Read Angguruk Yali LUKAS 9 Bible Online

LUKAS 9 - Angguruk Yali bible

LUKAS 9

¹Yesusen otsi nisanggowen wol enepfareg, ”Hiren setan ap unundama siyag angge werehon wili feseruk lit ap ouk unubam werehon oho hihir eneptuk lamuhup,” ulug inineyap enepfag.

²Inineyap enepfareg mon eneptuk lit, ”Allah ap obog toho Hinikni aruhuwon fahet hiyag isaruk lit ouk warukon eke hihir eneptuk lamuhup,” ibag.

³”Hit laruk lit wanggun men sum men naruk angge men uang men sum henebemon piren men mun angge man angge wa fug angge henebe eneg lahup.

⁴Ap ekeyen pali wat heneptuk halug o ino welamuhupteg o ekema luk oho lit halug welamuhup ambeg inowen wilip amuhup.

⁵Ap eke hit fahet ninirim uruk halug o pumbuk ariyen wilip amuk oho lit kinang hunuyugmu werehon it wenggel haruk lamuhup ulug ho roho pila feselug laruk lamuhup,” ulug Yesusen otsi hiyag isibareg mon enepfag.

⁶Mon enepfagma libareg o pumbuk walinggoho wene fanowon hiyag isil laruk lit ap ouk warukon hihir eneptuk latfag.

⁷Herodes ap suwon Galilea kinang seneg latfahon inowen Yesus otsi menen turuk latfag ane ari fahet ap winonen te, ”Yohanes Herodesen ware feserisiyon ino oluk atisi,” ulug urukmu hol isibareg Herodes ino indi su atfag.

⁸Ap winonen Yesus fahet enele uruk lit, ”Elia indam welatfahon nin inam atisi,” urukmu ap winonen, ”Wene tam hiyag isaruk latfahon arimano misig oluk atisireg turuk ano,” uruk latfag.

⁹Uruk latfagma Herodesen, ”Yohanes ino anden anggolop kong toho ware feserikik angge famen ap ari fano ane anggolo turuk urukon ari sa fahet uruk?” ibareg ap ari nilen yet hele pibag.

¹⁰Yesus otsi nisanggowen itano suhuloho Onowe ambeg watfareg yabuk ari-ari turukuk ulug hiyag itfagma Yesusen nenemumu lulteg tot welamuhuk ulug o pumbuk misig unuk Betsaida ino it eneg hondog eneplug libag.

¹¹Laruk urukon ap anggolowen hol hibareg onombolim libareg palu arik libagma Yesusen fano wahasa pibareg Allah ap obog Inikni aruhu ulug hiyag isaruk lit ap ouk warukon unundaman fanowap nenepmisi pibahon eke fanowap eneptuk latfag.

¹²Mo ubuk ik ohoma Yesus otsi At iraham libareg enele uruk lit, ”Nit tuma farema welahereg ap anggolo aruma o walinggoho lalusareg nohoruk ambeg men suburu men yami rulusan hiyag isimin,” ibag.

¹³Ibagma Yesusen, ”Hiren suburu og isalihip,” ibagma, ”Niren foroho laheyon suburu roti fuwaben, ikan piren ariya wirim am fug tehen suburu anggolo onggo palik lalug eneg te ap anggolo aruma wirim am teg,” ibag.

¹⁴Ap welatfahon arimano teng-teng angge 5.000 welatfag. Yesus otsiyen ari ibagma Yesusen it unubam, ”Ap aruma teng piren heheg palu amusareg hur amusan hiyag esemek,” ibag.

¹⁵Ibagma otsiyen ap arimano fam teng piren heheg hur amiyek ibagma hur atfag.

¹⁶Hur atfagma Yesusen roti fuwaben men ikan piren men wibareg seneg lit poholma lahap haruk lit sembahyang ibareg otsi fam fibir enebiyek ulug kut-kut ininggikmu imbibag.

¹⁷Og isibareg nibagma it obog toho enehum atfag. Enehum atfagma alindik atfahon sum nisanggowen yuharoho imbibag.

¹⁸Misihim sambil Yesus amu sembahyang urukmu otsi ambeg watfagma hinog og isaruk lit, ”Ap anggolo aruman An fahet sa peruk?” ibag.

¹⁹Ari ibagma iren hebeloho hiyag utuk lit, ”Ap winonen te Yohanes ap ikma pilap eneptuk latisiyon ino ano, winonen te Elia ano, winonen ap indam wene hiyag isaruk latfahon war atfahon misig oluk atisireg uruk ano,” ulug hiyag utuk latfag.

²⁰Hiyag utuk latfagma Yesusen, ”Hiren te An fahet sa peruk lahep?” ulug umung isibagma Petrusen, ”Hat Mesias Allahn mon haptisiyon ino welahen,” ibagma

²¹Yesusen otsi fam ele ine roho komo eneptuk lit, ”At Mesias Allahn monde ferisiyon ino wereg ulug ap hiyag isa fug,” ibag.

²²Yesusen otsi hiyag isaruk lit, ”At ap kinangmon atfahon ino aben ubam siyag ane anggolo tuhupmu Yahudi inap onowesi men Musa wene onoluk inap men imam onowesi menen At ninirim uruk lit ware fesuhupmu hup pirenam wareg welaruhureg inggik hinahaneg angge Allahn olukap tuhu,” ibag.

²³Ibareg it obog toho hiyag isaruk lit, ”Ap An nombolim larukon inowen inggareg apmayap taruk lit likiya hupmu teltuk ahen ha rulug An nombolim laruk laruhu.

²⁴An noluk welaruhuk peruk lit werehon ino oluk welaruhu fug. An nunuk fahet ware fesuhubon ino mondabi oluk welaruhu.

²⁵Ap eke pohol men kinang men mun angge man angge ngi aruhu angge famen inggarehen siyahap tahureg war aruhumu nangginoho fano welaruhu?

²⁶Ap sa An men nawene men fahet inggali haruk halug At ap atik ibahon ino Ikni men otsi malaikat menen ineyap turukmu umbagpag toho waruhu sambil ap ino fahet inggali hahu,” ibag.

²⁷”Hit ap aruma welahebon ekeyen Allah ap obog toho Inikni arik oho waharukmu kim hahupteg eneg war amuhup. Ari we tem toho hiyag hisaruk lahi,” ibag.

²⁸Wene ari hiyag isibareg hup likinenam atfagma Yesusen punumu sembahyang ul ulug otsi Petrus men Yohanes men Yakobus men hondog eneplug lahibag.

²⁹Sembahyang urukmu Yesus orohole nin atfagma asum umbagpag turuk lit yanggo ribag.

³⁰Weregman ap piren iraham unduhuk lit At men enele uruk latfag.

³¹Enele uruk latfahon itano Musa men Elia men enebe umbagpag toho inam atfareg o Yerusalem lahunmu hubam ari-ari tuhup ulug hiyag utuk latfag.

³²It enele urukmu Petrus men ori men nohoruk latfareg in atuk lit yet harukmen Yesus anggelem atfagma ap piren iraham unduhukmu yer isibag.

³³Yer isibagma it piren lul ulug turukmen Petrusen Yesus hiyag utuk lit, ”Nowe, o tuma fanoma nenehiyeg toho welahereg tomi hinahan wibul, Hat fahet misig, Musa fahet misig, Elia fahet misig wit husul,” ibag. O wit husul ibag ane ari Petrus indimu sohu roho wereg lit apelehen ibag.

³⁴At ele urukmu itano hina watfareg hililip enepfagma it enekol hibag.

³⁵Enekol hibagma ele hina apmaneyen uruk lit, ”An namloho mumal tarikikon tu, At ele holtuk lamuhup,” ibag.

³⁶Ele ari urukmu itano Yesus amu unduhuk latfag. Yesus otsiyen hibag ane ari fahet ap winon hiyag isa fug angge we sohuwon atfag.

³⁷Nohibareg likiyamon punumuwen wamburukmen ap anggolo luhaloho Yesus olohotma watfag.

³⁸Luhal arik watfahon arimano misihen Yesus fam, ”Nowe, an namloho misig enehon pen hamihinen Hat hubam heng haptuk lahi,” ibag.

³⁹”Setan siyag angge ino malik undama kulug watukmu ele hum toho uruk lit malik ebe miyaloho hik-hak isarukmu elemahuwe salno-salno wamburuk. Siyag angge inowen ele yong turuk lit malik ino famen wilip am fug angge wereg.

⁴⁰Hat hotsiyen yanggaloho wilibiyek ihimu yanggaluk fug teg lahasa,” ari ulug ikniyen Yesus hiyag itfag.

⁴¹Hiyag itfagma Yesusen, ”Hit aruma welahebon Allah ubam wenggel ha fug angge hinindi sohu roho weregman eneg An nindi imbik wamburuk lit hup noenam hit men welaruhuk? Malik ari folo walug maniyek,” ibag.

⁴²Ibagma malik ino Yesus horogma walug watfagma siyag angge inowen malik ino miyaloho kinangma hik isibagma Yesusen setan ino ele ine roho pet turuk lit malik ino fanowap tibareg ikni og itfag.

⁴³Og itfagma Allah inggik ine reg lit fanowap tehek ulug enekol hibag. Yesusen tibag ane fahet enekol haruk lit weregma Yesusen otsi unubam ele uruk lit,

⁴⁴”Anden hiyag hisaminon aru hinisanggo fano roho holeg lamek: At ap atfahon ino ap kinangmon ininggikmu aruhu,” ibag.

⁴⁵Yesusen hiyag isibag ane fahet otsi inindi seleg atfag fugmu sohu roho welatfag. Nungge hiyag nisamin ulug ehek ulug enekolen kapal hibag fug.

⁴⁶Welatfagma Yesus otsi it-it enele uruk lit, ”Nit welaheyon aruma hat suwon ano, an suwon ano,” ulug enele sahaltuk latfag.

⁴⁷Iren peruk latfag ane Yesusen oluk atfagma malik toron eke wak libareg iraham unduhuk fik watfareg ele uruk lit,

⁴⁸”Ap san malik toron tu hahon An nunuk fam ibam hondoko kilaptuk halug at inowen An ibam hondoko kilap naptuk. Ap san an ibam hondoko kilap naptuk halug An Nikni mon naptisiyon ino oho ibam hondoko kilaptuk. Hit sehelimu an toron welahi perukon ino eneg ori palimu wereg,” ulug hiyag isibag.

⁴⁹Welatfagma Yesus ot Yohanes inowen, ”Nowe, ap misig Hat hunuk uruk lit ap unundama siyag angge werehon yanggaloho wiliptukmu yet harukukteg hat nit men ambiyeg laruk lahe fug angge re imbisin ulug pet turukuk,” ulug Yesus hiyag itfag.

⁵⁰Hiyag itfagma Yesusen hebeloho hiyag isaruk lit, ”Ap eke nit men seli roho wereg elehon ino nit fil werehen imbisin ulug pet tuk fug,” ibag.

⁵¹Allahn Yesus An men welamuhuk ulug lisoho wahuk pibag sambil ino horog atfagma Yesus wenggel hibareg Yerusalem lamin ulug libag.

⁵²Yerusalem lamin ulug libareg otsi eke fam, ”Hit tam lalihip,” ulug mon enepfag. Mon enepfagma libareg Samaria inap inibam o pumbuk misig libag. Libareg Yesus men waharukon noholusa ambeg o hiyag nesemek ulug heng enepfag.

⁵³Heng enepfagma it Samaria inaben, ”Yesus At Yerusalem lahu ahun nit ninirim,” ibag.

⁵⁴Ari ibag ane Yesus otsi piren Yakobus men Yohanes menen hol hibareg Yesus fam, ”Nonowe, ap aruma indoken namisiyen indok poholman pilabik wamulen pilabiyek in,” ibag.

⁵⁵Ari ibahon fahet Yesusen siyag pibareg per enepfag.

⁵⁶Per enepfareg Yesus men otsi men o winama libag.

⁵⁷Yesus otsi men kema larukmen ap misig Yesus ambeg watfareg, ”Nowe, Hat kema-kema lahun ambeg an oho ambiyeg laruk lamuhuk,” ulug Yesus fam ibag.

⁵⁸Ari ibagma Yesusen, ”Olomene nohoruk ambeg ei helep elma wereg. Nin ari hag toho suwe nohoruk ambeg ei e fam wirig. At ap kinangmon atik ibahon ino yug toho nohoruk ambeg mondabi eleg,” ulug ap ino fam ibag.

⁵⁹Ap ino fam ari ibareg Yesusen ap winon eke fam te, ”An men ambiyeg lul,” ibag. Ibagma ap inowen Yesus fam heng uruk lit, ”Nowe, an nikni war arik oho turuken lamin. War atmisimu yale feselug hambeg suhuloho waruhuk,” ibag.

⁶⁰Ibagma Yesusen hebeloho ap ino fam ele uruk lit, ”Ap war atukon ari ap atam war atuson arimanowen yale fusukag. Anden hat hubam Allah ap obog toho Inikni aruhuwon fahet lahunteg hiyag isaruk laruhun ulug hiyag hutuk lahi,” ibag.

⁶¹Ari ibagma ap winon eke watfareg Yesus umung haruk lit, ”Nowe, an oho Hat men laruk laruhuken an nibam suhuloho laminteg nori an men werehon nori ulug hi enebuhukteg hambeg waruhukmu eneg Hat men laruk lamuhuk,” ibag.

⁶²Ari ibagma Yesusen ap ino fam ele uruk lit, ”Ap ekeyen yabuk wituk lit wen ele fano hale femin peruk angge famen ambol fil hebeloho yet haruk halug wen ele siyag aruhu. Ari famen ap ari Allah weregma kuhu fug,” ibag.