Read Angguruk Yali ULANGAN 18 Bible Online

ULANGAN 18 - Angguruk Yali bible

ULANGAN 18

¹Musan ele uruk lit, ”Ununggul unuk Lewi inap obog toho Allah amingmingangge roho imam wereg lit Allah iyabuk wituk lamuhup. Wituk lit Israel hinap winonen kinang ngi reg lamuhup hag toho Lewi inap arimanowen kinang ngi reg lamuhup fug angge famen Israel hinaben Allah fahet emberuk lamuhup angge men yaltul ulug walug waharuk lamuhup angge men minggiroho winon naruk lamuhup.

²NINIKNI Allahn it unubam sali irisi ane hikit toho At ubam eneg welamuhup.

³Ari regma ap ekeyen Allah fahet wam sapi ano kambing domba ano waroho emberuk lit wam inggik misig men iyahunde men ahum men Lewi inap arimano og isaruk laruhu.

⁴Nin sebe roho roti anggen, anggur anggen, e zaitun anggen men tamon tahantuk lamuhubon arimano men henembohom domba oruk tam paltuk lamuhubon men og isaruk lamuhup.

⁵NINIKNI Allahn Israel hinap hununggul unuk winon obog toho hunumbahalug we Lewi inap arimano unubam hiyag isaruk lit hit men hiren endebuhubonen endebuhubon men An namingmingangge roho wereg lit niyabuk witukmen eneg welamuhup ulug mumal enepfag.

⁶Lewi ahun eke o pumbuk misig fam ap pohon hag toho welaruhu angge famen indimuwen peruk lit nibam embeselug Allah iyabuk wituk laruhuk ulug NINIKNI Allahn mumal tahu ambeg waruhu halug

⁷ori Lewi inap winon Allah ambeg welamuhubon enesehelimu NINIKNI Allah iyabuk wituk laruhu.

⁸Wituk lit ikniyen lin isahu angge fam uang ayeg waroho hilahuwon men ori Lewi inap winon Israel hinaben og isaruk lamuhup angge minggiroho winon men naruk laruhu,” ulug hiyag isibag.

⁹Musan ele uruk lit, ”Hit kinang NINIKNI Allahn og hisahuwon fam kuhupteg wereg lit ap kinang ino fam werehonen Allahn irim peruk ane turuk hag toho hiren oho turuk lamuhup fug.

¹⁰Hit henesehelimuwon misihen oho amloho ano ahaloho ano numbasi fahet embemin ulug indokma yale feruk lit fulu ane turuk lit pamongge watuk laruhu fug.

¹¹Ap ele human urukon men mungguwat wol eneptukon men ap warehon enehime kapal isarukon men hit henesehelimu welamuhup fug.

¹²Ap ari hag toho turukon arimano fahet NINIKNI Allahn irim anggolo haruk lit werehen ap kinang kuhup ambeg werehon arimano hit honolohotman yanggal eneptuk laruhu.

¹³Ari fahet hit hinindi piren teg eleg angge NINIKNI Allah fam wenggel haruk lamuhup.

¹⁴Ap kinang kuhup ambeg werehon arimanowen teko lahu ane fahet enehangge wereg ano ulug yami ruruk lit fulu roho yet haruk inaben hiyag isaruk ane iren holtuk angge famen Allah NINIKNI inowen ari roho turuk lamuhup fug uruk.

¹⁵Allahn hit sehelimuwon henere eke an Allah wene hiyag hisaruk lahi nahun hahon nabi eke unduhuk fuhu. At ele eneg holtuk lamuhup.

¹⁶Hit tom Sinai alma palu roho wereg lit, ’Nit war amuhuk tohon Allah NINIKNI ele holtuk lamuhuk fug, indok ambulpul ino oho ninilen yet haruk lamuhuk fug,’ ulug heng tirikip.

¹⁷Heng tirikipmu NINIKNI Allahn an hiyag nutuk lit, ’An nubam heng nabeheson fano ehesa.

¹⁸It sehelimuwon enere eke hat An nawene hiyag isaruk lahenon hahon nabi eke unduhuk fuhuk. Anden alem tu men ari men hiyag isahun ulug hiyag utuk laruhuk ane at inowen it hiyag isaruk laruhu.

¹⁹At inowen An nunuk fam hiyag isarukmu holtuk elehon arimano alem angginon unubam emberuk laruhuk.

²⁰Wene hiyag isaruk ahun nabi ekeyen ele hemet toho, ’Anden Allah unuk fam uruk lahi,’ ulug Anden hiyag utuk lahi fuhon un ane hiyag isaruk ahun ino war aruhu. Ap eke nabi wereg anggeyen nunumba ulug wel eneptukon ununuk fam urukon oho war amag!’ ulug Allahn hiyag nitisi.

²¹Hit hinindimuwen wenggel haruk lit, ’NINIKNI Allahn nabi aru hiyag utukmu hiyag nisaruk ano?’ peruk lamuhup lit teg.

²²Nabi ekeyen NINIKNI Allah unuk fam teko lahu ane fahet hiyag hisaruk angge famen teko lahu fug halug NINIKNI inowen hiyag um fugmu inggarehen milal taruk lit hiyag nisarisi ulug honoluk aruhumu at fahet henekol toho welamuhup fug,” ulug hiyag isibag.