Read Angguruk Yali LUKAS 24 Bible Online

LUKAS 24 - Angguruk Yali bible

LUKAS 24

¹Hiyap itano wene ibahon ino likiyamon hubet-habet ahaluwe amben fanowon tug toho imbibahon wibareg owik Yesus imbibag ambeg ino libag.

²Libareg yet harukmen helep sok latuk ahalep ino imbiloho ilanma weregma yet hibag.

³Yet hibareg owik elman kim harukmen Yesus ebe wareg angge imbibag ambeg eleg latfag.

⁴Eleg latfagma inindi su atfagma nanggintul ulug turukmen ap piren sum yanggowon umbagpag turukon wan tehon iniraham unduhuk latfag.

⁵Unduhuk latfagma hiyap itano enekolen onorohole kunuk toho weregma ap piren itanowen hiyap itano fam, ”At oluk wereg angge famen ap warehon emberuk ambeg nungge fahet yami rik wahep?

⁶Allahn olukap tehekma At tuma eleg. At Galilea wereg lit hiyag hisaruk lit,

⁷’Ap kinangmon atfahon ino ap siyag ane turuk inap og isahupmu e fam teloho ware fesuhupmu inggik pirenam wareg welaruhureg hinahaneg angge oluk aruhu,’ ulug hiyag hisarisiyon ino hinindi honoluk toho welamek,” ibag.

⁸Ari ibagma Yesusen hiyag isibag ane fahet inindi anggar atfagma

⁹owikmuwen suhuloho waharuk lit Yesus otsi nanggoloben men ori winon men Yesus owikmu emberusa ambeg elegma hehe ulug hiyag isa libag.

¹⁰Hiyap itano ununuk te Maria ibam Magdala hiyap ino men Yohana men Yakobus isinga Maria ino men owikmu libag hiyap itano welatfag. Nin hiyap winon eke it ambiyeg libahon arimano menen Yesus otsi hiyag isaruk latfag.

¹¹Hiyag isibagma Yesus otsi arimanowen, ”Henele si ane uruk lahep ulug niren te tem toho peruk lahe fug,” uruk latfag.

¹²Ari uruk latfagma Petrus ino in atfareg folo-folo owikmu libareg kilap harukmen sum hililip tibag asum ino eneg weregma kilap hibag. Kilap hibareg suhuloho waharuk lit ebe elegman sum eneg hihi ulug indi su atfagma wenggeltil waharuk latfag.

¹³O ino sambil Yesus otsi piren o Emaus lul ulug laruk latfag. Emaus ari o Yerusalemen larukon tot yat toho 2 jam wereg latfag.

¹⁴It piren itano kema laruk lit Yesus ware fisibag ane fahet enele il-il laruk latfag.

¹⁵Enele il larukmu Yesus it enembolma watfareg it men ambiyeg laruk latfag.

¹⁶Ambiyeg laruk lit Allahn inil muma fisibagma Yesus fahet amuwon pibareg ambiyeg laruk latfag.

¹⁷Laruk lit Yesusen, ”Hit henele il laruk lahebon nungge fahet ehep?” ulug umung isibag. Umung isibagma it enehummu siyahen unduhuk latfag.

¹⁸Unduhuk lit ap itano misig unuk te Kleopas inowen Yesus ubam, ”O Yerusalemen ketiya turusa ane ari ap pohon werehon obog toho onoluk atisi angge famen we Hat misig eneg hapeleg toho welahen?” ibag.

¹⁹Ibagma Yesusen, ”O Yerusalemen nanggintuson fahet ehep,” ulug kapal isibagma iren, ”Yesus Nazaret ahun ino nabi Allahn monde ferisiyon inowen ele ine roho ap hiyag isaruk lit Allah men ap obog toho iniline fano ane turuk lit ap hihir eneptuk lit welatisi.

²⁰Niren te, ’Nit Israel ninap aruma fanowap nenebuhuwen Allahn At monde ferisi,’ peruk latukuk. Peruk latukuk angge famen imam onowesi men ap suwon menen At senetusareg unggum angginon ubam emberusareg e fam teloho ware feseruson fahet uruk lahe,” ibag. ”Ari turusa sali o yoho inggik hinahaneg angge welahe.

²¹

²²Welahereg hiyap nit minon itanowen hubet owikmu Yesus emberusa ambeg ha lahasareg,

²³’Yesus ebe warehon ino elegman malaikat yer eseheyon itanowen Yesus oluk aha ulug hiyag nesehesama wahe,’ ulug nenekolap nenebehesa.

²⁴Hiyap itanowen tam ari ulug hiyag nisa wahasama nonori arimanowen owikmu lahasareg hiyaben ehesa ane roho weregma hehesa angge famen At Yesus oluk ahayon ebe hehesa fug,” ibag.

²⁵Yesus ubam ari ibagma Yesusen hebeloho hiyag isaruk lit, ”Hit hinindi sohu roho welahebon nungge fahet henepeleg toho welahep? Allah wene hiyag isaruk latfag inap nabi arimanowen suwesingga haharoho imbibahon ari we tem toho imbibag angge famen nungge fahet wenggel haruk lahep fug.

²⁶Mesias ap suwon indag aruhuwon ino Allahn pibahon te ap kinangmonen tam wabuhupmu Anden fobik fanowap tuhuk pibag,” ulug hiyag isil laruk latfag.

²⁷”Nin Musan haharoho imbibahon men Allah wene hiyag isaruk latfag inap arimanowen haharoho imbibahon men ari Mesias fahet haharoho imbibag,” ulug seleg toho hiyag isil laruk latfag.

²⁸Hiyag isil laruk lit o lul pibag ibam horogma libareg Yesusen lamin ulug turuk latfag.

²⁹Turuk latfagma Yesus fam te, ”A, o hup atuk lit mo ubuk ehekma lamihin fug, nit men ambiyeg nohul,” ulug enele ine roho ibag. Ari ibagma it men nohul ulug olma kibag.

³⁰Olma kibareg suburu nul ulug heriyeg lit Yesusen suburu wibareg seneg lit sembahyang ibareg kuroho og isibag.

³¹Suburu og isarukmu Allahn inil selehap tibagma tu Yesus ulug inindimu onoluk atfagma hirag atfag.

³²Yesus hirag atfagma iren, ”Kema waharuk lit Allah wene indam haharoho imbibahon ino hiyag nisarukmu yihi ulug ninindi oko laha,” ibag.

³³Ibareg in atfareg o Yerusalem suhuloho libareg Yesus otsi nanggoloben men onori winon men palu roho weregma libag.

³⁴Libagma it welatfahon arimanowen, ”Nonowe Yesus Allahn olukap tehekma Simon iline ebenam aha,” uruk latfag.

³⁵Iren ari roho urukmu it piren itanowen oho, ”Kema laruk lit ap amuwon pehe angge famen suburu kuroho og nisarukmu Nonowe Yesusen og nisaruk ulug nonoluk aha,” ulug hiyag isaruk latfag.

³⁶It palu roho wereg lit enele sahaltukmu Yesus it sehelimu unduhuk lit unubam ele uruk lit, ”Notsi, hinindi se roho welamek,” ibag.

³⁷Ari ibagma it yuk libareg Yesus amungguwat waha ulug enekol hibag.

³⁸Enekol haruk lit weregma Yesusen te, ”Nungge fahet yuk lahep? Nungge fahet henekol toho wereg lit amungguwat waha ano ulug hinindi piren toho wenggel haruk lahep?” ibag.

³⁹”Ninggik nuwatusa ambeg oho nuyug nuwatusa ambeg oho kim neyemek, An Honowe wirik toho wahi. An yet niyaruk lahep hag toho mungguwat unu men uwag men wereg eleg, pete niya maniyek,” ibag.

⁴⁰Ari ulug hiyag isaruk lit ninggik nuyug kim neyemek ulug unug hibag.

⁴¹Unug hibagma Nonowe waha ulug enehiyeg toho welatfag angge famen inindimuwen te Yesus fug ano peruk lit weregma Yesusen, ”Suburu tot foroho lahep?” ibag.

⁴²Ari ibagma ikan wirahowon kong toho og itfagma it iniline oko wibareg nibag.

⁴³

⁴⁴Ikan nibareg ele hiyag isaruk lit, ”Tam hit min ambiyeg wereg lit hiyag hisaruk latikik ane Musa men wene hiyag isaruk latfag inap nabi men Mazmur menen wene An fahet haharoho imbibag ane hikir aruhu ulug Allahn peruk ane ulug hiyag hisarikik,” ibag.

⁴⁵Yesusen ari roho hiyag isaruk lit inindi anggarap enepfagma wene atam haharoho imbibahon inindimu seleg atfag.

⁴⁶”Allahn Mesias indag aruhuwon ino ap kinangmonen wabuhupmu inggik hinahaneg angge olukap tuhuk ulug Allahn pibahon fam atam welatfag inaben haharoho imbibag.

⁴⁷Yerusalem aruman ak tuhupteg o pumbuk munon-manon hiyag isaruk lit Mesias unuk uruk lit hit hunubahet Allahn olok peruk latisiyon eleg atisimu hiren siyag-siyag ane turuk lahebon umbusuhup ulug hiyag isahup.

⁴⁸Indam hahatfag ane roho atisiyon hit hiniline teko larisi.

⁴⁹Nikniyen og hisahuk ulug sali palfahon ino Anden og hisahuk. O Yerusalem aru welamuhupmu Nikniyen hinineyap henebuhumu eneg o aruwen wilip amuhup,” ibag.

⁵⁰Ari ibareg Yesusen otsi hondog eneplug o Yerusalemen wilip atfareg o Betania horogma libareg inggik leg haruk lit hi enepfag.

⁵¹Hi eneptuk li itano Allahn Yesus lisoho wibagma it embeselug poholma lahibag.

⁵²Poholma lahibagma otsi kinangma hur atuk lit sembahyang ibareg enehiyeg hibareg o Yerusalem suhuloho libag.

⁵³Libareg Allah wene uruk ibam wereg lit likiya hupmu Allah wel turuk latfag.