Read Angguruk Yali ULANGAN 14 Bible Online

ULANGAN 14 - Angguruk Yali bible

ULANGAN 14

¹Musan ele uruk lit, ”Hit NINIKNI Allah umalikisi welahep. Ari fahet ap fong watuk lit hit henehap ke kiriring heheg wat taruk lit honoruk henetelmon paluhup fug.

²O pumbuk kinang atogman atogma werehon arimano obog toho embeseruk lit we hit eneg An numalikisi nindi pulmu welamag ulug mumal heneptisi. Mumal heneptisimu NINIKNI Allah anggengge welahe ulug ap winama werehonen fong watuk hag toho hiren fong watuk lamuhup fug,” ulug hiyag isibag.

³Musan ele uruk lit, ”Allahn na fug ulug irisi angge arimano saliyog nahup fug.

⁴Lebe ruruk angge hit naruk lamuhubon tu: Wam sapi, domba, kambing men,

⁵wam rusa, kijang men, wam sapi faremon, kambing, domba faremon men,

⁶wam uyug ahap fayahowonen pirenam sahaltuk lit narukon men arimano obog toho naruk lamuhup.

⁷Wam unta, pak kelinci, marmot menen pirenam sahaloho naruk angge famen it unuyug ahap fayaho elehen Allah fahet umbuk fug teg angge arimano saliyog nahup fug.

⁸Wam uyug ahap fayahowon famen we misihim sahaloho naruken saliyog nahup fug. Lebe ruruk angge saliyog nahup fug eheyon arimano siyag ulug wareg angge oho senebuhup fug.

⁹Lebe ruruk angge ikma werehon fano naruk lamuhubon tu: inggik werehon men, ahap ahamut werehon men naruk lamuhup.

¹⁰Inggik elehon men, ahap ahamut wereg elehon men Allah fahet umbuk fug teg angge arimano saliyog nahup fug.

¹¹Suwe fanowon obog toho naruk lamuhup angge famen

¹²suwe Allahn nahup fug ulug emberisiyon tu: kut, siyo-mayo, kohoni, kararakni, simu, huhubi, hilalim, uwane, pibalu, kundik men, suwe pak wareg angge narukon men, imbalo narukon men hiren nahup fug.[2]

¹⁹Herenangge inggik werehon Allah fahet umbuk fug teg angge arimano oho saliyog nahup fug.

²⁰Suwe ehe fuhon winon obog toho fano naruk lamuhup.

²¹Wam pak mene wareg angge kalemman hiyahakubon naruk lamuhup fug. Wareg angge arimano ap pohon hit men werehon og isaruk lamuhup ano, ayeg waroho ap o winamon og isaruk lamuhup ano. NINIKNI Allahn hit An numalikisi welahep ulug mumal neneptisiyon welahe ulug saliyog naruk lamuhup fug. Wam domba kambing umalik unu ino isinga ag owe men mangno roho esetuk lamuhup fug,” ulug hiyag isibag.

²²Musan ele uruk lit, ”Mo eke fam eke fam suburu yahaltuk lamuhubon minggiroho winon hit umbat talug palu numon arimano Allah fahet imbik waharuk lamuhup.

²³Umbuhup angge arimano NINIKNI Allahn An nunuk wel naptuk lamuhup ulug mumal tahu ambeg walug waharuk lamuhup. Walug watug roti anggen, anggur anggen, e zaitun anggen walug wamuhubon arimano men wam sapi, kambing, domba umalik yuhambukon tam indag atukon men An nolohotman naruk lamuhup. Ari roho turuk lamuhup ane ariyen hit honoluk wereg lit NINIKNI Allah fahet henekol toho wereg lamuhup ane milal taruk lamuhup.

²⁴Kalem NINIKNI Allahn mumal tahu ambeg larukon yat anggolo regma NINIKNI Allahn anggolo roho og hisahu angge minggiroho numon arimano anggin tehen ha roho walug la fug teg lamuhup halug

²⁵Allah fahet umbukon arimano ap winon ayeg waroho og isaruk lamuhupmu uang hilaruk lamuhubon walug Allahn mumal tahu ambeg laruk lamuhup.

²⁶Uang walug laruk lamuhubon arimano fam hit hinindimuwen fano nul peruk lamuhubon ayeg waroho hilaruk lit wam sapi, kambing, domba men, anggur ahaluwe men ik olokon winon men nungge-nungge fano peruk lahebon men hilaruk lamuhupteg hit hunuhesi hunumalikisi men henehiyehen NINIKNI Allah olohotman naruk lamuhup.

²⁷Naruk lit Lewi inap hit heneseheli ke welamuhubon men ambiyeg naruk lamuhup. Lewi inap arimano kinang NINIKNI Allahn hit og hisahuwon fibir isahup fug angge re hiren Lewi inap arimano alpal isa fug angge it men henehiyehen naruk lamuhup.

²⁸Mo ilig am wirig am turukmen mo hinahanehon fam mun angge man angge hininggikmu atukon winon umbat talug palu numon arimano Allah fahet umbul ulug o pumbuk hit welamuhup ambeg emberuk lamuhup.

²⁹Emberuk lamuhupmu Lewi inap kinang ngi reg elehon men ap pohon, hiyap yuwohon, malik suwarehon hit hinim welamuhubon menen nenesehet tohon hulul peruk lamuhup ane hikit toho hilak waharuk lamuhup. Ari roho turuk lamuhup halug hiren mun ane man ane hininggiken turukmu NINIKNI Allahn let heneptuk laruhu,” ulug hiyag isibag.