Read Angguruk Yali ULANGAN 11 Bible Online

ULANGAN 11 - Angguruk Yali bible

ULANGAN 11

¹Musan ele uruk lit, ”Hit honoluk wereg li NINIKNI Allah hinindi reg lit Allahn alem tuk teg ane eke hag eke hag hiyag hisarisi ane men ari-ari tuk fug ulug komo heneptisi ane men hinine roho seneg lamuhup.

²NINIKNI Allahn alem suwon eke hag eke hag turuk lit hunubabut hal heneptuk latisiyon ino o yoho tu famen henepeleg aruhu fug! Hit hunumalikisiyen Allahn ari roho turukmu yet haruk latusa fug. Hit honolohotman eneg NINIKNI Allah inggik ineyonen su ane turuk latisi.

³At inowen enehangge anggolo wal haruk lit Mesir inap onowe suwon men umalikisi men enesehelimu alem angginon eke hag eke hag monde feruk latisi.

⁴Monde feruk lit Mesir inap sehen senehon arimano oho mondabi siyahap eneptisi. It arimanowen kereta wam kudan lisoho walug laruk angge fam lahalug hit mug heneplug laruk lit ik Longgop ahum pulmu kurukmen Allahn perisi ane hikit toho iken hondo eneptisimu Mesir inaben inine roho turuk ane eleg atisireg ketiya oho wereg eleg.

⁵Hit ik Longgop embeselug lekma larukmu At inowen fet henesugmen eneg hondog heneplug tuma waharisi.

⁶Lekma laruk latikip li itano hun Ruben amloho Eliab inowen endetfahon Datan men Abiram menen Allah ele ying turuson fahet Allahn unusimin perisimu hit Israel hinap hiniline kinang inowen ele a rebeserisireg it piren unuhesi malik men inibamet enemingminganggeyet enembohomet pil isarisi.

⁷Alem suwon arimano obog toho NINIKNI Allahn turukmu hit hinilen yet haruk latikip.

⁸Ari fahet alem tuk teg ane anden o yoho hiyag hisaruk lahiyon obog toho hinine roho seneg lamuhup. Hinine roho seneg lamuhup halug Allahn hinineyap henebuhumu kinang lahup ambeg ino ngi arik kuhupteg

⁹kinang NINIKNI Allahn nit nunumbasi men nunubam og hisahuk ulug sali imbibahon fam amusun toho weregman eneg sabal atuk lamuhup. Kinang ari ag owe men kin ahaluwe men eleg am fug angge mondabi anggolo wereg.

¹⁰Hit lahup ambeg ino o Mesir kinang siyahon hag toho wereg eleg. O Mesiren hiren anggen yabukmu fok turuk latikip halug halo uhu rohon ulug lisag toho ik hinanggoho kinang ino ahaluweyap turuk latikip angge famen

¹¹kinang hiren ngi amuhubon ino punu ke men tonggo reg ambeg men weregma osit wamburuk lit kinang ahaluweyap turuk.

¹²Kinang ari NINIKNI Allahn ilen kim haruk lit mo ilig atug wirig atukmu oho forohoman eneg wereg.

¹³Hiren alem tuk teg ane anden o yoho hiyag hisaruk lahiyon we tik-tem toho hol halug henehime men henebe obog tohowen NINIKNI Allah hinindi reg lit Aren fano perukon hikit toho turuk lamuhup halug

¹⁴roti anggen uwan yabuk fugmu Allahn osit og hisaruk lit yahoma oho pilabik waharuk laruhu. Ari roho turuk laruhumu hiren roti anggen men hele anggur anggen men e zaitun anggen men tahan tarukmu

¹⁵henembohom tahe seiyon naruk lamuhup. Naruk angge anggolo werehen henehum ouk toho naruk lamuhup.

¹⁶Hinindi nin atuk lit NINIKNI Allah henembol yig umuhup tohon ulug hinindi anggat toho welamuhup. Ap winonen tu Allah hag toho wereg ulug wel eneptuk angge hiren oho wel eneptuk lit it unubam sembahyang uhup fug!

¹⁷It unubam sembahyang uruk lamuhup halug NINIKNI Allahn olok haruk lit pohol fil sok lare fuhumu osit eleg atikim kinangman anggen wilip aruhu fug. Ari teko lahu halug hit kinang fanowon NINIKNI Allahn og hisahuwon famen folo-folo longgo uhup.

¹⁸O yoho anden hiyag hisaruk lahiyon aru milal taruk lit hinindimu foroho lamuhup. Wene ari nenepeleg aruhu fug ulug hininggikmu men hinilahuwagma men pug toho foroho lamuhup.

¹⁹Olman funggalman nohuk oho lir oho in atlug oho henele ninirim ulug umbusuk fug angge wene ari hunumalikisi hiyag isaruk lamuhup.

²⁰Elehet o pumbuk walinggoho ohowon sok kurukon men hit hinibam kurukon sokole umbangguwag ke men haharoho umbuhup.

²¹Ari roho turuk lamuhup halug hit men hiren endebuhubonen endebuhubon men kinang NINIKNI Allahn nunumbasi unubam og hisahuk ibahon fam amusun toho weregman eneg sabal atuk lamuhup. Hit kinang ino fam weregman eneg pohol wiriloho imbibahon ino eleg aruhu.

²²Hiren ari-ari turuk lamuhup ulug hiyag hisaruk lahi ane hinine roho seneg lit, NINIKNI Allah hinindi reg lit, At men hininggik ahandip toho wereg lit, kalem pikiron Aren hiyag hisarukon eneg laruk lamuhup halug

²³NINIKNI Allahn o pumbuk ap inineyon enebe anggolo roho werehon arimano hit honolohotman yanggal enebuhumu hit hinine elehon henebe we tor angge welahebonen it enengginang ilmig ta kuhup.

²⁴Kuhupteg kinang hunuyuhen sobuhup ambeg arimano obog toho hit ngi amuhup. Ari roho ngi atil laruk lit lekma ik ambut filen tulug lahareg tom Libanon ik eleruk fil, ik suwon Efrat mo lahik waharuk filen ik saho ahik suwon mo ubuk uruk fil ari obog toho hiren tohon aruhu.

²⁵Hunuyuhen sobuhup ambeg arimano NINIKNI Allahn sali emberisi ane hikit toho ap obog toho inindi enekolap enebuhumu hit fahet yuk lagmag uruk lit ap hiren apmayap enebuk fug tehon misig oho welaruhu fug.

²⁶O yoho anden hit fano welamuhup ane men siyag amuhup ane men fahet seleg toho hiyag hisihimu siyahon ke fanowon ke ulug hinindimuwen wenggel hemek!

²⁷NINIKNI Allahn ari-ari turuk lamuhup ulug komo heneptuk ane anden o yoho hiyag hisaruk lahiyon arimano hikit toho turuk lamuhup halug fano welamuhup.

²⁸NINIKNI Allahn komo heneptuk ane sobir isaruk lit kalem pikiron anden hiyag hisaruk lahiyon embeselug ap winonen tu Allah hag toho wereg ulug wel eneptuk angge hit henepelehon onombolim laruk lamuhup halug siyag amuhup.

²⁹ NINIKNI Allahn hit hondog heneplug kinang hit ngi amuhup ambeg hunumbahik lahumu ap obog tohowen holukag ulug tom Gerizim fam lahakup inaben enele hi roho fano welamuhup ane hiyag isarukmu tom Ebal fam lahakup inaben siyag amuhup ane hiyag isahup.

³⁰Tom piren itano ik Yordan fuma fil Kanaan inap enengginang fam kebunggalem Yordan tonggoma larukon hubula fil o Gilgal iraham usa ahen o More werehon arimano horogma wereg.

³¹Hit we tem toho ik Yordan paloho nindig atlug kinang NINIKNI Allahn og hisahuwon ino ngi arik kuhupteg yug toho welamuhup.

³²Yug toho welamuhup halug alem tuk teg ane eke hag eke hag o yoho hiyag hisaruk lahiyon obog toho hikit toho turuk lamuhuben yet teg lamuhup,” ulug hiyag isibag.