Read Angguruk Yali LUKAS 7 Bible Online

LUKAS 7 - Angguruk Yali bible

LUKAS 7

¹Yesusen ap anggolo wene hiyag isibareg o Kapernaum kibag.

²O pumbuk ino sehen seneg inap onowe inowen amingmingangge indi reg latfahon ino ouk anggin toho waruk lit war am hag teg latfag.

³Sehen seneg inap onowe inowen Yesusen ap hihir eneptuk urukon hol hibareg Yahudi inap onowesi fam, ”Hit lalihipteg namingmingangge hihit nirik watmisiyen hondoholug watihip,” ibag.

⁴Aren ari ibagma it Yesus ambeg watfareg enele ine roho heng turuk lit, ”At asukun fano roho werehen amingmingangge hihir itmihin ulug hondog habik wahe.

⁵Aren nit fahet indi nenesug lit wene uruk ibam wibukag ulug let neneptisi,” ulug Yesus hiyag itfagma Yesus it men ambiyeg laruk latfag.

⁶Yesus men ambiyeg sehen seneg inap onowe ibam ino horogma larukmen ap suwon inowen ori olohotma lalihip ulug mon enepfagma Yesus fam enele uruk lit, ”Nowe, an siyag nahun nibam At kuk fug tehen sat toho watmisi fug ehek.

⁷An siyag nahun pihireg olohotma watnin fug ulug pok ahireg ele il misig imisimu namingmingangge fano atmisi peruk lahi ehek.

⁸An oho nowesi suwon enepma welahimu an napma oho notsi wereg. Not misig fam, ’Lag!’ uruk lahimu laruk. Misig fam, ’Ma!’ uruk lahimu waharuk. Namingmingangge fam, ’Yabuk aru wirin!’ uruk lahimu wituk ehek,” ulug Yesus hiyag itfag.

⁹Iren hiyag itfag ane hol hibareg ahiyeg hibareg hebeloho ap ombolim laruk latfahon arimano fam, ”Hun ariyen An nubam wenggel hehek hag toho ap Israel inap An nubam wenggel harukon misig oho isarikik fug,” ibag.

¹⁰Ari ibagma ap mon enepfahon arimano suhuloho inibam libareg kim harukmen sehen seneg inap onowe amingmingangge ino fano atfag.

¹¹Misihim Yesus men otsi men o Nain larukmu ap anggolo ombolim laruk latfag.

¹²O pumbuk ari elehet walinggoho kilabegma elehet sok horogma larukmu ap warehon paya rulug sok ino fam wilibig waharuk latfag. Isinga yuwohon amloho we misig eneg welatfahon ino war atfagma ap anggolo hiyap ino men wilip atuk latfag.

¹³Wilip atuk latfagma Nonowe Yesusen hiyap ino yet hibareg indi haruk lit, ”Uba yatuk eleg,” ibag.

¹⁴Ari ibareg paya rulug larukmu Yesus iraham libareg sen haruken ap itano unduhuk latfagma Yesusen, ”Namloho, Anden hat hubam in amin uruk lahi,” ibag.

¹⁵Yesusen ari ibagma malik ino in atfareg heriyeg lit ele uruk latfagma Yesusen inggik lisoho isinga og itfag.

¹⁶Isinga og itfagma ap anggolo arimanowen enekol hibareg Allah wel turuk lit, ”Ap suwon nabi Allahn monde ferisiyon nit sehelimuwen inam aha. Ninikni Allahn let nenebik oho pen nisa waha,” uruk latfag.

¹⁷Yesusen ari tibag ane Yudea inap obog toho, o pumbuk walinggoho werehon obog toho onoluk atfag.

¹⁸Yesusen turuk latfag ane Yohanes otsiyen hol hibareg Yohanes hiyag itfareg libagma aren otsi piren wol enepfag.

¹⁹Wol enepfareg hiyag isaruk lit, ”Hat waruhu uruk latuson ino waharikin ano, fobik winon eke waruhuwon nangno ruruk lamuhuk ano ulug kapal ha lalihip,” ulug mon enepfag.

²⁰Mon enepfahon itano Yesus ambeg libareg kapal haruk lit, ”Yohanes ap ikma pilap eneptuk latisiyon inowen Hat hambeg kapal ha lalihip ulug mon nenebehekma wahe,” ibareg, ”Hat waruhu uruk latuson ino wahen ano, eke winon nangno ruruk lamuhuk ano,” ulug Yesus kapal hibag.

²¹Yohanes otsi itano watfag sambil ino Yesusen ap ouk unubam eke hag eke hag werehon, siyag angge setan unubam werehon, inil hupnihon anggolo hihir eneptuk latfag.

²²Yesusen Yohanes otsi itano fam, ”Yohanes ambeg lalihipteg hinilen haruk lahebon, hinisanggowen holtuk lahebon aruma hiyag irik lalihip: Ap inil hupnihon inil fenggen atuk, ap unuyug siyahon fano atuk, ap enehap salukangge rohon fano atuk, ap inisanggo larehon inisanggo husuruk, ap warehon onoluk atuk, ap enenggengge elehon wene fanowon hiyag isaruk.

²³An fahet indi nin atuk elehon ahiyeg toho welaruhu ulug Yohanes hiyag irik lalihip,” ibag.

²⁴Yohanesen otsi mon enepfahon suhuloho libagma Yesusen ap anggolo arimano fam Yohanes fahet hiyag isaruk lit, ”Nungge yet hul ulug farema larikip? Hame mulilik la mulilik wam turukon yet hul ulug larikip?

²⁵Nungge yet hul ulug larikip? Ap sum fanowon wan tehon yet hul ulug larikip? Sum fanowon wan teg inap arimano mun angge man angge fano roho naruk lit ap suwon inibam weregma isa lelep.

²⁶Nungge fahet yet hul ulug larikip? Wene hiyag isaruk ahun ha larikip? We tem toho at wene hiyag isaruk ahun wereg, atam wene hiyag isaruk latfahon arimano ununuk palimu at wereg.

²⁷At fahet haharoho imbibahon tu wereg, ’Yet teg lamok, Hat waharuk abunggalem hale fukag ulug atam not misig monde fuhuk.’

²⁸Hiyaben indag eneptusa inap arimano Yohanes palimu werehon eleg angge famen Allah umalikisi atukon tot toron arimano at apma weregma it palimu wereg. Ari we tem toho hiyag hisaruk lahi,” ibag.

²⁹”Ap anggolo Yohanes ele holtuson men pemerintah amingmingangge uang embelug lalihip uruk inap men nit Allah apma welahe ulug Yohanes ambeg ikma pilap nenepmihin ulug laruk latusa.

³⁰It Farisi inap men Musa wene onoluk inap arimano menen Allah fahet ninirim peruk lit ikma wamburukon fahet ninirim ulug pok atusa,” ibag.

³¹Ari ulug hiyag isibareg Yesusen nin eke indit toho hiyag hisamin ibareg, ”Ap ketiya werehon arimano sa hag toho wereg, sa fam wirim hamin?

³²It arimano malik toron onggo paloho waruk ambeg heriyeg lit enele abilit-abilir atuk lit, ’Niren waruk telehema hit yunggulehep fug, nit hunu sini ehema hit uba yarehep fug,’ ulug malik toronen uruk ane hag toho wereg,” ibag.

³³”Yohanes ap ikma pilap eneptuk latisi ahun ino waharisireg suburu roti na fug angge ik olokon na fug angge weregma setan undama kirisireg turuk uruk lahep.

³⁴Weregman At ap kinangmon atfahon ino waharisireg ik na suburu na turukmu yet harikipteg At suburu abuwap ahun, ik olokon abuwap ahun waharisimu pemerintah amingmingangge uang embelug lalihip uruk inap men siyag ane turuk inap men enere uruk lahep,” ibag.

³⁵”Mun ane man ane alemet ondomiyet Allah oluk teg lit wereg. We tem peruk inap arimanowen alem ino fag turuk,” ibag.

³⁶Farisi ahun ekeyen Yesus fam, ”Hat suburu an min nulen lul,” ibagma Yesus Farisi ahun ino ibam libareg heriyeg lit suburu naruk latfag.

³⁷O pumbuk ino siyag-siyag ane turuk hiyap eke welatfag. Welatfareg, ”Yesus Farisi ahun eke ambeg wahareg suburu naruk,” urukmu hol hibareg kubag fanowon fam ahaluwe amben fanowon hinanggoho walug watfareg Yesus wereg ambeg kulug

³⁸Ambolma in arik libareg uba yatuk latfag. Uba yatuk lit il ahaluwe Yesus uyugmu wamburuk latfagma Yesus uyugmu ambiyangen tung hibareg oruk yaron fam sumaho fibareg ahaluwe amben fanowon Yesus uyugmu hililfag.

³⁹Hililtukmu Farisi ahun Yesus hondohibag ahun inowen yet hibareg indimuwen wenggeltuk lit, ”Ap aru Allahn mondotebon nabi walepteg hahen uyugmu tung hehek hiyap tu siyag ane turuk hiyap ulug oluk alep,” peruk latfag.

⁴⁰Undaman ari peruk latfagma Yesusen te, ”Simon, wene eke hiyag hirik ohon,” il larikim, ”In,” ibag.

⁴¹In ibagma Yesusen te, ”Ap pirenen onowe suwon misihen tohon uang paleg latusa. At misihen uang anggen teng-teng angge 500 paleg latisi, at ekeyen uang anggen teng piren 50 paleg latisi.

⁴²Paleg lit welatusareg it piren itanowen onowe fam, ’Nininggikmu elehen ayeg wat hum fug teg lahe,’ urusama onowe inowen, ’Notsi, paleg lahebon fahet og numuhup fug, mondabi og hisarikik,’ irisi. San ap suwon indi anggolo haruk lit wereg?” ulug Yesusen Simon kapal hibag.

⁴³Kapal hibagma Simonen, ”Teng-teng angge og itisiyon inowen indi anggolo haruk lit wereg peruk lahi,” il larikim Yesusen, ”Yu, fano hiyag nerehen,” ibag.

⁴⁴Fano hiyag nerehen ibareg hiyap ino hebeloho kilap haruk lit, ”Hiyap tu haruk lahen? An hat hibam tuma kihi angge famen ik nuyug umag tamihin ulug og nerehen fug. Hiyap tuwen nuyug il ahaluwe fam umag nabehekteg oruk yaron fam sumag nabehek.

⁴⁵Haren mako pug toho hi nabehen fugmu An tuma kik wahimu hiyap tuwen nuyug mako pug toho hi nabehekteg ambiyangen tung neyehek.

⁴⁶Haren ahaluwe fanowon nunggulmu are nabehen fug, hiyap tuwen ahaluwe amben fanowon nuyugmu hilil nabehek.

⁴⁷Hiyap tuwen An nubahet indi anggolo neyehekma aren siyag ane anggolo turuk latisiyon Allahn ambolma embeselug elehap tehek. Ap eke siyag ane we tot turukon Allahn elehap turukmu indi we tot haruk lit wereg,” ibag.

⁴⁸Ibareg hiyap ino fam te, ”Siyag ane turuk latikinon Allahn ambolmaya fesehekma eleg aha,” ibag.

⁴⁹Elehap tehek ibagma it Yesus men suburu naruk lit welatfahon arimanowen te, ”Ap tu sa hag toho wereg? Siyag ane aben turukon hun tuwen eleg aha uk hag teg?” unundaman peruk latfag.

⁵⁰Unundaman peruk latfagma Yesusen hiyap ino fam te, ”An nubam wenggel hehenon ariyen fano ahenma hindi se roho hibam lamihin,” ibag.