Read Angguruk Yali LUKAS 6 Bible Online

LUKAS 6 - Angguruk Yali bible

LUKAS 6

¹Misihim wene uruk sambil hari Sabat Yesus otsi men yabuk keyen laruk lit otsiyen roti hilimbag anggen hahon ondomi keyon tahanoho ilahal wat heheg nil laruk latfag.

²Nil laruk latfagma Farisi inap itanowen, ”Nungge fahet wene uruk sambil tuk fug ane turuk lahep?” ibagma

³Yesusen hebeloho, ”Dauren tibag ane fahet haharoho imbibahon irikip fug? Suburu roti Allah ibam emberukmu imam inap eneg na hag teg latfag angge famen Daud suburu oboken Allah ibam kulug nibareg otsi oho kut-kut fibir enepfagma nibag,” ulug hiyag isibag.

⁴

⁵Hiyag isibareg, ”At ap kinangmon atfahon ino wene uruk sul hari Sabat At ngi ahun wereg,” ibag.

⁶O eke sambil wene uruk sul hari Sabat Yesus wene uruk ibam kibareg wene hiyag isaruk latfagma ap misig inggik pikiron eneg war atfareg lilog teg angge welatfag.

⁷Musa wene onoluk inap men Farisi inap menen o wene uruk sambil welahe angge famen ap aru fanowap timisi ano, fanowap turuk halug ari famen unggum ubam umbuhuk ulug kilaboho lit welatfag.

⁸Iren ari peruk latfahon Yesusen oluk atfareg ap inggik warehon fam ele uruk lit, ”In atug pulmu in arik ma,” ibagma ap ino in atfag.

⁹In atfagma Yesusen, ”Nori, ke hahon fano peruk lahep? Wene uruk sambil nungge tuk hag teg: Fano ane tuk teg ano, siyag ane tuk teg ano? Ap hihir enebuk teg ano, ware fusuk teg ano?” ulug kapal isibag.

¹⁰Ari ulug kapal isibareg misig-misig enembilikmu kim isibareg ap inggikmu warehon ino fam, ”Hinggik pok himin,” ibagma pok harukmen mondabi fano atfag.

¹¹Fano atfagma ap arimano inindimu siyag toho peruk lit onolok anggolo hibareg alem keyon At ubam lombohap tuhukteg wabuhuk ulug enele sahaltuk latfag.

¹²Welatfareg misihim Yesus sembahyang imin ulug punumu lahibareg hup misihim hunduko Allah fam sembahyang uruk latfag.

¹³Urukmen sakan tibagma Yesusen otsi wol enepfareg ap sehelimu mon heneptuk laruhuk ulug enebe nisanggowen mumal eneptuk lit yonggo laruk inap suwal enepfag.

¹⁴It ununuk te Simon unuk eke Petrus suwalfahon ino men, Simon are Andreas men, Yakobus men Yohanes men, Filipus men Bartolomeus men,

¹⁵Matius men Tomas men, Alfeus amloho Yakobus men, Simon Zelot ahun uruk latfahon men,

¹⁶Yakobus amloho Yudas men, Yudas Iskariot Yesus wabukag ulug huruwe libag ahun ino men mumal enepfag.

¹⁷Yesusen otsi arimano mumal enepfareg punumuwen tonggoma wambibareg welatfag. Weregma otsi anggolo luhalfagma ap winon eke anggolo watfahon arimano Yudea inap men Yerusalem inap men ik ayegma welatfag inap Tirus inap men Sidon inap men watfag.

¹⁸It watfahon arimanowen wene hiyag nisaruk lit ouk warukon hihit nenepmisireg siyag angge nunundama werehon yanggaloho wilip nenepmisi ulug watfagma fano atfag.

¹⁹Yesus ubam ine werehon wilip atfareg ouk warukon fanowap eneptuk latfagma ap arimanowen sen hul ulug turuk latfag.

²⁰Yesus otsi kim isaruk lit wene hiyag isaruk latfag. ”Allah suwon anggengge hit ngi amuhuben henenggengge elehon henehiyeg toho welamuhup.

²¹Hit ketiya suburu obok toho welahebon henehiyeg toho welamuhup. Allahn sebe roho og hisahumu naruk lamuhup. Hit ketiya hinindi anggin toho wereg lit uba yatuk lahebon henehiyeg toho welamuhup. Allahn hinindi seyap henebuhumu inda yatuk lamuhup.

²²Ap kinangmon atik ibahon ino otsi ulug aben hit hunubahet ninirim ulug yanggal heneptuk lit henebug uruk lit hununuk uhupteg wasubag sup hisarukmu henehiyeg toho welamuhup.

²³Hit hunubam ari turuk isalug onggo suwon poholma fet nenesug ulug hinindi se roho wereg lit henehiyeg toho welamuhup. Hit hunubam ari turuk lamuhup hag toho wene hiyag isaruk latfag inap Allahn mon enepfahon ari roho unusuruk latfag.

²⁴Hit henenggengge anggolo werehon hinindi anggin toho welamuhup. Atam hiren angge anggolo werehen hinindi se roho welatikip.

²⁵Hit suburu henehum ouk toho naruk lahebon hinindi anggin toho welamuhup. Fobik hit suburu obok hahup. Ketiya inda yatuk lahebon hinindi anggin toho welamuhup. Fobik hinindi siyag toho wereg lit uba yatuk lamuhup.

²⁶Aben ketiya hit wel heneptukon hinindi anggin toho welamuhup. Ari hag toho Allah wene hiyag husul uruk lit enele si uruk latfahon arimano inikni unumban we tem toho uruk ulug wel eneptuk latfag,” ari ulug Yesusen otsi hiyag isibag.

²⁷Yesusen wene hiyag isaruk lit, ”Hit An nele holtuk lahebon tot hiyag hisamin: Ap seliyon hinindi roho welamuhup. Hit hunubam ninirim perukon unubam fano ane turuk lamuhup.

²⁸Hit pet heneptukmu hi eneptuk lamuhup. Hit yik hunusurukmu unubam sembahyang uruk lamuhup.

²⁹Ap ekeyen suwahal uruk lit horoholeanggen fumag huwatuk halug fumag fil oho nuwarin ulug unug uruhun. Hasum hebemon taluk haptuk halug sum undamon oho hilimin ulug og uruhun.

³⁰Aben foroho laruhun angge fahet heng haptuk halug foroho laruhun angge og uruhun, og uruhun angge famen nin uwag oko og nimin ulug heng tuhun fug.

³¹Hiren ap winonen let neneptep peruk lahebon hag toho ap winon ler eneptuk lamuhup.

³²Hit honolohotma werehon eneg hinindi reg lamuhupmu Allahn onggo nungge og hisahu? Ap siyag ane turuk inaben oho onori onolohotma werehon inindi enesug lit wereg.

³³Hit hunubam fano ane turukon eneg hiren oho fano ane turuk lamuhup halug Allahn onggo nungge og hisahu? Ap siyag ane turuk inaben onori fam ari roho turuk.

³⁴Nonori folo-folo hebeloho og nisa waharuk inap ulug henengge ilamna og isahup halug Allahn onggo nungge og hisahu? Ap siyag ane turuk inaben oho ambi roho hebeloho og nisa waharuk ulug siyag ane turuk inap ilamna og isaruk.

³⁵Nori, hiren seliyon hinindi enesug lit unubam fano ane turuk lamuhup. Honoriyen, ’Suhuloho og hisa wamulen heng heneptuk lahe,’ uruk isalug hiren og isaruk lit suhuloho og nisa wamusa ulug wenggeltuk lamuhup fug. Ari roho wenggeltuk lamuhup fugmu Hinikniyen onggo suwon og hisahumu Allah palimu werehon umaliki amuhup. Inindimu onolok toho wereg lit Allah ubam Ninikni uruk eleg angge famen Allahn unubam fano ane turuk.

³⁶Hinikni indi fano wereg hag toho hir oho hinindi fano roho welamuhup.”

³⁷”Allahn hit hunubam unggum umbuhu rohon hiren honori unubam unggum umbuk fug. Allahn hit hele wat henebuhu rohon hiren oho honori hele war enebuk fug. Hit hunundama pug toho foroho lamuhubon pisala rebesuhup halug honoriyen pug toho forohowon pisala rebesuhup.[2]

³⁸Hiren og isahup halug iren oho og hisahup.[3] Hiren honori saho kubag fanowon fam og isaruk lit hililoho kilaptukmen keleg uruk halug hininggiken hondo roho tung halug kolo reg ambeg hilili felug hindal-hindal wamburukmu honori og isaruk lahep hag toho Hinikni Allahn mun angge man angge og hisaruk laruhu. Saho og isaruk lit kubag wirim toho og isahup halug iren oho wirim toho og hisahup,”[4] ulug Yesusen hiyag isibag.

³⁹Yesusen nin indit toho hiyag isaruk lit, ”Ap il siyahon ekeyen are il siyahon eke inggik senetug la reg? It pirenet samalingmu mako wambuk fug teg?

⁴⁰Ap mun ane man ane oluk ahun misihen ot eke uwan hiyag utukmu ot inowen owe palimu wereg eleg. Obog toho oluk atuk halug eneg owe ino men ambi roho wereg.

⁴¹Hare ilmu e asinggilin toron werehon haruk lahen angge famen e uwag suwon hinggareg hilmu werehon nungge fahet haruk lahen fug?

⁴²E uwag suwon hilmu werehon yet ha fug teg lahen angge famen hare fam, ’Ma, e asinggilin toron werehon hilmu oho-hubahamin,’ nangginoho uk teg lahen? Hat hele si uruk hahun! Hat hilmu e uwag suwon tam oho fuhunteg hil seleg aruhumu hare ilmu e asinggilin toron werehon oho-fesuhun halug fano.”

⁴³”E fanowonen anggen siyahon yihik fuk fug teg, e siyahonen anggen fanowon yihik fuk fug teg.

⁴⁴E obog toho anggen yihikmu pen halug e ebe honoluk atuk. Wiringgil alog ahen fam sawe anggen tahanuk fug teg. Folim alog ahen fam soluk anggen tahanuk fug teg.

⁴⁵Ap fanowonen indimu fano angge forohowon eneg wilibuk teg. Ap siyahonen indimu siyag angge forohowon siyahon eneg wilibuk teg. Ap enembilik fam urukon inindimu forohowon eneg wilibuk teg.”

⁴⁶”Hit nungge fahet henembilik fam An nubam, ’Nikni, Nikni,’ uruk lahep? Nikni uruk lahep angge famen Anden hiyag hisaruk lahiyon senetuk lahep fug.

⁴⁷Ap An nambeg waharuk lit nele fano holtukon ap sa fam wirim timin? Ap ino fahet wirimangge hiyag hisamin.

⁴⁸Ap ekeyen o witnin ulug o ulun fo roho oho felug kinang ineyon fam uwag pilaptisi. Osit humon naruk lit ik fu waharuk lit o ino kik turukmu o uwag ine roho pilaptisimu yuk turuk latisi fug.

⁴⁹Ap an nele isanggo famen holtuk angge famen Anden urukon hikit toho turuk eleg halug ibam kinang ine elegma wit tarisi ahun hag toho wereg. O ari roho wirihon ino ik fu waharuk lit hebeloho ikma wambirisimu siyag atisi,” ulug indit toho hiyag isibag.