Read Angguruk Yali LUKAS 19 Bible Online

LUKAS 19 - Angguruk Yali bible

LUKAS 19

¹Yesus o Yerusalem lamin ulug o Yerikho keyen laruk latfag.

²Larukmen ap eke unuk Zakheus pemerintah amingmingangge ap fam uang embelug lalihip uruk inap onowe aren angge anggolo werehen at tung ahun hag toho welatfag.

³Zakheus inowen Yesus yet ha lamin ulug libareg at uwag horog tehen ap anggolo arimanowen mapmu rehen yet ha fug teg latfag.

⁴Yet ha fug tehen folo-folo olohotma arik libareg Yesus ke aru waharukmu yet hamin ulug e ara fene lahibag.

⁵Lahibareg weregma Yesus iraham libareg lahap haruk lit, ”Zakheus, hat hibam ketiya lulen folo wambik ma,” ibag.

⁶Ari ibagma folo-folo wambibareg ahiyeg haruk lit Yesus hondoholug ibam libag.

⁷Ibam kurukmu aben yet hibareg, ”Ap siyag ane eneg turuk ahun ibam nungge fahet kehek,” ulug enele siyag toho uruk latfag.

⁸Uruk latfagma Zakheusen Yesus fam ele uruk lit, ”Nowe, ap hiyap enenggengge elehon anden angge pul ke minggiroho og isamin,” ibareg, ”Aben tohon hilarikikon fahet oho iren angge fahet sebe roho uhanam ayeg war isamin,” ibag.

⁹Ibagma Yesusen, ”Ap aru oho Abraham amloho werehen te Allahn o aru yoho fanowap tehek,” ibag.

¹⁰”At ap atik ibahon ino it longgo uruson hiyag enebuhukteg fanowap enebuhuk ulug waharisi,” ibag.

¹¹Yesusen hiyag isibahon ari holfag inaben Yerusalem horogma welahereg Allah wambik waruhureg nit fanowap nenebuhuwon horog toho welahe peruk latfagma Yesusen wirimangge eke hiyag isamin pibag.

¹²”Ap suwon misig o yatma lamin perisi ambeg ino ap suwon arik lahukteg nin fobik suhuloho nibam waruhuk ulug larisi.

¹³Lik oho lit amingmingangge numen wol enepfareg wal taneg uang suwon og isarisi. Og isaruk lit, ’Uang aru fam onggo paleheg ayeg war eseheg turuk lamuhupmu an waruhuk,’ irisi.

¹⁴An fobik waruhuk ulug larukmen ibam yugmu inap arimanowen at nit nonowe roho welaruhu fuhen ninirim ulug ombolim muko lalihipteg hiyag irik lalihip ulug ap mon eneptusa.

¹⁵Mon eneptusama at ino larisireg ap suwon atisireg ibam suhuloho waharisireg amingmingangge uang og isarisi inap arimano wol eneptisi. Uang og isarikikon nombaren ayeg waroho warusa perisireg hiyag numusa ulug wol eneptisi.

¹⁶Wol eneptisimu ap atamon ino waharisireg hiyag utuk lit, ’Nikni, haren og nitikinon ino anden ayeg waroho numen warikik,’ irisi.

¹⁷Irisimu ikni inowen, ’Namloho, haren turuk latikin ane fano hiyag nerehen. Tor angge famen fano roho foroho latikinmu o pumbuk numen fahet inikni ap suwon welaruhun,’ irisi.

¹⁸Ari irisimu ap pirenehon ino waharisireg, ’Nikni, haren og nitikinon fam fuwaben ayeg waroho warikik,’ irisi.

¹⁹Irisimu ikni inowen, ’Hat eke o pumbuk fuwaben inikni roho wereg laruhun,’ irisi.

²⁰Irisimu amingmingangge hinahanehon ino waharisireg, ’Nikni, hat holok hahun ulug nakolen an og nitikinon ino wilikap fam het toho foroho latikik angge tu hilamihin. Emberikin fuhonet sebe roho hilaruk lahen. Yag tarikin fuhonet sebe roho yahal taruk lahen. Ari roho turuk lahen ane an noluk,’ irisi.

²¹

²²Irisimu ikniyen, ’Namloho hat siyag, hinggarehen ehenon ari fam hebeloho pet hapnin. Emberikik fuhonet yag tarikik fuhonet nolok nahunen hilaruk lahi ane hat holuk teg lahen.

²³Holuk teg angge famen uang og hitikikon nungge fahet ap winon og isarikin fug? Og eselenma iren ayeg waroho og hetlepma sebe roho helele,’ irisi.

²⁴Irisireg ap welatuson arimano fam, ’Uang ari taluk tilihipteg numen forohowon ino og emek,’ irisimu

²⁵ap arimanowen, ’Ninikni, aren numen foroho angge re nin eke nungge fahet sebe roho og umul,’ ulug kapal harusa,” ulug Yesusen hiyag isibag.

²⁶Hiyag isaruk lit, ”Enengge anggolo forohowon itano Allahn sebe roho og isahu, enengge elehon itano tor angge forohoman taluk toho hilahu,” ulug pikit toho hiyag isibag.

²⁷Hiyag isibareg ap suwonen tuhu ane hiyag isaruk lit, ”An men seli roho welatuson tuman ap suwon arik waruhu fug urusa inap arimano tuma hondog eneplug wamuhupmu an nolohotman waroho lin isahup ulug ap suwonen ari irisi,” ulug hiyag isibag.

²⁸Wene ari obog toho hiyag isibareg Yesus tam atfagma otsi men Yerusalem fil laruk latfag.

²⁹Yerusalem fil laruk latfareg Yesus o Betfage men Betania men Zaitun punumu wirihon itano horogma libareg otsi piren unubam hit tam laruk lamek ulug mon eneptuk lit,

³⁰”O pumbuk lindi lalihipteg keledai umalik ket su atukon ap ubam laharusa fuhon ililoho weregma halihibon ari loltihipteg walug watihip.

³¹Aben nungge fahet loltuk lahep ulug umung hisaruk halug, ’Nonowe asehet tehen mon nenebehekma loltuk lahe,’ ilihip,” ibag.

³²Ibagma Yesus otsi piren mon enepfahon itano libareg Onoweyen hiyag isibahon hikit toho weregma libag.

³³Libareg keledai umalik ino loltukmen ngi inap arimanowen, ”Nungge fahet loltuk lahep,” ibagma iren te, ”Nonowe asehet tehen mon nenebehekma loltuk lahe,” ibag.

³⁴

³⁵Ibareg keledai ino Yesus ambeg walug watfareg enesum wan tohon nonggoloho keledai palimu tuwale fibareg Yesus hamboko horiye fik lahibag.

³⁶Lahibareg larukmen ap arimanowen enesum nonggoloho Nonowe watmisi ke ulug funggalem ke tuwaltil laruk latfag.

³⁷Tuwaltil laruk lit Zaitun punumu wamburuk lit Yesus otsi men ap anggolo laruk latfahon arimanowen enehiyeg atfagma enele humon fam Allah wel turuk lit, ”Mun angge man angge aben tuk fug ane nonolohotman tirisiyon yet harukuk.

³⁸Ap suwon Allah unuk fam waharukon hi ruruk lahe. Poholman palimu werehon Allahn fanowap tirisimu At wel turuk lamuhup,” uruk latfag.

³⁹Ari uruk latfagma Farisi inap it sehelimu werehonen Yesus fam enele uruk lit, ”Nonowe, hotsi enele eleg amusan komo enebin,” ibagma

⁴⁰Yesusen, ”An notsi aruma enele eleg amusa halug helep aruman enele hi roho ulusa. Ari tem toho ihi,” ibag.

⁴¹Ari ibareg Yesus o Yerusalem horogma libareg o pumbuk yet hibareg uba yatuk lit,

⁴²”O Yerusalem nindiyen-e, hat fanowap habuhuwon ino yoho holuk toho welalen angge famen ketiya hat holohotma ari hiraho lit wereg.

⁴³Tot welaruhunmu ap seliyonen walinggoho kilap habuhupteg huwabuk oho lit kinang amuwon habuloho o Yerusalem elehet yaron ohowon ino horohap tuhupteg kuhup.

⁴⁴Kuhupteg hibam halog tebeseruk lit humalikisi unusuruk lit helep elehet ohowon ubule misig oho welaruhu fug. Allahn fanowap hapmin perisi sambil ari haren wenggel harikin fugmu ari roho huwabuhup,” ibag.

⁴⁵Yesus o Yerusalem Allah ibam kibareg onggo paloho ayeg waroho waruk inap yanggal eneptuk lit,

⁴⁶”An nibam tu sembahyang uruk ibam haharoho wereg angge famen hiren siyag ane turuk inap inibamap tirikip,” ibag.

⁴⁷Ibareg likiya hupmu Allah ibamen wene hiyag isarukmu imam onowesi suwon men Musa wene onoluk inap men Yahudi onowesi suwon men alem nungge fam umbuhukteg wabuhuk ulug enele sahaltuk latfag angge famen ap anggolo wene fanowon holtul ulug luhal arik watfagma senebuk fug teg latfag.