Read Angguruk Yali ULANGAN 2 Bible Online

ULANGAN 2 - Angguruk Yali bible

ULANGAN 2

¹Musan nin ele uruk lit, ”Tot welatukukteg NINIKNI Allahn an hiyag nitisi ane hikit toho nit ik unuk Longgop yenggelehon fil lahuk ulug hebeloho lekma laruk lit hup anggoloenam tom Seir walinggoho laruk latukuk.

²Larukmen NINIKNI Allahn an nubam ele uruk lit,

³’Amusun toho tom aru walinggoho larikip angge re ketiya ik eleruk fil lalihip!

⁴Lalihip ane fahet Israel inap aruma hiyag isamihinon tu: Hit honori Edom inap hun Esau inowen ondohowonen ondohowon arimano enengginang keyen laruk lit it men tog aptuk lamuhup tohon hunubam anggat toho welamuhup. Edom inap arimano hit fahet enekol haruk lamuhup angge famen Anden tom Seir hun Esauen ondohowonen ondohowon arimano ngi roho welamuhup ulug og isarik iyag angge re it enengginang tor angge oho hit og hisahuk fug.

⁶Og hisahuk fugmu hit kalemma laruk lit ik men suburu men uang fam ayeg waroho hilalug naruk lit laruk lamuhup imihin,’ ulug hiyag nitisi.

⁷Hiyag nitisi ane ari hikit toho nit kalemma larukmu NINIKNI Allahn niren mun ane man ane ninine roho turuk lamag ulug let neneptuk latisi. NINIKNI Allah nit men wereg lit nenesehet tohon fahet wenggel harukmu nungge-nungge ninilmu eleg latisi fug. Eleg latisi fugmu nit lekma yat toho larukmen eneg mo ilig am wirig am turukmu teng misig nubam hilag nuwalen 40 atisi.

⁸Nit nonori hun Esauen ondohowonen ondohowon enengginang embeselug laruk lit kebunggalem o pumbuk Elat men Ezion-Geber men filen tonggo keyen ik Il Warehon fil laruk ke ino oho embeselug o Moab lek fil larukuk.

⁹Larukmen NINIKNI Allahn an nubam ele uruk lit, ’Moab inap men tog abuhup fug. Anden hun Lot inowen ondohowonen ondohowon arimano o Ar kinang ngi roho welamuhuben og isarik iyag angge re kinang ari tor angge oho hit og hisahuk fug,’ irisi.

¹⁰Amukasi kinang ari fam Emim inap unuwag Enak inap unuwag yaron hahon enebe anggolo roho welatfag.

¹¹Emim inap oho Enak inap oho Refaim inap welatfag angge famen Moab inaben it ununuk Emim inap welatfag uruk.

¹²Tom Seir fam amukasi Hori inap welatfag. Hori inap arimano Esauen ondohowonen ondohowon arimanowen yanggal eneptuk lit elehap enepfareg Israel inaben NINIKNI Allahn og isibag ambeg ilmig tibag hag toho it arimanowen oho Hori inap enengginang ngi arik kibag.

¹³Welatukukteg Allahn hiyag nisarisi ane hikit toho ik Zered paloho nindig atukuk.

¹⁴O Kades-Barnea inowen wilip atukuk sambilen tulug mo ilig am wirig am turukmen teng misig nubam hilag nanggoloben 38 atisimu ik Zered fimag nindig atukuk. Nindig atukuk sali uwanma NINIKNI Allahn nit nunubam sali emberisi ane hikit toho an nori o Kades-Barnea inowen an men ambiyeg wilip atukukon tog abukon obog toho war atuk latusa.

¹⁵NINIKNI Allah inggik ineyonen it obog toho siyahap eneptuk latisimu

¹⁶misig oho oluk welatisi fug.

¹⁷Ari regma NINIKNI Allahn an nubam ele uruk lit,

¹⁸’Ketiya Moab inap enengginang unuk Ar keyen tulug

¹⁹Amon inap enengginang hili-hilimu lahup. Amon inap arimano men tog abuhup fug. Anden Amon inap hun Lot inowen ondohowonen ondohowon arimano kinang og isarik iyag angge re it ininggikmuwen taluk toho kinang tor angge oho hit og hisahuk fug,’ irisi.

²⁰Amukasi Amon inap enengginang fam Refaim inap welatfag angge re aben kinang ino fahet Refaim inaben tohon wereg uruk angge famen Amon inaben it ununuk Zamzumim welatfag uruk.

²¹Zamzumim inap arimano unuwag Enak inap unuwag yaron hag toho wereg lit enebe anggolo roho welatfag angge famen NINIKNI Allahn Zamzumim inap arimano Amon inap ininggikmu imbibagma Amon inaben ap arimano elehap enepfareg enengginang it ngi arik kibag.

²²Ari hag toho NINIKNI Allahn Hori inap arimano Edom inap ininggikmu imbibagma Edom inaben ap arimano yanggal enepfareg enengginang ilmig ta kibareg ketiya oho yug toho wereg.

²³Kaftor inap arimano oho o Kaftor inowen wilip atfareg Awi inap inibam pumbuk Edom kinang famen tulug o pumbuk Gaza fam welatfahon arimano yanggal enepfareg enengginang ilmig tibareg o yoho oho wereg.

²⁴Welatukukmu Allahn ele uruk lit, ’Ketiya lalihipteg ik Arnon paloho nindig atihip! Anden Amori inap onowe suwon o Hesbon werehon unuk Sihon ino hininggikmu umbuhukmu at men tog abik lahupteg at angginang ilmig tahup.

²⁵O yoho tu famen ak timinteg Anden ap o pumbuk kinang atogman atogma werehon obog toho enekolap eneptuk laruhukmu hit honolohotman yuk lagmag uruk lamuhup. Iren hit waharuk lamuhubon fahet uruk ane hol haruk lit enekolen unuwag elek-elek turuk lamuhup,’ irisi,” ulug hiyag isibag.

²⁶Musan nin ele uruk lit, ”Nit o Kedemot lekma wereg lit anden ap suwon Sihon o Hesbon weregma lalihip ulug notsi mon eneptikikmu ambeg larusareg at ubam enele uruk lit, ’Ninindi fano roho hambeg wahereg hat hi haptuk lahe.

²⁷Hangginang keyen lahuken hiyag nisamihin ulug heng habik wahe. Laruk lit kalem winon la fug angge we kebunggalem suwon eneg laruk lamuhuk.

²⁸Kalemma laruk lit ik men suburu men naruk lamuhuken uang fam ayeg waroho og nisaruk laruhun. We pikit toho laruk lit hangginang atogman wilip amuhuk.

²⁹Edom inap men Moab inap menen hinindi fano roho lalihip ulug hiyag nisarusa hag toho haren oho lalihip ulug hiyag nisamihinmu nit hangginang keyen lahukteg ik Yordan paloho nindig atlug NINIKNI Allahn og hisahuk irisi angginang fam kuhuk,’ ulug hiyag utusa.

³⁰Ari ulug hiyag utusa angge famen NINIKNI Allahn Sihon indi arikap teberisimu lalihip irisi fug. NINIKNI Allahn ari roho turuk lit Sihon ino Israel inap ininggikmu umbuhuk perisi ane ari fobik hikir atisi.

³¹Sihon inowen lalihip irisi fugmu NINIKNI Allahn an nubam ele uruk lit, ’Anden Sihon ebe men angginang men hininggikmu emberuk ane ak tihimu hiren oho at angginang senetuk ane ak tilihip,’ irisi.

³²Irisimu Sihon umalikisi sehen senehon obog toho menen nunusul ulug nit o Yahas iraham weregma waharusa.

³³Waharusama NINIKNI Allahn Sihon ino nininggikmu emberisimu niren aret umalikisiyet otsi obog toho unusurukuk.

³⁴O itano li o pumbuk obog toho pin kuruk lit abet hiyabet maliket obog toho unusurukukmu misig oho oluk welatisi fug.

³⁵We it enembohom men inibamen foroho angge men eneg huhulangge hilarukuk.

³⁶NINIKNI Allahn o pumbuk elehet ineyon walinggoho ohowon arimano oho nininggikmu emberisimu niren o Aroer ik Arnon horogma punumu werehon men pumbuk ik Arnon ayegma werehon men famen tulug kinang Gilead fam o pumbuk obog toho senerik larukuk.

³⁷Senerik larukuk angge famen NINIKNI Allahn hiyag nisarisi ane hikit toho niren Amon inap enengginang senebuhuk fug ulug kinang ik Yabok ilan ke werehon men o pumbuk tom fam werehon men ngi arik larukuk fug,” ulug hiyag isibag.