Read Angguruk Yali ULANGAN 10 Bible Online

ULANGAN 10 - Angguruk Yali bible

ULANGAN 10

¹Musan ele uruk lit, ”Allah ubam nele irikik sambil ino NINIKNI inowen an hiyag nutuk lit, ’Helep tamon hik isarikinon ubalma keron piren eke seng tebemihinteg helep itano foroho ambeg ulug e sali roho peti eke witmihinteg An nambeg tom fam lahik watmihin.

²Watmihinmu Anden nele tam hahatikikon ino hikit toho helep keron fam haharoho umbuhukmu haren e sali roho wirihon fam kilapmihin,’ ulug hiyag nitisi.

³Hiyag nitisimu anden e akasia sali roho peti witikikteg helep tamon hag toho keron piren seng tebeserikikteg tom fam walug laharikik.

⁴Walug laharikikmu NINIKNI Allahn Wene Numen tam haharoho emberisiyon hikit toho helep walug laharikikon itano fam hahatisi. Hit tom alma palu roho weregma NINIKNI Allahn indok sehelimuwen ele hiyag hisarisiyon alem numen hahareg angge an og nitisimu

⁵tom ino famen wambik waharikik. Wambik waharikikteg NINIKNI Allahn irisi ane hikit toho helep piren itano e sali roho witikikon fam kilaptikikon ino ketiya oho wereg,” ibag. (

⁶Welatfareg Israel inap ik fahet Yaakan inaben habulfag ambeg itano embeselug o Mosera libag ambeg ino hun Harun war atfagma kinangma sale fisibag. Sale fisibagma amloho Eleazar ino ikni ubalma Allah fahet hubu lahaptuk laruhu ulug imam lahapfag.

⁷Imam lahapfareg itano o Gudgod keyen tulug ik anggolo wereg ambeg o Yotbata libag.

⁸O Yotbata libag li itano NINIKNI Allahn ap ununggul unuk Lewi inap unubam ele uruk lit, ”Hit An namingmingangge imam wereg lit peti Wene Numen haharehon kilabeg angge foroho lit ap arimano An nunuk fam hi eneptuk lamuhuben hunumbaharuk lahi,” ibag ane hikit toho ketiya oho iniyabuk turuk.

⁹Allah NINIKNI inowen Lewi inap unubam hiyag isaruk lit, ”Hit kinang ngi roho welam fug angge we An nubam eneg welamuhup,” ibag ane hikit toho Israel inap ununggul unuk winonen kinang ngi reg hag toho Lewi inaben kinang ngi roho wereg eleg.)

¹⁰Musan nin ele uruk lit, ”Tam hup hunduhuk unukoho hunduhuk teng misig nubam hilag nuwalenam 40 tom fam welatikik hag toho nin wereg lit an nele ketiya irikikon oho NINIKNI Allahn holtuk lit, ’Israel inap elehap enebuhuk fug,’ perisi.

¹¹Ari perisireg an hiyag nutuk lit, ’Kinang hunumbasi fam sali imbiyag ambeg ngi amuhuben hat onowe roho wereg lit Israel inap arimano hondog eneplug lahun,’ irisi,” ulug hiyag isibag.

¹²Musan ele hiyag isaruk lit, ”Ketiya Israel hinap nori, NINIKNI Allahn iren telep peruk ane iminon holeg lamek! Allah NINIKNI fahet henekol toho wereg lit ari-ari turuk lamuhup ulug komo neneptuk ane hikit toho turuk lit At hinindi reg lit henehimeyen oho henebeyen oho At fam eneg wenggel haruk lamuhup.

¹³At awene anden o yoho hiyag hisaruk lahiyon arimano enepma welamuhup halug fano welamuhup.

¹⁴Allah NINIKNI inowen pohol yaron men horohon men seneg lit kinangma werehon obog toho ngi reg lit wereg angge famen

¹⁵ap winon obog toho embeselug we hit hunumbasi eneg An numalikisi nindi pulmu welamuhup ulug indi hibag hag toho hir oho mumal heneptisimu ketiya oho umalikisi welahep.

¹⁶Ari fahet hununggul uwag helep ineyon hag welam fug angge hinindimu ambilahap palehon hag toho wereg lit Allah ele eneg holtuk lamuhup.

¹⁷Aben nunumba ulug wel eneptukon arimano apma regma Allah NINIKNI eneg ir oho Inikni wereg, kinangma inine roho werehon palimu At eneg wereg. At eneg ebe suwon ine werehon fahet ap enekol toho wereg. Aren te ap tu siyahon, tu fanowon puk fug angge nungge-nungge og utukon fahet eneg nindi ulug inibil atuk eleg.

¹⁸Malik suwarehon men hiyap yuwohon men aben siyahap enebuhup ulug fet enesug. Ap pohon oho indi enesug lit naruk angge men sum men og isaruk.

¹⁹Hir oho o Mesir ap pohon hag toho welatikip angge re ap pohon hit men werehon arimano hinindi enesug lamuhup.

²⁰Allah NINIKNI fahet henekol toho wereg lit At fam eneg wenggel haruk lamuhup. Hit hininggik At men ahandip toho weregman eneg aben tem toho uruk pukag ulug At unuk fam eneg henele tem toho uruk lamuhup.

²¹At inowen hit fahet ap enekol atuk ane alem suwon eke hag eke hag turukmu hit henemuwen yet haruk latikibon ari fahet Ninikni Allah At wereg ulug At eneg wel turuk lamuhup.

²²Nit nunumbasi o Mesir libahon arimano enebe teng hinahan 70 welatfag angge famen Allah NINIKNI inowen let neneptukmen eneg ketiya nenebe anggolo suhal poholma winag isa fug teg hag toho welahe,” ulug hiyag isibag.