Read Angguruk Yali ULANGAN 13 Bible Online

ULANGAN 13 - Angguruk Yali bible

ULANGAN 13

¹Wene hiyag isaruk ahun nabi ekeyen ano nei walug hiyag isaruk ahunen ano hit hunubam hiyag hisaruk lit, ’Nunumbasi ulug wel eneptuk laheyon hit henepeleg angge famen hiren oho onombolim laruk lit wel eneptuk lamuhuben enehangge tu men tu men hit honolohotman teko lahu,’ ulug sali umbuhu ane hikit toho turukmu yet hahup halug

³at ele holtuk lamuhup fug. Allah NINIKNI inowen te it arimanowen inindiyet enehimeyet abirangge An inindi nasug ano ulug ap ari feneyen wal hisahu.

⁴Allah NINIKNI inowen hit o Mesiren hininggik lisoho emberukmu henehap siye rebelug wiliboho hondog heneptisiyon ino henembol yig utuk lamuhup ulug hiyag hisahu ahun ino war amag. NINIKNI Allahn ari roho laruk lamuhup ulug komo heneptuk ane ino umbusuhup ulug hiyag hisahu ahun ino ware feseruk lit alem siyahon hit henesehelimuwen eleha fusuhup. Ari roho turuk lit Allah NINIKNI fahet henekol toho wereg lit At ombolim eneg laruk lamuhup. At ele holtuk lit ari-ari turuk lamuhup ulug komo neneptuk ane hikit toho turuk lamuhup. Hininggik At men ahandip toho wereg lit At fam eneg wenggel haruk lamuhup.

⁶Honowesi, honotsi, hunumalikisi, hunuhesi hinindi enesug lahebon, honori suburu kuroho naruk lahebon enesehelimuwon misihen aben nenele hol nisahup ulug hit hunubam hirako hiyag hisaruk lit, ’Ap o pumbuk horogma werehon men yatma werehon menen tu Allah hag toho wereg ulug wel eneptukon nit nunumbasi oho enepeleg teg latfahon arimano haren oho wel eneptuk laruhun,’ ulug hinindi kahal eneptuk laruhu halug

⁸ele holuk fug. At fahet nindiyen ulug siyag ane turukon hondo ruk fug!

⁹Allah NINIKNI inowen hit o Mesiren asengseng toho turukmu hondog heneplug wilip atisiyon ino umbusuhun ulug wal hisahu ahun ino war amag. Hit hininggarehen tam helep fam ware fusuhupmu ap winonen fobik pinggi ware fusuhup.

¹¹Ware fusuhup ane fahet Israel inap obog tohowen hol hahupteg enekolen alem siyahon ari hahon eke turuk lamuhup fug,” ulug hiyag isibag.

¹²Fobik o pumbuk hit welamuhup ambeg eke fam hit sehelimuwon unubabut siyahonen onori unubam, ’Aben nunumba ulug wel eneptuk angge hit henepelehon hiren oho wel eneptuk lamuhup,’ ulug inindi kahal eneptuk lamuhup ano. Ari roho turuk urukmu hol hahupteg

¹⁴hiren alem ari fuki roho yami halug fano roho kapal haruk lamuhup. Kapal harukmu we tem toho hit henesehelimuwen ap enehummu siyahap eneptuk ane ari teko larisi ulug ebenam aruhu halug

¹⁵o pumbuk ari mondabi siyahap turuk lit abet enembohomet obog toho karog fam unusuhup.

¹⁶Unusuhupteg it enenggengge walug o sili pulmu palu lahabil lahalug Allah fahet umbul ulug enengge arimanowet o pumbuk obog tohowet indok yale fusuhupmu olun aruhu. Olun aruhumu fobik nin wiri fuhup fug.

¹⁷It enenggengge Allahn siyahap tukag perukon arimano we tor angge oho umbat tul ulug senebuk fug angge obog toho siyahap tuhup halug NINIKNI Allahn olok haruk ane eleg aruhumu hit indi henesug laruhu. We tem toho hiren NINIKNI Allah ele holtuk lit Aren komo heneptuk ane anden o yoho hiyag hisaruk lahiyon obog toho henepeleg am fug angge foroho lit NINIKNI Allahn fano perukon eneg turuk lamuhup halug Aren hit indi hisaruk lit nunumbasi unubam sali imbibag ane hikit toho hit henebe anggolowap heneptuk laruhu,” ulug hiyag isibag.