Read Angguruk Yali LUKAS 2 Bible Online

LUKAS 2 - Angguruk Yali bible

LUKAS 2

¹Welatfagma ap suwon Kaisar Agustus inowen ap obog toho kema-kema werehon ununuk suwesingga fam emberuk lit winag isahup ulug otsi mon eneptuk latfag.

²Otsi mon eneptuk latfag sambil o Siria ap suwon eke unuk Kirenius welatfag. Ununuk suwesingga fam emberuk latfahon ari re atam oho imbibag fuhon we ari sambil eneg imbibag.

³Ap obog toho nununuk suwesingga fam umbukag ulug inikni unumba welatfag ambeg laruk latfag.

⁴Yusuf o Galilea kinang fam o Nazaret welatfag ahun ino an Dauren ondohowonen indag nasug ulug Daud welatfag ambeg Yudea punumu o Betlehem ino libag.

⁵An oho nuhe oho nununuk suwesingga fam umbukag ulug uhe Maria malik ahummu fet talugmu ambiyeg libag.

⁶O pumbukmu libareg Maria ino malik indag ta hag teg latfag.

⁷Indag ta hag teg latfareg malik wandabon ap angge indag tibag. Indag tibareg malik ino sum fam yinggiloho fanoma it nohoruk ambeg elehen te wam domba suburu naruk ambeg imbik libag.

⁸O Betlehem ino horogma wam domba elehet oko kilabeg ambeg domba foroho inap arimanowen hubanggo enembohom foroho latfag.

⁹Foroho lit weregman malaikat Allahn monde fibagma enembeg wambik watfareg it horogma unduhukmu enebene umbagpag turuk latfagma enekol anggolo haruk latfag.

¹⁰Enekol harukmen malaikat inowen, ”Hit henekol ha fug. Anden fano wene walug wahiyon aru ap obog toho fahet walug wahi. Wene aru hinisanggo fam holuhupteg henehiyeg hahup.

¹¹O yoho re fanowap henebuhuwon Nonowe Kristus ino Daud indam welatfag ambeg indag tehek.

¹²Malik ino ha lalihipteg tem pelihiben hiyag hisamin: Malik ket indag tehekon ino sum fam yinggiloho wam suburu naruk ambeg yinggig lit weregma ha lalihip,” ulug hiyag isibag.

¹³Hiyag isibagma malaikat misig ino wereg ambeg it poholmon obog toho palu arik wambik watfareg Allah wel turuk latfag.

¹⁴”Ninikni Allah poholma werehon wel turuk lamuhup. Allahn ap kinangmon indi enesug lit werehon arimano mangno roho welamuhup,” uruk latfag.

¹⁵Ari uruk latfareg poholma lahibagma wam domba foroho inap arimanowen, ”O Betlehem lulteg Ninikni Allahn malik indag tehek ulug hiyag nesehekma ha lul,” ibag.

¹⁶Ibareg folo-folo libareg Maria ino Yusuf men unumalik indag tibahon ino wam suburu naruk ambeg yinggig lit weregma isa libag.

¹⁷Malik ino weregma hibareg, ”Wene malik tu fahet malaikaren hiyag nesehek,” ulug ap arimano fam hiyag isibagma holfahon arimano enekol hibag.

¹⁸

¹⁹Enekol toho weregma Maria wene ari indimu wenggel haruk latfag.

²⁰Wam domba foroho inap arimano malik ha libareg suhuloho waharuk lit, ”Mun ane man ane malaikaren hiyag nesehekon ninisanggowen holehereg ninilen ha wahe,” ulug Allah wel turuk latfag.

²¹Yesus indag tibag sali hup likinenam welatfareg ambilahap paltuk sambil ino yoho welahe ulug malik isinga ahummu am fugmu malaikaren unuk Yesus suwaluhun ulug hiyag itfahon ino suwalfag.

²²Musa wene fam atam haharoho imbibahon hikit toho hiyap malik ket indag talug selma la fug angge olma welamuhup ulug hahatfag hag toho Maria oho olma welatfag angge yuhun atfag sambil ino Maria ahun men unumalik Ninikni Allah ubam unug hul ulug Yerusalem laruk latfag.

²³Musa wene fam haharoho werehon aru re, ”Ap umalik wandabon Ninikni Allah ngi roho welaruhu,” ulug haharoho imbibag.

²⁴Nin eke, ”Suwe yalma suwon piren yaltuk lamuhup. Suwon eleg halug toron piren yaltuk lamuhup,” ulug hahatfahon ino hikit toho iren oho yaltuk latfag.

²⁵O Yerusalem ap misig unuk Simeon fano ane turuk lit Allah fahet akol toho wenggel haruk lit Israel inap fanowap enebik oho waruhuwon yet teg lit welatfag. Welatfahon ino Allah hime fanowon ubam wereg lit,

²⁶”Mesias Ninikni Allahn monde fuhumu waruhuwon ino yet hahunteg eneg war aruhun,” ulug Allah hime fanowon inowen hiyag itfag.

²⁷Yesus ikni isinga menen Musa wene fam turuk latfag ane tul ulug Yesus walug Allah ibam kibagma Allah hime fanowon inowen Simeon hondoholug watfag.

²⁸Hondoholug watfagma olma kuruk lit pen hibareg malik ino mako pug toho hi ruruk lit Allah wel turuk latfag.

²⁹”Allah Nikni, ketiya an Hat hamingmingangge hinggik obog nubahakunmu nindi se roho nahiyeg toho Haren hiyag nitikin hag toho lahuk.

³⁰Nit fanowap nenebukag ulug monde fik waharikinon ino nilen hihi.

³¹Haren ap obog toho fahet mumal tarikinon ino

³²o pumbuk obog toho seleg amag ulug iral hag toho emberikin. Ap obog toho arimanowen Israel inap sehelimu iral fanowon wereg ulug wel eneptuk lamuhup,” ibag.

³³Hun Simeonen ari ulug Allah wel turukmu ikni isinga menen hol hibareg, ”Nungge ane uruk,” ulug enekol hibag.

³⁴Enekol hibagma Simeonen ikni isinga hi enepfareg isinga Maria fam ele uruk lit, ”Israel inap eke pilap enebuhu, eke lahap enebuhu ulug Allahn malik ari mumal tarisi. Aben siye teberuk hag toho Allahn malik aru siyengge hag toho pilabik waharisi angge famen ap ekeyen ninirim ulug pisan isalug laruk lamuhup.

³⁵Hat hindimu karog olokon ahako folok tuhu. Siye ari fam ap anggolo inindimu wenggel harukon inam aruhu,” ulug Simeonen isinga hiyag itfag.

³⁶Weregman Asyer hiyap eke unuk te Hana Fanuwel ahaloho welatfag. Hana ino ap ohoma mo ilig am wirig am turukmu sabiren atfagma ahun war atfagma yuwog weregman sabal atfag.

³⁷Indag tibahon sali mo ilig am wirig am turukmu teng hinahanman nubam hilag hinahan 84 welatfareg yaman atfag. Allah wene uruk ibam embeselug wilip am fug angge hiyang wereg lit likiya hupmu sembahyang uruk latfag.

³⁸O ari sambil Yesus ikni men isinga men weregma watfareg Allah wel turuk lit ap arimano o Yerusalem inap windar enebuhuwon waruhu ulug yet teg latfahon arimano unubam malik Yesus fahet hiyag isaruk latfag.

³⁹Obog toho hiyag isibagma Musa wene fam turuk lamuhup ulug haharoho imbibahon hikit toho obog toho tebehe ulug inibam yugmu o Galilea kinang fam o Nazaret suhuloho libag.

⁴⁰Libareg welatfagma malik ino ebe ine roho su atfareg Allahn malik ari indi reg lit let turukmu indi anggat teg lit tuk hag ane eneg turuk latfag.

⁴¹Mo ilig am wirig am turukmu Yesus ikni isinga men wam Paskah esetukmu nahuk ulug o Yerusalem laruk latfag.

⁴²Yesus indag atfahon mo ilig am wirig am turukmen nisanggowen 12 atfagma ikni isinga laruk latfag hag toho enemloho hondoholug wam Paskah fahet o Yerusalem libag.

⁴³Paskah ino obog toho tibagma malik Yesus ino o Yerusalem pok atfagma ikni men isinga men enepeleg toho suhuloho inibam fil laruk latfag.

⁴⁴Ap uwan nonombolim waharukon men waharuk pibareg larukmen hup atfag. Hup atfagma nonori men ap winon nit nim werehon arimano men wereg lam ulug yami ruruk latfag.

⁴⁵Eleg latfagma nin suhuloho Yerusalem libareg yami ruruk latfag.

⁴⁶O hinahanam yami ribareg Allah wene uruk ibam weregma hiyahibag. Musa wene hiyag isaruk inap walinggoho weregma At pulmu heriyeg lit it enele holeg lit kapal isaruk lit welatfag.

⁴⁷Aren kapal isaruk ane holtuk latfag inap arimanowen indi anggat teg umalik ele tem ane uruk umalik tu ulug yihi peruk latfag.

⁴⁸Ari peruk lit weregma ikni isingan yet hibareg yuk libag. Yuk libareg isingan, ”Namloho, nungge fahet nit nunumbahalug longgo irikin? Hikni men an men ninindi anggin toho Hat yami haptuk lahe,” ibag.

⁴⁹Ibagma Aren te, ”Nungge fahet An yami naptuk lahep? An nikni ibam welam hag toho welahiyon hit henepeleg?” ibag.

⁵⁰Ari ibag ane fahet nangginoho ehek ulug inindi su atfag.

⁵¹Inindi su atfagma ikni men isinga men ambiyeg Nazaret libareg weregma ikni isingan uruk ane asukun fano roho turuk latfag. Yesusen ibag ane isinga indimu wenggel haruk latfag.

⁵²Welatfagma Yesus su atuk lit indi anggar atuk latfagma Allahn indi harukmen aben oho fano ane eneg turuk ulug inindi haruk latfag.