Read Angguruk Yali LUKAS 20 Bible Online

LUKAS 20 - Angguruk Yali bible

LUKAS 20

¹Misihim sambil Yesusen Allah ibamen wene fanowon hiyag isarukmu imam onowesi suwon men Musa wene onoluk inap men Yahudi inap onowesi men ambeg libareg kapal haruk lit,

²”Haren turuk lahenon ari san hineyap haptisireg holukap haptisimu turuk lahen, nir oho hiyag nisimin,” ibag.

³Ibagma Yesusen, ”Anden oho hit hunubam hebeloho kapal hisamin.

⁴Yohanesen ap ikma pilap eneptuk latisiyon ari poholman perisi ane ano, ap kinangmonen perusa ane ano ulug hiren An hiyag nemek,” ibag.

⁵Ibagma it-it enele sahaltuk lit, ”Poholman perisi ane ul halug nungge fahet at ele holtikip fug ik ohoreg.

⁶Ap kinangmonen perusa ane ul halug ap aruman Yohanes ari Allahn monde ferisiyon tem toho peruk lit helep fam nunusuk ohoreg,” uruk latfag.

⁷Uruk latfareg Yesus fam, ”Nenepeleg,” ibagma

⁸Yesusen, ”Hiren nenepeleg ehepma Anden oho An nineyap naptisiyon fahet hiyag hisamin fug,” ibag.

⁹Yesusen ap anggolo weregma indit toho hiyag isaruk lit, ”Ap misihen hele anggur yabuk wiri feserisireg ap winon foroho lamuhup ulug hiyag isarisireg o yatma larisireg amusun toho welatisi.

¹⁰Welatisireg anggur anggen urukon li waharuk ulug anggen eke minggiroho numbahakup ulug amingmingangge monde ferisi. Monde ferisimu yabuk foroho inap enembeg larukmen ware feserusareg og humul fug ulug yanggaltusa.

¹¹Yanggaltusama nin amingmingangge eke monde ferisimu ino oho ambi roho ebe watuk lit har oho og humul fug ulug yanggaltusa.

¹²Yanggaltusama amingmingangge hinahanehon monde ferisimu ebe ware feserusareg miyaloho hik isarusa.

¹³Hik isarusama ngi ahun inowen nangginoho timin perisireg namloho nindiyon monde feminmu at fahet enekol hahup perisireg monde ferisi.

¹⁴Monde ferisimu waharukmu yet harusareg, ’Yabuk ngi aruhuwon ino waharuken pinggi ware fusulteg yabuk nit ngi amuhuk,’ ulug enele sahaltuk latusa.

¹⁵Sahaltuk latusareg waroho elehet selma hik isarusareg pinggi ware feserusa. Yabuk ngi ahun ino waharuk lit yabuk foroho inap unubam nangginuhu,” ulug Yesusen ele indit toho kapal isibag.

¹⁶Kapal isibareg, ”Ngi ahun waruhureg yabuk foroho inap waroho pinggi unusuhureg yabuk ino ap winon hiyag isahu,” ibag. Ari ibagma ap arimanowen hol hibareg, ”Ari roho tuk fug teg,” ibagma

¹⁷Yesusen yer isibareg, ”Wene atamon fam haharoho imbibahon iminon tu holeg lamok, ’O wituk inaben helep tu siyag ulug hik isaruson ino ubule yag atisi.’ Nungge ulug haharoho imbibag?

¹⁸Ap eke helep ubule ino fam uyug kik turuk lit mako wambuhureg uyug fala roho uwag lilibug toho lin uhu. Helep inowen ap ino hondo ruhu halug ap ino lilibug toho kinang aruhu,” ulug Yesusen hiyag isibag.

¹⁹Hiyag isibagma Musa wene onoluk inap, imam onowesi suwon arimanowen, ”Yesusen hiyag nesehekon ari nit fahet ehek,” ulug enele sahaltuk lit o ino sambil Yesus ki rul ulug tibag angge famen ap anggolo enekolen imbisibag.

²⁰Musa wene onoluk inap men imam onowesi men Yesus uruk ane aluwat halihip ulug ap mon eneptuk lit, ”Yesusen siyag ane uruk halug senebuhukteg pemerintah ap suwon wereg ambeg hondoholug lahuken Aren uruk ane aluwat haruk lit Yesus ele holtuk inap hag toho turuk latihip,” ibag.

²¹Ibagma libareg Yesus fam kapal haruk lit, ”Nonowe, ap winon fahet nakol puk fug angge hele uruk lahenon Allahn peruk hag toho hindi wirik toho hiyag isaruk lahen.

²²Ap suwon Kaisar inowen uang heng neneptukmu og um teg ano, og um fug teg ano?” ulug kapal hibag.

²³Kapal haruk lit unundaman un ane wenggeltuk lit urukon ari Yesusen oluk atfareg,

²⁴”Uang anggen misig og nirik maniyek, kim haminen, orohole ilit tehon men unuk haharehon men ap sa hahareg lit wereg?” ulug kapal isibagma, ”Kaisar orohole men unuk men hahareg lit wereg,” ibag.

²⁵Ari ibagma Yesusen hebeloho ele uruk lit, ”Kaisar og um hahon Kaisar og umuhup. Allah og um hahon Allah og umuhup,” ibag.

²⁶Yesusen ari roho hiyag isarukmu hol hibareg unggum ubam umbul pibahon ino umbuk fug teg latfagma enekolen enele eleg angge welatfag.

²⁷Misihim Saduki inap ap war atukon Allahn onolukap enebuhu fug peruk inap Yesus ambeg watfareg,

²⁸”Nonowe, Musan nit fahet haharoho imbibahon te: Ap misig umalik indag ta fug angge uhe tuhum weregma lin isalug war atukmu areyen nowe ubalmangge malik enderuhuk ulug hiyap ino hilahu ulug haharoho imbibag ane fahet niren kapal huyul,” ibag.

²⁹”Ap misig umalikisi enebe sabiren welatusa. Onowe wandabonen hiyap hilarisireg malik endebuk fug angge war atisi.

³⁰Hiyap oweyen lin tirisiyon ino ot pirenehon inowen hilarisireg at ino oho malik endebuk fug angge war atisi.

³¹It piren itano war atusa hag toho hiyap misihon ino ekeyen wilil ekeyen wilil turukmen it fuwaben itano oho obog toho malik endebuk fug angge war eneg atuk latusama

³²hiyap ino oho war atisi.

³³Hiyap ino it sabiren itano og enesug latisi angge Allahn ap obog toho onolukap enebuhu sambil ap sabiren itano onolukap enebuhumu hiyap ino ap san oho laruhu?” ulug kapal hibag.

³⁴Kapal hibagma Yesusen, ”Ap kinangmonen aben hiyap heleheg hiyaben ap heleheg turuk.

³⁵Allahn tu numalikisi ulug ap onolukap enebuhumu poholma kuhupteg aben hiyap heleheg hiyaben ap heleheg tuhup fug.

³⁶It arimano Allahn onolukap enebuhumu war am fug angge Allah umalikisi malaikat hag toho welamuhup.

³⁷Musan haharoho imbibahon ariyen ap warehon onoluk amuhup ane seleg teg lit wereg. Musa e folim indok ambulpul turukmu iraham libareg Allah unuk uruk lit, ’Abraham Ikni re Allah wereg, Ishak men Yakub men Inikni re Allah wereg,’ ulug Allah wel tibag.

³⁸Abraham men Ishak men Yakub men ap warehon hag toho wereg eleg. Allah olohotma werehon obog toho onoluk eneg wereg,” ulug Yesusen hiyag isibag.

³⁹Hiyag isibagma Musa wene onoluk inap itanowen, ”Nonowe, ehenon ari fano hiyag nesehen,” ibareg

⁴⁰enele anggin atfareg eke umung ha fug angge welatfag.

⁴¹Yesusen it arimano hiyag isaruk lit, ”Aben Mesias ino fahet Daud amloho urukon ari nungge fahet uruk?

⁴²Daud inggarehen Mazmur wene fam hahatuk lit, ’Nikni Allah inowen an Nikni fam ele uruk lit Hat men seli roho welahebon arimano huyug apma umbuhuken ninggik pikit fil tiya hur arik ma ibag,’ ulug haharoho imbibag.

⁴³

⁴⁴Daud inggarehen Kristus Nikni ibag angge famen Mesias ino fahet Daud amloho nangginoho uk teg?” ulug Yesusen kapal isibag.

⁴⁵Ap anggolo luhaleg latfahon holegma Yesusen otsi hiyag isaruk lit,

⁴⁶”Musa wene onoluk inap enele holuk fug angge welamok. Enesum yaron wan toho laruk lit pasar waruk ambeg lulmu ap anggolowen hi nenebusa ulug laruk lit wene uruk ibam kulug lehoma hur atuk lit seni esetuk ambeg lehoma hur atuk lit turuk inap enele holuk fug.

⁴⁷Suburu enebit naruk hag toho hiyap yuwohon enengge inibam feleng toho hilaruk lit aben fano helehesa ukag ulug sembahyang yaron uruk angge famen Allahn unusuruk lit mondabi siyagma umbusuhu,” ibag.