Read Angguruk Yali ULANGAN 16 Bible Online

ULANGAN 16 - Angguruk Yali bible

ULANGAN 16

¹ Musan ele uruk lit, ”Pikalem seheleron fam hubanggo NINIKNI Allahn nit o Mesiren hondog neneplug wilip atisi ane wenggel haruk lamuhup. Mo ilig am wirig am turukmu pikalem ino fam NINIKNI Allah fahet wam Paskah esetuk lamuhup.

²Wam Paskah esebul ulug NINIKNI Allahn An nunuk wel naptuk lamuhup ulug mumal tahu ambeg lahupteg At olohotman wam sapi ano kambing domba ano waroho esetuk lamuhup.

³Osoho felug roti suwap turuk angge pingga amben turuk hahon eleg angge wiraho felug wam men sebe roho naruk lamuhup. Roti ino eneg narukmen hup sabirenam atuk laruhu. Roti suwap turuk angge embeselug wiratukon ari hahon nit o Mesir asengseng toho welatukuk ambehen folo-folo wilip amuk oho lit narukuk. Narukukteg wilip atukuk ane ari hit honoluk wereg lit henepeleg aruhu rohon roti anggen unuk ”asengseng toho wereg li narukon” suwalehon ino naruk lamuhup.

⁴Roti saplangge wiratukon hup sabirenam naruk li roti suwap turuk angge pingga amben turuk hahon hit henengginang atogman atogma olma foroho lamuhup fug. O Paskah sambil wam naruk lamuhubon arimano sono nahukon ulug tor angge oho umbat ta fug angge hubanggo eneg obog toho naruk lamuhup.

⁵Wam Paskah arimano o pumbuk NINIKNI Allahn og hisahu ambeg arimanowen esebuk fug angge

⁶NINIKNI Allahn mumal tahu ambehen eneg wam arimano esetuk lamuhup. Esetuk lamuhubon ari mo ubuk ik ohoma nit o Mesiren wilip atukuk li hagma esetuk lamuhup.

⁷Allahn mumal tahu ambehen wam arimano osoho felug nahupteg noholug likiyanet hit hinibam laruk lamuhup.

⁸Roti suwap turuk angge embeselug wiratukon narukmen eneg falfalikenam aruhumu o sabir angge o yabuk wibuk fug angge NINIKNI Allah wel tul ulug palu atuk lamuhup.

⁹Roti anggen tamon paltuk liyen tulug Allahn usayap tibag sambil sabiren aruhumu

¹⁰anggen tahantukon fahet NINIKNI Allah wel turuk lamuhup. Allah wel tul ulug NINIKNI Allahn anggen og hisaruk laruhu ane wirim toho minggiroho winon hinindiyen Allah fahet emberuk lamuhup.

¹¹Allah fahet umbul ulug NINIKNI Allahn mumal tahu ambeg palu atug hit hunumalikisi henemingmingangge men Lewi inap, pog inap, malik suwarehon, hiyap yuwohon hit men welamuhubon arimano men hinindi henehiyehen At wel turuk lamuhup.

¹²Hit hininggareg o Mesir inap enemingmingangge welatikip ane wenggel haruk lit anden hiyag hisaruk lahiyon hikit toho turuk lamuhup.

¹³Roti anggen men anggur anggen men obog toho tahantuk li misihim sambil eke palu atuk lit nit lekma laruk li o sabo wiroho nohil laruk latukuk ane fahet wenggel haruk lit Allah wel turukmen eneg o sabirenam aruhu.

¹⁴O sabirenam hit hunumalikisi henemingmingangge men Lewi inap, pog inap, malik suwarehon, hiyap yuwohon hit men welamuhubon arimano men hinindi henehiyehen At wel turuk lamuhup.

¹⁵NINIKNI Allahn hiren mun ane mun ane turukmu let heneptikim mun angge man angge hininggikmu atuk laruhumu we tik-tem toho henehiyeg haruk lit Allah wel turukmen eneg o sabirenam aruhu.

¹⁶Ari roho turuk lit mo misig fam hinahanam Israel hinap ap angge obog toho NINIKNI Allah wel tul ulug Aren mumal tahu ambeg palu arik waharuk lamuhup. Roti anggen suwap turuk angge eleg angge wiratukon naruk li oho, roti anggen tahantuk li oho, nit lekma laruk li o sabo wiroho nohil laruk latukuk ane fahet wenggel haruk sambil oho palu atuk lit Allah wel turuk lamuhup. Ari roho tul ulug Allah ambeg waharuk lit hininggikmu eleg angge henebe eneg waharuk lamuhup fug.

¹⁷Hit wal tanehen NINIKNI Allahn og hisaruk laruhu ane wirim toho minggiroho winon hinindiyen Allah fahet imbik waharuk lamuhup,” ulug hiyag isibag.

¹⁸Musan ele uruk lit, ”O pumbuk NINIKNI Allahn hit hununggul unuk welahebon wal taneg og hisahuwon arimano obog toho fahet ap alem haltukon men onowesi roho werehon men in eneptuk lamuhup. In eneptuk lamuhubon arimanowen Israel hinap henesehelimu alem weregma haloho emberuk lamuhup.

¹⁹Alem haltuk lit ap wal tanehen tohon apmayap turuk lamuhup fug. Ap tu an namloho, tu amuwon puk fug angge alem unubam wereg ane hikit toho kong turuk lamuhup. Nit ninibil amag ulug fano-fano angge og hisa waharukmu hiren hilahup fug. Fano-fano angge og hisarukon arimanowen hinil hupni fusuhup tohon, ap pikir ane eneg turukon apmayap enebuhup tohon.

²⁰Alem eke hag eke hag fano roho hale feruk lamuhuben yami ruruk lamuhup. Ari roho turuk lamuhup halug hit kinang NINIKNI Allahn og hisahuwon fam fano honoluk welamuhup,” ulug hiyag isibag.

²¹Musan ele uruk lit, ”NINIKNI Allah fahet hubu lahaptuk ambeg wiri fuhubon iraham he Asyera ninisinga poholmon wereg perukon fahet e uwag eke hutuk tubuhup fug.

²²Usa ahalep oho NINIKNI Allahn irim peruken yaho fuhup fug.