Read Angguruk Yali ULANGAN 12 Bible Online

ULANGAN 12 - Angguruk Yali bible

ULANGAN 12

¹Musan ele hiyag isaruk lit, ”Hit honoluk wereg lit kinang nunumbasi INIKNI Allah inowen og hisahu ambeg weregman eneg Allahn ari-ari turuk lamuhup ulug komo neneptukon arimano enepma welamuhubon arimano iminon tu:

²Kinang ino fam kuhupteg ap yanggal enebuhubon arimanowen tom yaron famen oho punumuwen oho e alma sakoman oho nunumba ulug wel eneptuk ambeg arimano hiren halog tubusuhup.

³Fobik oho wel eneptuk lamuhup fug ulug hubu lahaptuk ambeg arimano oluna feseruk lit usa ahalep witukon arap toho ilkal isaruk lit e uwag Allah hiyap angge wereg perukon unuk Asyera fahet hutuk teberukon indokma yale feseruk lit usangge obog toho halog tubusuhup.

⁴Iren nunumbasi ulug punumuwen oho e alman oho wel eneptuk ane hikit toho hiren oho Allah NINIKNI ino wel turuk lamuhup fug.

⁵Allah NINIKNI inowen Israel ninap nununggul unuk nenengginang winon embeselug we o misig tu eneg An nibam welaruhu ulug mumal taruk lit hiyag hisahu. At unuk wel tul ulug mumal tahu ambeg eneg laruk lamuhup.

⁶Mumal tahu ambeg ari eneg Allah fahet emberuk angge obog toho walug laruk lamuhup. Walug laruk lamuhubon arimano wam waroho hubu lahabul perukon men, esebul perukon men, mun angge man angge hininggikmu atukon winon umbat talug numon arimano men, umbuhuk ulug sali emberuk lamuhubon men, Allah fahet umbuhup ulug hiyag hisaruk lamuhubon men, hinindimuwen umbuhuk peruk lamuhubon men, henembohom sapi, kambing, domba umalik wandabon men hiyag hisahu ambeg ino walug laruk lamuhup.

⁷Allah NINIKNI inowen let neneptuk lit weregma niren yabuk turukmen anggen anggolo nininggikmu atisi ulug henehiyehen hunuhesi hunumalikisi men hiyag hisahu ambeg ino laruk lit Allah NINIKNI olohotman wam waroho naruk lamuhup.

⁸Ketiya hit hinindimuwen o aruwen Allah wel tul peruk ambeg arimanowen saplangge wel turuk lahep hag toho fobik oho wel turuk lamuhup fug.

⁹Ketiya kinang Allah NINIKNI inowen og hisahumu yuwag toho welamuhup ambeg ino hit uwan kirikip fug angge famen

¹⁰fobik ik Yordan paloho nindig amuhupmu Allah NINIKNI inowen ap seliyon obog toho apmayap enebuhureg kinang og hisahu ambeg ino hinindi yuwag toho welamuhup halug

¹¹Allah NINIKNI inowen, ’O misig tuwen eneg An nunuk wel naptuk lamuhuben waharuk lamuhup,’ ulug hiyag hisahu. Allah fahet emberuk lamuhup ulug hiyag hisaruk lahi angge arimano obog toho wam waroho hubu lahabul perukon men, esebul perukon men, mun angge man angge hininggikmu atukon numon arimano men, umbuhuk ulug sali emberuk lamuhubon men Allahn hiyag hisahu ambeg ino eneg walug laruk lamuhup.

¹²Hunumalikisi men henemingmingangge men Lewi inap ininggarehen kinang ngi reg elehen hinibam werehon arimano men henehiyehen Allah NINIKNI olohotma waharuk lamuhup.

¹³Hit hinindimuwen wenggel haruk lamuhup ambeg arimanowen Allah fahet hubu lahaptuk lamuhup fug.

¹⁴Israel ninap nununggul unuk nenengginang winon embeselug we o misig tu eneg An nibam welaruhu ulug mumal tahu ambeg inowen eneg wam waroho hubu lahaptuk lit anden hiyag hisaruk lahiyon winon oho turuk lamuhup.

¹⁵O kema-kema welamuhup ambeg wam waroho naruk lamuhup. Allah NINIKNI inowen tor angge oho su angge oho og hisaruk ane hikit toho naruk lamuhup. Ap obog toho nunumbasiyen ibag ane hikit toho Allah ambeg la reg inap men alem unubam werehen la fug teg inap menen wam faremon kijang men rusa men naruk hag toho henembohom olma werehon oho naruk lamuhup.

¹⁶We mep eneg nul fug ulug ik hag toho kinangma hilil isaruk lamuhup.

¹⁷Roti anggen, anggur anggen, e zaitun ahaluwe men hininggikmu atukon winon umbat talug numon arimano men, henembohom sapi, kambing, domba umalik wandabon men, Allah fahet umbuhuk ulug sali emberuk lamuhubon men, hinindimuwen umbuhuk peruk lamuhubon men, emberuk angge eke winon hinibam welamuhup ambeg arimanowen naruk lamuhup fug.

¹⁸Niren yabuk turukmen anggen anggolo nininggikmu atisi ulug henehiyeg toho hunumalikisi men henemingmingangge men Lewi inap hinibam werehon arimano menen emberuk angge arimano obog toho Allahn mumal tahu ambeg ino walug laruk lit Allah olohotma naruk lamuhup.

¹⁹Hit kinang ari fam wereg lit honori Lewi inap arimano umbusuk fug angge let eneptukmen eneg welamuhup.

²⁰Allah NINIKNI inowen sali imbibag ane hikit toho kinang welamuhup ambeg hili yat toho emberuk laruhu halug hit hinindimuwen lahuk puhup ambeg arimanowen oho wam waroho naruk lamuhup.

²¹Allahn An wel naptuk lamuhup ulug hiyag hisahu ambeg ino hit yatma welamuhup halug anden hiyag hisaruk lahi ane ari hikit toho hinibam wal-wal wereg lit wam sapi, domba, kambing NINIKNI Allahn og hisaruk laruhuwon arimano hinindimuwen nul peruk lamuhubon wirim toho waroho naruk lamuhup.

²²Ap obog toho Allah olohotma la reg inap men la fug teg inap menen wam rusa men kijang men naruk hag toho henembohom olma werehon oho naruk lamuhup.

²³Mep fam himengge werehen wam mebet angge naruk lamuhup fug.

²⁴Mep arimano nul fug ulug kinangma hilil isaruk lamuhup.

²⁵Ari roho turuk lamuhubon fahet NINIKNI Allah ahiyeg toho welaruhumu hit hunumalikisi men fano welamuhup.

²⁶NINIKNI Allah fahet emberuk lamuhup ulug hiyag hisarukon arimano men, hininggarehen umbuhuk ulug sali emberuk lamuhubon men Allahn hiyag hisahu ambeg walug laruk lamuhup.

²⁷Wam waroho hubu lahaptuk angge unuwet mebet hubu lahaptuk ambeg yaltuk lit osoko nul perukon arimano mep eneg hubu lahaptuk ambeg hilil isaruk lamuhup.

²⁸Anden hiyag hisaruk lahiyon obog toho fuki roho wenggel haruk lit Allah NINIKNI inowen fano peruk ane turuk lamuhup halug hit hunumalikisiyen endebuhubon oho fano eneg welamuhup,” ibag.

²⁹Musan ele hiyag isaruk lit, ”Allah NINIKNI inowen ap kinang kuhup ambeg ino fam wereg inap yanggal enebuhumu hit kuhupteg ngi amuhup. Kuhup ambeg ino wereg lit yebangge elma kuhup tohon ap kinang tam ngi roho welatusa inaben nunumba ulug wel eneptuk hag toho niren oho turuk lamuhuk peruk lamuhup fug.

³¹Allah NINIKNI olohotman ari hag toho hiren turuk lam fug. It arimanowen nunumba wel tul ulug NINIKNI Allahn amben siyag anggolowon peruk ane turuk lit unumalikisi yuhon waroho indokma yal eneptuk.

³²Anden hiyag hisaruk lahiyon hikit toho turuk lit il misig oho umbusuk fug angge nin alem anden hiyag hisaruk lahi fuhon eke un ane milal eneptuk lamuhup fug.