Read Angguruk Yali LUKAS 4 Bible Online

LUKAS 4 - Angguruk Yali bible

LUKAS 4

¹Yesus Allah hime fanowon inowen ineyap tibareg hondoholug Yordan ikma embeselug ap eleg ambeg farema libag.

²Libareg hup teng misig nubam hilag lahabeg nuwalen 40 farema weregma Iblis inowen wal hamin ulug ambeg watfag. At farema wereg lit suburu na fug angge weregma suburu obok hibag.

³Suburu obok harikim Iblisen ubam ele uruk lit, ”Hat Allah amloho welahen halug helep aru suburu amin imihinmu suburu atuk halug namihin,” ibagma

⁴Yesusen te, ”Suburu nalug eneg ap onoluk welam fug teg ulug hahareg lit wereg,” ibag.

⁵Ari ibagma Iblis inowen Yesus hondoholug lehoma libareg o pumbuk obog toho pilap himin ulug hiyag itfareg,

⁶”O pumbuk aruma werehon obog toho an ngi reg lit ap winon oho anden hiyag isa reg lahi. Mun angge man angge werehon aruma Hat palimuwap hapminmu ngi aruhunen

⁷Hat nalukema hur atmihinteg nubam sembahyang imihin,” ibag.

⁸Ari ibagma Yesusen, ” ’Ninikni Allah ubam eneg sembahyang uk teg, Aren eneg ap mingming enebuk teg,’ ulug hahareg lit wereg,” ibag.

⁹Ibagma Iblisen Yesus hondoholug o Yerusalem libareg Allah ibam unggama unduhuk fibareg, ”Hat Allah amloho welahen halug tiyan hik toho wambimihin.

¹⁰’Allahn malaikat mon enepmisimu ininggik indanggenen wanggi wat habusama huyug heleben huwatmisi fug,’ ulug hahareg lit wereg,” ulug ubam ibag.

¹²Ibagma Yesusen, ”Hinikni Allah wal hahun fug ulug wene fam hahareg lit wereg,” ibag.

¹³Ari ibagma Iblisen nin wal ha fug angge eke sambil wal hahuk ulug embeselug libag.

¹⁴Libareg Allah hime fanowon Yesus ineyap tibagma o Galilea libagma ap o pumbuk kema-kema werehonen At fahet fano ulug unuk uruk latfag.

¹⁵Unuk uruk latfagma wene uruk ibamen ap hiyag isarukmu ap anggolowen At wel turuk latfag.

¹⁶Yesus ebe su atfag ambeg o Nazaret libareg sembahyang uruk sul wina sambil kuruk latfag hag toho sembahyang uruk ibam kibag. Kibareg welatfareg suwesingga Allah wene fam wene eke hiyag hisamin ulug in atfag.

¹⁷Hiyag hisamin ulug in atfagma Yesayan haharoho imbibahon buku foroho ahunen og itfagma wiriloho Yesayan hahatfag ane tu hiyahibareg uruk latfag.

¹⁸”Ninikni hime fanowon An nubam atisi. Ap enenggengge elehon Allah wene hiyag isaruk laruhun ulug nunggulmu amben fanowon are naptisireg mon naptisi. Ininggik hele warehon Allahn lol henebuhu, inil siyahon Allahn fanowap henebuhu, ininggik lisoho emberuson fano roho laruk lamuhup,

¹⁹Allahn ap obog toho indi enesug li horog teg ulug hiyag isaruk laruhun ulug monde nubaharisi.”

²⁰Yesayan hahatfag ane ari suwesingga fam ibareg buku yinggiloho foroho latfag ahun og itfareg, ”Yesaya awene ihiyon fahet hiyag hisamin,” ibagma hiyap ap inil Yesus kilaboho latfag.

²¹Kilaboho latfagma, ”Wene aru yoho hiniline inam aha,” ibag.

²²Inam aha ibag ane fahet yihi peruk lit, ”Fano ane hiyag nisaruk,” il laruk lit, ”Tu Yusuf amloho haruk lahep fug?” uruk latfag.

²³Tu Yusuf amloho haruk lahep fug uruk latfagma Yesusen te, ”Ap ekeyen indit toho urukon, ’Oluk ahun oluk ane roho hihit tamisi,’ ul peruk lit welahep. ’O Kapernaumen turuk latisi hag toho at ibam tuma oho Aren ari timisi,’ ulug hunundaman ari peruk lahep,” ibag.

²⁴”Ari peruk lahepma Anden te: Allah wene uruk ahunen ibam yuhonen hiyag isaruk halug ele holtuk eleg. Ari tem toho hiyag hisaruk lahi,” ibag.

²⁵”Hun Elia osit eleg amag ibagma mo ilig am wirig am turukmu hinahanam minggiroho atfareg osit eleg latfagma Israel inap suburu obok anggolo welatfagma Israel hiyap yuwohon o eke o anggolo welatfag.

²⁶Anggolo welatfag angge famen Allahn te o Sarfat o Sidon horogma amu hiyap yuwohon misig wereg ambeg Elia monde fibag,” ulug hiyag isibag.

²⁷”Hun Elisa wene hiyag isaruk latfag ahun welatfagma enehap salukangge reg inap Israel kinangon anggolo wereg latfag angge famen embeselug Siria ahun Naaman eneg hihitfag,” ulug hiyag isibag.

²⁸Hiyag isibagma it sembahyang uruk ibam welatfag inap arimanowen hol hibareg unundama onolok anggolo hibag.

²⁹Onolok hibareg in atfareg Yesus ininggiken miyaltil inibam Nazaret apma fil pulema miyaloho pilabul ulug turukmen

³⁰Yesus it seheli keyen tulug embeselug libag.

³¹Yesus it embeselug o Kapernaum Galilea kinang fam werehon ino libareg wene uruk sambil hari Sabat ap arimano wene hiyag isaruk latfag.

³²Hiyag isarukmu holfag inap arimanowen yuk libareg ele ine roho hiyag nisaruk ulug enekol hibag.

³³Enekol hibagma wene uruk ibam ino ap misig setan siyag angge undama werehon inowen ele hum toho uruk lit,

³⁴”Yesus Nazaret ahun, Hat men nit men mangno roho welam fug teg. Nit siyahap nenebik oho wahen? Allahn mumal haptisiyon Hat welahenon an noluk,” ibag.

³⁵Ibagma Yesusen ap ino pet turuk lit, ”Hele-a, hundama werehon ari wilip amag,” ibagma setan ino wilip atuk lit ap ino miyaloho it sehelimu yinggi fisibagma ap ino ubam ouk tuk fug angge seleg toho welatfag.

³⁶Seleg toho welatfagma ap arimano yuk libareg it-it enele sahaltuk lit, ”Hun tuwen nungge wene hiyag nisaruk? Ele ine roho ap undama siyag angge setan werehon per eneptukmu ele holehesareg wilip ahasa,” ibag.

³⁷Ari roho tibahon fahet Yesus unuk o pumbuk kema-kema saho ribag.

³⁸Yesus wene uruk ibamen wilip atfareg Simon ibam libagma iyamalhe ouk waruk lit inahan anggolo rehen hihit nisamihin ulug heng tibag.

³⁹Ari heng tibagma Yesus hiyap ino yinggigmu iraham libareg inahan eleg amag ibagma ouk ino eleg atfag. Ouk ino eleg atfagma hiyap ino in atfareg suburu isag isaruk lit ler eneptuk latfag.

⁴⁰Weregman mo ubuk irikim ap obog toho arimanowen ap ouk eke hag eke hag warukon hondog eneplug waharuk latfag. Waharuk latfagma Yesusen ap enebe wal taneg inggik ununggulmu emberuk lit hihir eneptuk latfag.

⁴¹Ap anggolo unundama setan siyag angge wili fisibagma enele hum toho uruk lit, ”Hat Allah amloho welahen,” uruk latfag. Setan arimanowen Mesias waruhu uruk latuson tu waha ulug onoluk atfagma Yesusen, ”Hiren ari roho tehek ulug ap onolukap enebuk fug, henele eleg angge welamok,” ulug komo enepfag.

⁴²Likiya sakan tirikim Yesus wilip atfareg ap eleg ambeg libagma ap anggolowen Yesus ombolim mutug libareg hiyahibareg nit nunumbahalug lamihin fug uruk latfag.

⁴³Ari uruk latfagma Yesusen ele unubam uruk lit, ”O pumbuk winon oho ap obog toho Inikni Allah aruhuwen hiyag isa lahun ulug An mon naptisi,” ibag.

⁴⁴Ari ibareg o Yudea wene uruk ibamen ap wene hiyag isaruk latfag.