Read Angguruk Yali LUKAS 3 Bible Online

LUKAS 3 - Angguruk Yali bible

LUKAS 3

¹Ap suwon Kaisar Tiberius unduhuk fibagma mo ilig am wirig am turukmu nuwal fimahen 15 atfagma ap suwon Yudea kinang seneg latfahon Pontius Pilatus ino weregma o Galilea ap suwon Herodes welatfag. Herodes are Filipusen te Iturea men Trakhonitis men kinang seneg latfag. Lisanias ap suwon wereg lit Abilene kinang seneg latfag.

²It itano pemerintah onowesi suwon weregma Hana men Kayafas men Yahudi inap imam onowesi suwon toho welatfag. It itano ap suwon toho weregma Yohanes Zakharia amloho ap eleg ambeg anggenma libareg weregma Allahn ele hiyag utuk latfag.

³Hiyag itfagma Yohanes Yordan ikma libareg, ”Hiren siyag ane turuk lahebon fahet Allahn olok puhu fuhen siyag ane embeselihipteg nambeg watihipmu ikma pilap henebuhuk,” ulug ele hi roho uruk latfag.

⁴Atam hun Yesaya wene hiyag isaruk latfag ahun inowen haharoho imbibahon hikit toho hiyag isaruk latfag. ”Ap misig anggenma wereg lit ele hi roho uruk lit Ninikni Allah waruhu ke hale feruk lit At waruhu ke pikit toho yaho feruk lamek.

⁵Fanggong teg ambeg ambi far aruhu, punu reg ambeg men hu reg ambeg men tuwal aruhu, hare reg ambeg pikir aruhu, lahuk wambuk teg ambeg tonggo aruhu.

⁶Ap obog toho Allahn windat henebuhuk ulug waruhuwon yet hahup,” ulug Yesayan haharoho imbibag.

⁷Ap anggolo arimano Yohanesen ikma pilap nenepmisi ulug ambeg watfagma hiyag isaruk lit, ”Hit pisanggo umalikisi wereg lahebon Allahn hit hunusik ohoma hit koloweg wilip amuhup ulug san hiyag hisarisi?

⁸Hit hinindimu siyag ane wenggeltuk lahebon embeselug anggen fanowon yihik feruk lamuhup. Hit hinindimu Abraham umaliki welahe peruk lahep angge famen Allahn te helep aruma fam Abraham umaliki lal enebuk teg.

⁹E anggen fanowon yihik feruk elehon muruhukteg indok yale fesuhuk ulug Allahn yaha olokon e alma wep toho emberisi,” ulug hiyag isaruk latfag.

¹⁰Hiyag isarukmu ap anggolo arimanowen, ”Ari ehenma nit nanggintuk lamuhuk?” ulug kapal hibag.

¹¹Kapal hibagma, ”Ap misihon sum ebemon piren wereg halug are elehon misig og utuk laruhu. Naruk angge wereg halug ari hag toho turuk lamuhup,” ibag.

¹²Ari ibagma pemerintah amingmingangge uang embelug lalihip uruk inap watfareg nir oho ikma pilap nenepmisi ulug, ”Nonowe, nungge ane turuk lamuhuk?” ulug kapal hibagma

¹³Yohanesen hebeloho hiyag isaruk lit, ”Uang pemerintah inowen hiyag hisaruson hag toho ap fam heng eneptuk lit sebe roho heng eneptuk lamuhup fug,” ibag.

¹⁴Ari ibagma sehen seneg inap arimanowen kapal haruk lit, ”Nit sehen seneg ninap aruman oho nangginoho turuk lamuhuk?” ulug kapal hibagma, ”Aben angge taluk toho hila fug, enebe unusulug enengge hila fug, we uang og hisarukon ari eneg naruk lamuhup,” ibag.

¹⁵Aren hiyag isaruk ane ap anggolowen hol hibareg, ”Mesias Allahn monde fuhu uruson ino yet teg laheyon ino Yohanes aru ano,” ulug inindi wenggel haruk lit umung-umung atuk latfag.

¹⁶Umung-umung atuk latfagma Yohanesen hebeloho hiyag isaruk lit, ”Anden hit ik fam pilap heneptuk lahi angge re At fobik waruhuwon ino, At suwon palimu werehon inowen sepatu lole nubahin ulug nubam uhu fug. At inowen Allah hime fanowon indok ambulpul hag toho hunubam pilabik waruhu.

¹⁷Aben sinali ei indokma wiratug ininggikmu lilibug toho embelug alinglongangge fu isalug anggen naruk hag toho Allahn oho ari hag toho tuhuwon inggikmu wereg,” ulug hiyag isibag.

¹⁸Yohanesen ari ulug komo eke hag eke hag komo eneptuk lit wene fanowon ap anggolo hiyag isaruk latfag.

¹⁹Herodes ap suwon welatfahon ino, ”Hare uhe Herodias pal tarikin,” ulug komo ruruk lit siyag ane winon eke tirikin ulug komo ribahon fahet olok hibareg

²⁰Yohanes hele waroho penjara kilapfag.

²¹Ap anggolo Yohanesen ikma pilap enepfareg Yesus oho Yohanesen ikma pilapfagma sembahyang urukmu pohol husoho

²²suwe yalma hag toho Allah hime fanowon ubam wambik watfag. Wambik waharukmu ele poholman uruk lit, ”Hat An namloho Anden mumal haptikikteg nindi hasug lahiyon Hat welahen,” ibag.

²³Yesus indag tibag sali mo ilig am wirig am turukmu teng misig nubam hilag hinahan atfagma 30 Aren yabuk turuk ane ak tibibag. Aben te Yesus ikni Yusuf uruk latfahon te inikni unumba ununuk tuma ul: Yusuf ikni Eli,

²⁴Eli ikni Matat, Matat ikni Lewi, Lewi ikni Malkhi, Malkhi ikni Yanai, Yanai ikni Yusuf,

²⁵Yusuf ikni Matica, Matica ikni Amos, Amos ikni Nahum, Nahum ikni Hesli, Hesli ikni Nagai,

²⁶Nagai ikni Maat, Maat ikni Matica, Matica ikni Simei, Simei ikni Yosekh, Yosekh ikni Yoda,

²⁷Yoda ikni Yohanan, Yohanan ikni Resa, Resa ikni Zerubabel, Zerubabel ikni Sealtiel, Sealtiel ikni Neri,

²⁸Neri ikni Malkhi, Malkhi ikni Adi, Adi ikni Kosam, Kosam ikni Elmadam, Elmadam ikni Er,

²⁹Er ikni Yesua, Yesua ikni Eliezer, Eliezer ikni Yorim, Yorim ikni Matat, Matat ikni Lewi,

³⁰Lewi ikni Simeon, Simeon ikni Yehuda, Yehuda ikni Yusuf, Yusuf ikni Yonam, Yonam ikni Elyakim,

³¹Elyakim ikni Melea, Melea ikni Mina, Mina ikni Matata, Matata ikni Natan, Natan ikni Daud,

³²Daud ikni Isai, Isai ikni Obed, Obed ikni Boas, Boas ikni Salmon, Salmon ikni Nahason,

³³Nahason ikni Aminadab, Aminadab ikni Admin, Admin ikni Arni, Arni ikni Hezron, Hezron ikni Peres, Peres ikni Yehuda,

³⁴Yehuda ikni Yakub, Yakub ikni Ishak, Ishak ikni Abraham, Abraham ikni Terah, Terah ikni Nahor,

³⁵Nahor ikni Serug, Serug ikni Rehu, Rehu ikni Peleg, Peleg ikni Eber, Eber ikni Salmon,

³⁶Salmon ikni Kenan, Kenan ikni Arpakhsad, Arpakhsad ikni Sem, Sem ikni Nuh, Nuh ikni Lamekh,

³⁷Lamekh ikni Metusalah, Metusalah ikni Henokh, Henokh ikni Yared, Yared ikni Mahalaleel, Mahalaleel ikni Kenan,

³⁸Kenan ikni Enos, Enos ikni Set, Set ikni Adam, Adam ikni Allah.