Read Angguruk Yali ULANGAN 19 Bible Online

ULANGAN 19 - Angguruk Yali bible

ULANGAN 19

¹Musan ele uruk lit, ”NINIKNI Allah hiren oho wel turuk lahebon inowen ap o pumbuk obog toho elehap eneptuk lit it enengginang og hisahumu hiren ilmig tahupteg inibam pumbukmu welamuhup.

²Welamuhup ambeg sehelimu ap ware feserukon ili og nabusa ulug laruk ambeg o pumbuk hinahan mumal tahup.

³Mumal tahup ane fahet kinang NINIKNI Allahn og hisahuwon ino minggiroho hinahan aruhu ulug hili umbuhupteg o pumbuk hinahan itano mumal tahup. Mumal tahupteg ap unusulug larukon ili og eneptuk ambeg folo-folo laruk lamuhuben o itano laruk ke fano roho yaho fuhup.

⁴Ap ekeyen are fahet nirim puk fug anggeyen inggik fam tor angge kik harukmen war aruhu halug ap ino nuwabuhup tohon ulug o pumbuk itano eke larukmu ili waruk lamuhup.

⁵Wirimangge eke hiyag hisaminon tu: Ap eke are menen e wibul ulug farema lahupteg yaha fam e mutukmen yaha anggen heneko laruk lit are ino watukmu war aruhu halug ap ino nuwabuhup tohon ulug o pumbuk itano eke larukmu ili waruk lamuhup.

⁶Ap inowen are indimuwen wate fug perukmen ware feserisi ane fahet are ekeyen ap ino ayeg waroho watmin ulug indi oloken muko laruk lit kalemman senetepteg alem elegman pinggi ware feselep angge famen kalem horog tehen at tam folo-folo ili waruk ambeg kuhu.

⁷Ari fahet anden o pumbuk hinahan mumal tahup ulug hiyag hisihi.

⁸Atam Allahn kinang we tor angge og hisahumu o pumbuk hinahan itano eneg mumal tahup angge famen anden o yoho hit komo heneptuk lahi ane obog toho hiren seneg lit Allah NINIKNI ino hinindi reg lit likiya hupmu Aren peruk ane hikit toho laruk lamuhup halug Allah NINIKNI inowen hunumbasi fam sali imbibahon hikit toho fobik hinibam welamuhup ambeg hili yat toho emberuk lit kinang sali imbibahon obog toho og hisahu. Og hisahu halug ap unusulug larukon ili og eneptuk ambeg ulug nin sebe roho o pumbuk hinahan mumal tahup.

¹⁰O pumbuk ili og eneptuk ambeg falfaliken welamuhup halug ap alem ubam elehon folo-folo ili og eneptuk ambeg eke larukmu at amep kinang Allah NINIKNI inowen og hisahuwon fam wamburuk laruhu fug. Alem elegman wamburuk lit hit hunubam alem aruhu rohon!

¹¹Ap ekeyen eke nirimen watmin ulug sap teg lit pinggi ware fusuhureg ayeg waroho nuwabuhup tohon ulug ili og eneptuk ambeg eke lahu halug

¹²at ibam onowesi welamuhubon arimanowen ap ino hondohik lalihip ulug ap mon enebuhupmu hondoholug wamuhupteg ayeg waroho ware fusukag ulug ap warehon are inggikmu umbuhup.

¹³Ari roho turuk lit ninindiyen ulug at ibil am fug angge ware fusuhup ane ariyen ap alem ubam elehon amep Israel kinangma wamburukon ino eleg aruhumu hit obog toho fano welamuhup,” ulug hiyag isibag.

¹⁴Musan ele uruk lit, ”Allah NINIKNI inowen kinang og hisahumu hit wal tanehen henengginang ngi roho welamuhup halug honori hiniraham werehon enengginang hilahup tohon ulug henengginang hili tam umbuhubon ino fobik hikip toho imbik laruk lamuhup fug,” ulug hiyag isibag.

¹⁵Musan ele uruk lit, ”Ap ekeyen siyag ane turukmu ap misig enehen anden yet harikik urukon fam kong tuk fug teg. Ap piren hinahan itanowen urukon fam eneg kong tuk teg.

¹⁶Ap ekeyen are siyaha fesemin ulug, ’Hun aruwen siyag ane tirisi,’ ulug un ane ubam lombohap turuk halug

¹⁷Allah amingmingangge imam men alem haltuk inap welamuhubon menen kim haruk lamuhup ulug ap itano enebe pirenet NINIKNI Allah ibam waharuk lamuhup.

¹⁸Alem haltuk inap arimanowen fuki roho kim harukmen ap inowen are fam un ane lombohap tirisi ulug onoluk aruhumu

¹⁹ap inowen are fahet alem tu ubam embelihip urukon ino are fam alem elehen hebeloho inggareg fam emberuk lamuhup. Ari roho turuk lit alem siyahon henesehelimuwen elehap turuk lamuhup.

²⁰Ari turuk lamuhubon fahet ap obog tohowen hol hahupteg enekolen alem siyahon ari hahon nin fobik turuk lamuhup fug.

²¹Siyag ane turuk ahun fahet nindiyen ulug ibil am fug. Hebeloho watuk lit ebe fahet ebe wirim tuk teg, il fahet il wirim tuk teg, ayeg fahet ayeg wirim tuk teg, inggik fahet inggik wirim tuk teg, uyug fahet uyug wirim tuk teg,” ulug hiyag isibag.