Read Angguruk Yali ULANGAN 17 Bible Online

ULANGAN 17 - Angguruk Yali bible

ULANGAN 17

¹Wam sapi, kambing, domba men nungge-nungge siyahon ubam werehon fahet NINIKNI Allahn amben siyag peruken At fahet waroho hubu lahabuhup fug,” ulug hiyag isibag.

²Musan ele uruk lit, ”O pumbuk NINIKNI Allahn og hisahuwon eke fam ap ekeyen ano hiyap ekeyen ano NINIKNI Allahn nininggik ahandip toho welamuhuk ulug sali irisi ane sobir isalug Allahn siyag perukon turuk lit

³ap winonen tu Allah hag toho wereg ulug wel eneptuk angge mo ano pikalem ano suhal ano anden wel enebuk fug irikikon arimano unubam sembahyang uruk lit wel eneptuk laruhu.

⁴Wel eneptuk laruhuwon fahet ap ekeyen hit hiyag hisahu halug oho aben ari roho urukmu hol hahup halug oho hiren alem ari fuki roho kim haruk lamuhup. Kim harukmu we tem toho hit Israel hinap henesehelimuwen ap inindimu siyahap eneptuk ane ari teko larisi ulug fag aruhu halug

⁵ap ano hiyap ano siyag ane turukon ino hondoholug o pumbukmuwen wilip amuhupteg helep fam ware fusuhup.

⁶Alem siyahon ino teko larukmu ap misig enehen anden yet harikik urukon fam ap ano hiyap ano siyag ane turukon ino ware fusuhup fug, we piren hinahan itanowen urukon fam eneg ware fusuhup.

⁷Ware feseruk lit ap niren yet harukuk urukon itanowen tam helep fam ware fusuhupmu ap o pumbuk obog tohowen pinggi ware fusuhup. Ari roho turuk lit alem siyahon hit henesehelimuwen eleha fusuhup,” ulug hiyag isibag.

⁸Musan ele uruk lit, ”Hit o pumbuk welamuhup ambeg arimanowen ap ekeyen ap eke ware feserukmu war aruhu ano, yowilangge ubam aruhu ano, aben angge yoholiyangge hilahu halug hiren alem arimano haltuk lamuhup. Alem arimano angginen hiren haloho umbuk fug teg lamuhup halug Allah amingmingangge imam Lewi inaben ano honowe suwon alem haltuk ane seneg laruhuwon inowen ano kong toho umbuhuben NINIKNI Allahn mumal tahu ambeg hiyag isa laruk lamuhup. Hiyag isaruk lamuhupmu iren alem arimano kong toho emberuk lit hiren ap siyag ane turukon unubam tuhup ane hiyag hisaruk lamuhup.

¹⁰Hiyag hisarukmu hiren NINIKNI Allahn mumal tahu ambehen kong toho emberuk ane elehap tuk fug teg ulug alem haltuk inap arimanowen hiyag hisaruk lamuhup ane hikit toho turuk lamuhup.

¹¹Iren alem kong toho emberuk lit hiyag hisaruk lamuhup ane fuki roho hol halug il misig oho pilabuk fug angge iren uruk lamuhubon hikit toho ap siyag ane turukon unubam turuk lamuhup.

¹²Ap ekeyen nambong se roho timin ulug imam NINIKNI Allah iyabuk witukon inowen ano honowe suwon alem haltukon inowen ano hiyag hisahu ane holuhu fug halug ap ino ware fusuhup. Ari roho turuk lit alem siyahon hit Israel hinap henesehelimuwen eleha fusuhup.

¹³Ap ino ware fusuhup ane fahet Israel hinap obog tohowen hol hahupteg henekol haruk lit ap inowen nambong se roho timin ulug turuk ane hikit toho hiren oho turuk lamuhup fug,” ulug hiyag isibag.

¹⁴Musan ele uruk lit, ”Hit kinang NINIKNI Allahn og hisahu ambeg kuhupteg yug toho welamuhup halug henele uruk lit, ’O pumbuk nit walinggoho werehon hag toho welamuhuken ap suwon nit fet nenesug laruhuwon raja eke lahabuhuk,’ uhup lit teg.

¹⁵Ari uhup halug ap o winamon lahabuhup fug. Honori hit sehelimuwon NINIKNI Allahn mumal tahuwon eneg ap suwon lahabuhup.

¹⁶Ap suwon lahabuhubon inowen tog aptuk ane fahet wam kuda anggolo foroho laruhu fug. Nin sebe roho wam kuda hilahuk ulug hit Israel hinap at umalikisi welamuhubon hondog heneplug o Mesir lahureg o Mesir inaben enembohom kuda og numusa ulug hit henebe og isahu rohon. NINIKNI Allahn, ’Hit waharikip ke suhuloho o Mesir lahup fug,’ irisi ane ap suwon inowen apmayap tuhu fug.

¹⁷At indi nin atuk lit kalem pikiron embeselug lahu rohon uhesi anggolo og enebuk fug. Umbagpag turuk angge emas men perak men anggolo foroho laruhu fug.

¹⁸Ap suwon lahakureg suwesingga Allahn ari-ari turuk lamuhup ulug komo neneptisi ane haharehon Allah amingmingangge Lewi inaben forohowon ino wirim toho suwesingga fam haharoho umbuhuben otsi hiyag isahu.

¹⁹Suwesingga haharoho umbuhubon ino ap suwonen foroho lit likiya hupmu winag harukmen eneg welaruhu. Winag harukmen eneg NINIKNI Allah fahet akol toho wereg ane milal tahureg Allahn alem tuk teg ane eke hag eke hag hiyag nisarisi ane hikit toho turuk laruhu.

²⁰Ari roho turuk ane ariyen indi hemet toho turuk lit hit at ori apmayap heneptuk laruhu fug. Allahn komo neneptuk ane sobir isa fug angge kalem pikiron eneg laruk lit at men aren enderuhuwonen endebuhubon menen amusun toho hit Israel hinap fet henesugmen eneg welamuhup,” ulug hiyag isibag.