Read Angguruk Yali LUKAS 23 Bible Online

LUKAS 23 - Angguruk Yali bible

LUKAS 23

¹It palu roho welatfahon arimano in atfareg Yesus hondoholug ap suwon Pilatus ambeg laruk latfag.

²Libareg Pilatus ubam hiyag utuk lit, ”Hun aruwen nonotsi inindi nonghonga feseruk lit Kaisar ino uang og um fug teg uruk lit inggareg fahet Mesias ap suwon welahi ulug ari-ari urukmu niren holtukuk,” ulug un-un ane Pilatus hiyag utuk latfag.

³Pilatus hiyag utuk latfagma Pilatusen Yesus hinog og haruk lit, ”Hat Yahudi inap onowe suwon welahen?” ibagma Yesusen, ”We haren ehen ari,” ibag.

⁴Ari ibagma Pilatusen imam onowesi suwon men ap arimano men hiyag isaruk lit, ”Anden umung hihimu siyag ane tirisiyon ehekon holihi fug,” ibagma iren enele ine roho uruk lit,

⁵”Hun aruwen uruk latisi ane re o Galilean ak tirisireg ap inindi kahal enebil laruk latisireg o Yudea tuma waharisi,” uruk latfag.

⁶Ari uruk latfagma Pilatusen hol hibareg hun aru Galilea ahun ano ulug kapal isibagma

⁷Yesus Galilea ahun ulug hiyag itfahon oluk atfagma it Galilea inap Herodes apma wereg angge re Herodesen unggum ari kong timisiyen ambeg walug lalihip ulug hiyag isibag. Ari tibag sambil ino oho Herodes o Yerusalem weregma ambeg walug libag.

⁸Herodes ambeg walug libagma Herodesen hun aru fahet anggolo urukmu holtuk latikik angge poholman turuk ane an nalukeman telepma yet hele, ebe oho yet hele peruk latikik ahun ino yoho walug wahasa ulug ahiyeg hibag.

⁹Ahiyeg hibareg Yesus mun ane man ane roho kapal haruk latfagma Yesusen ele eleg angge welatfag.

¹⁰Ele uk fug angge weregma imam onowesi men Musa wene onoluk inap onolohotma in atfareg un-un ane anggolo lombog turuk latfag.

¹¹Lombog turuk latfagma Herodes men otsi men arimanowen Yesus unuk lahap-pilap isaruk lit inggaliyap tibareg sum ap suwonen wan turukon laha fisibareg suhuloho Pilatus ambeg walug lalihip ibag.

¹²Herodes men Pilatus men ir oho seli roho welatfag angge famen ino sambil mangno atfag.

¹³Imam onowesi men Yahudi inap onowesi men ap winonet palu enepfareg Pilatusen hiyag isaruk lit,

¹⁴”Ap aruwen inindi kahal eneptuk ulug hiren an nambeg walug wahep. Anden ap aru hinog-og harukmu hinilen hehep. Siyag ane tirisiyon misig oho holihi fug angge famen hiren un ane ubam lombohap tirikip.

¹⁵Herodesen oho hinog-og hehekma siyag ane tirisiyon eleg ulug nin suhuloho aliyek ehekma alem anggin toho ubam umbuk fug tehen ware fisiyek uk fug teg lahi.

¹⁶E paleg fam eneg notsiyen wabusama lamisi,” ibag.

¹⁷O Paskah seni suwon esetuk sambil ari aren ap hele warehon misig-misig lol eseheg turuk latfag.

¹⁸Ap welatfahon arimano enebe obog tohowen enele hum toho uruk lit, ”Barabas eneg lol nisamihinteg ap aru il eleha fisin,” ibag.

¹⁹Hun Barabas inowen ap suwon enele nirim ulug tog aptuk lit ap eke ware fisibagma o penjara kilapfagma welatfag.

²⁰Ap arimano enele hum toho uruk lit Barabas lol nisimin uruk latfagma Pilatusen ele ine roho, ”Yesus loloho wili fesemin,” ibag.

²¹Ibagma enele uruk latfahon arimanowen enele hum toho hun aru e fam telukag eneg uruk latfag.

²²Uruk latfagma Pilatusen inggik hinahaneg angge, ”Hun aruwen siyag-siyag ane nungge tirisimu uruk lahep? Alem anggin toho ubam umbuk fug tehen ware fisiyek uk fug tehen e paleg fam eneg notsiyen wabusama lamisi,” ibag.

²³Ari ibagma it arimanowen enele hum toho at ele pilaptuk lit e fam telukag ulug heng turuk latfareg it enele palimu atfag.

²⁴Palimu atfagma Pilatusen iren pehesa ane tukag ulug inggik obog isibag.

²⁵Inggik obog isibareg Barabas tog aptuk lit ap eke ware fisibag ahun ino o penjaran inggik loloho wilip isibareg hit pehebon hag toho e fam teltihip ulug Yesus og isibag.

²⁶Yesus teltul ulug walug larukmen Simon Kirene ahun waharukmu salkal ibareg senetfareg teltuk ahen ino umaloma ha ribibareg Yesus ombolim lul ibag.

²⁷Ap anggolo mondoko ambiyeg laruk lit hiyap eke laruk lit uba yatil laruk latfag.

²⁸Uba yatil laruk latfagma Yesusen hebeloho kim isaruk lit, ”Hit Yerusalem hiyap, An nubahet uba yabuk fug. Hininggareg fahet hunumalikisi fahet uba yag taruk lamek.

²⁹Tot welamuhukmu aben enele uruk lit, ’Hiyap malik indag ta fug angge ibili atukon men ag umaliken naruk elehon enehiyeg toho welamag,’ uhup.

³⁰Tom fam enele uruk lit, ’Punu men tom menen kusoho hondo nenebiyek,’ uhup.

³¹Aben e olukon yaltukmu indoken folo-folo naruk eleg, aben e ilimon yaltukmu fululung toho naruk,” ibag.

³²Yesus hondoholug laruk lit ap piren siyag-siyag ane turuk latfahon itano pinggi unusilihip ibahon itano men Yesus men ambiyeg hondog eneptuk latfag.

³³Hondog eneplug sili unuk ”Ap unggul uwag silimu” libareg Yesus e fam tele fisibareg ap piren itano oho eke inggik pikit fil eke inggik hare fil tel enepfag.

³⁴Tel enepfagma Yesusen ele uruk lit, ”Nikni, An ninggik e fam tel nabehesa inap aruma it enepelehen inindi anggat teg elehen tehesama it fahet Hat hindi ahe laharukon eleg amag,” ibag. Yesusen ari ibagma At asum san hilamisi ulug telfag inap arimanowen eneg atuk angge hik turuk latfag.

³⁵Ap anggolo unduhuk lit it turukon fahet kilap enesug latfag. Yahudi inap onowesi suwon arimanowen Yesus inggaliyap turuk lit, ”An Allahn mumal naptisiyon uruk lit ap winon fanowap eneptuk latisi angge tem toho Mesias ap obog toho fanowap enebuhuwon wereg halug inggarehen oho fanowap tawag,” uruk latfag.

³⁶Sehen seneg inap welatfahon arimanowen oho inggaliyap turuk lit anggur ahaluwe sihon og utuk lit,

³⁷”Hat Yahudi inap onowe halug hinggareg hamuwen fanowap taruk tin,” uruk latfag.

³⁸Unggul palimu hahatfahon ari, ”Yahudi inap onowe suwon tu,” ulug hahatfag.

³⁹Ap piren Yesus men tel enepfahon misihen inggaliyap turuk lit, ”Hat te Mesias ino fug? Hinggareg fanowap tamihinteg nir oho fanowap nenebin,” ibag.

⁴⁰Ari ibagma areyen are komo ruruk lit, ”Har oho e fam tel nenebehesa angge famen Allah fam hakol haruk lahen fug?

⁴¹Nit nunuseheson ari turukuk ane fahet ayeg waroho e fam tel nenebehesa. Hun aru re siyag ane oho eke tirisi fug angge famen telehesa,” ibag.

⁴²Ari ibareg Yesus fam te, ”Hat ap suwon hag toho waruhun halug an fahet Hat hapeleg am fug,” ibag.

⁴³Ari ibagma Yesusen, ”Yoho hat min An min Allah wereg ambeg kinang fanoma welamul,” ibag.

⁴⁴Welatfagma mo anum pulmu weregma hik atfareg mo il hililip teg latfareg mo haya ririkim sakan tibag.

⁴⁵Mo il hilihip tegma o Allah wene uruk ibam sum sokolma latuk asum ino pul ke pilang tibisik wambibag.

⁴⁶Yesusen ele hum toho uruk lit, ”Nikni, An nahime fanowon Hat hinggikmu embemin,” uruk lit sat eleg atfag.

⁴⁷Sehen seneg inap onowe inowen Yesus ari roho uruk lit war atukmu yet hibareg, ”Ap aru we tem toho indi pikiron war aha,” uruk lit Allah wel til laruk latfag.

⁴⁸Allah wel til laruk latfagma ap anggolo unusurukmu yet usul ulug watfahon arimano Yesus war atukmu yet hibag ane fahet inindi anggin atfagma inindi wat til inibam libag.

⁴⁹Yesus men ambiyeg laruk latfahon arimano men hiyap o Galilean Yesus men ambiyeg laruk latfahon arimano men yatma unduhuk lit tibag ane ari yer isaruk latfag.

⁵⁰Ap misig unuk Yusuf ino ibam o Arimatea Yudea kinang fam werehon ino welatfag. Allah ap obog toho Inikni arik waruhu ulug oluk toho wereg lit ubabut fano roho indi pikit toho welatfag. Hun ino Yahudi onowesi palu rurukmu ar oho laruk latfagma it arimanowen Yesus wabukag ulug enele sahaltukmu Yusuf ino oho libareg Yesus wabuhup fug peruk lahi ulug hiyag isibag.

⁵¹

⁵²Hun Yusuf ino Pilatus ambeg libareg Yesus warehon hiyag nimin ulug heng tibag.

⁵³Heng tibagma Pilatusen fano wak lamihin ibagma Yesus wareg angge pilabe fibareg sum yanggowon fam hililip tibareg walug libareg owik ap warehon kilapfag fuhon ino kilabe fibag.

⁵⁴Kilapfag sambil ari sono wene uhuk ulug yoho hupmu olma welamul ulug Yesus owikmu kilapfag.

⁵⁵Hiyap o Galilean Yesus men ambiyeg laruk latfag hiyap arimanowen ebe wareg angge owikmu kilaptukmu yet hul ulug ambiyeg libareg owik ino pen hibareg inibam libag.

⁵⁶Libareg Yesus ebene are ribik lahukon ulug ahaluwe amben fanowon tug toho imbibag. O wene uruk sambil ino Musa wene onoluk inap turuk latfag ane hikit toho olma welatfag.