat tam na ma!’ ulug hiyag utuk lahep?

⁸Ari hag toho turuk lahep fug. ’Suburu an fahet esetmihinteg osoho felug sum fanowon wan toho hondog nabik watnihinmu namin. Suburu men ik men an tam naminmu hat fobik namihin uruk lahep,” ibag.

⁹”Amingmingangge inowen at let turuk ane fahet namloho ulug hi ruruk eleg, we tuk ane tehek peruk.

¹⁰Amingmingangge ari hag toho hit An notsi welahep. Allahn ari turuk lamuhup ulug hiyag hisahuwon ino obog toho tebuhupteg amingmingangge siyahon eneg welahe uhup. Niren turukuk ane ari Allahn telep peruk ane turukuk uhup,” ulug otsi hiyag isibag.

¹¹Yesusen Yerusalem lamin ulug Galilea embeselug Samaria keyen laruk latfag.

¹²Laruk latfareg o pumbuk eke larukmen ap numen enehap salukangge reg inap luhaloho wereg lit yatman Yesus yet hibag.

¹³Yatman Yesus yet hibareg enele hi roho uruk lit, ”Yesus Nonowe fanowon, Haren hindi nisimin,” uruk latfag.

¹⁴Uruk latfagma Yesusen it yer isibareg, ”Imam inap enembeg henehap kim hisalusan lalihip,” ibagma larukmen keman fano atfag.

¹⁵Fano atfagma at numon ino ahap fanowon kim hibareg, ”Yesusen ari ehekma fano ahi,” pibareg suhuloho watfareg ele humon fam Allah wel til waharuk latfareg

¹⁶Yesus alukema hur atfareg, ”Yesus Nowe,” uruk latfag. Yesus Nowe uruk latfag ahun ino Samaria ahun welatfag.

¹⁷Samaria ahun welatfagma Yesusen, ”Hit numen fano ahasa pihi angge famen we hat numon eneg wahen? Sohowen kema wereg?” ulug kapal hibareg,

¹⁸”We amu ahun aru eneg suhuloho wahareg Allah wel turuk?” ibag.

¹⁹Ari ibareg, ”In atug lamihin, An nubam wenggel hehenteg wahenon ariyen fano ahen,” ibag.

²⁰Ap Farisi inap welatfahon itanowen Yesus fam kapal haruk lit, ”Allah waruhuwon nosambil waruhu,” ibagma Yesus hebeloho, ”Allah waruhu ehebon ino enehangge turukmu yet haruk lahep hag toho waruhu fug.

²¹Aben te, ’Yet hemek, Allah tuma wereg, lumu wereg,’ uruk lam fug teg. Allah ap obog toho Inikni aruhuwon ino hit sehelimu wereg ulug ari tem toho hiyag hisaruk lahi,” ibag.

²²Ari ibareg otsi unubam uruk lit, ”Hit fobik welamuhupteg hup misihim At ap kinangmon atik ibahon kim hilareg welala puhup angge famen hahup fug.

²³Aben hit hunubam enele uruk lit, ’Yet hemek At umu wereg, tuma wereg,’ uruk lamuhupmu holuhupteg yami ruk fug angge enele holoho umbusuhup.

²⁴Lebeglu pohol alem filen atog fil lebeg turuk hag toho At ap kinangmon atik ibahon ino waruhu sambil ari inam aruhumu hiren yet hahup.

²⁵Ari roho uwan inam am fugmu miyaloho hik isahupteg ebe wabuhup.

²⁶Ap kinangmon atik ibahon ino waruhu sambil ari indam Nuh umalikisi unubam atfahon ino hikit toho aruhu.

²⁷It indam welatfahon arimano suburu nenggeg ik nenggeg turuk lit aben hiyap heleheg hiyaben ap heleheg turuk lit welatfagma Nuh kou fam kibag sambil ino ik humon yenggeltil laharuk lit it arimano waroho lin ibag.

²⁸Lot umalikisi welatfahonen oho ari hag toho turuk latfag. Iren oho suburu nenggeg ik nenggeg og eseheg onggo paloho heleheg yabuk wireheg o wireheg turuk lit welatfagma

²⁹hun Lot ino Sodom embeselug libag sambil ino indok men helebanggen men poholman o pumbuk ino fam pilabik watfagma it arimano obog toho waroho lin ibag.

³⁰Ap kinangmon atik ibahon ino inam aruhu sambil ino ap arimano ari hag toho welamuhup.

³¹O ari tuhu sambil ino silimu o palimu heriyeg lit welaruhuwon at anggengge mun angge man angge olma werehon hilamin ulug kuhu fug. Yabukmu werehon ino nibam suhuloho lamin puhu fug.

³²Lot uhe inowen tibag ane wenggel homok!

³³An noluk welaruhuk peruk lit wereg ahun ino oluk welaruhu fug. Longgo uhuk peruk lit wereg ahun ino Allah olohotma mondabi oluk welaruhu.

³⁴Allah waruhu sambil ino hubanggo ap piren misigmu nohoruk lamuhup angge famen misig hilahureg eke umbusuhu ulug tem toho komo heneptuk lahi,” ibag.

³⁵”Hiyap piren misigmu roti anggen lilibug turuk lamuhup angge famen misig hilahureg eke umbusuhu.

³⁶Ap piren yabuk wituk lamuhup angge famen misig hilahureg eke umbusuhu,” ulug hiyag isibag.

³⁷Hiyag isibagma otsiyen Yesus fam kapal haruk lit, ”Keman tuhu ane fahet ehen?” ibagma Yesusen, ”Sobon men pamo men enele ngu ruruk halug ari amben angge ita wereg peruk lahep,” ulug hiyag isibag.