Read Angguruk Yali ULANGAN 20 Bible Online

ULANGAN 20 - Angguruk Yali bible

ULANGAN 20

¹Musan ele uruk lit, ”Hiren tog abul ulug wilip amuhupteg yet harukmen hit henebe we tor angge weregma ap seliyon enebe anggolo reg lit winon kereta wam kudan lisoho walug laruk angge fam lahalug waharukmu yet isahupteg hinindi henekol hahup fug! NINIKNI Allah hit o Mesiren hondog heneplug wilip atisiyon ino hit men welaruhu ane honoluk toho welamuhup.

²Hit tog aptuk ambeg horogma lahupmu Allah amingmingangge imam ekeyen hit luhaloho welamuhubon hunubam hiyag hisahuwon tu:

³’Hit Israel hinap nori, anden iminon holeg lamek! Hit tog abul ulug luk oho lit ap seliyon fahet hinindi henekolen hirimuruk turuk lit yuk lagmag uk fug.

⁴NINIKNI Allah hit men ambiyeg laruk lit hit fahet tog apmisimu hit palimu atihip,’ uhu.

⁵Ari uhumu hit honowesi roho werehon arimanowen hit hunubam enele uruk lit, ’Ap san o eke ket eneg wit tarisi angge famen uwan kuk fugmu tog elman war atmisimu are eke o ino ngi aruhu rohon ulug at ino tog uwanma ibam suhuloho lamisi.

⁶Ap san hele anggur yabuk ket eneg wit tarisi angge famen anggen tahantisi fug halug ar oho ibam lamisi. At ino tog elman war atmisimu are ekeyen anggur anggen tamon tahanuhu rohon!

⁷Ap san hiyap men ahun uhe roho welam fug angge elenggen ket kirisi halug ar oho ibam lamisi. At ino tog elman war atmisimu are ekeyen hiyap ino hilahu rohon!’ ulug hiyag hisahup.

⁸Ari ulug hiyag hisahupteg nin enele uruk lit, ’Ap san indi akolen hirimuruk turuk halug ar oho ibam lamisi. At indi akol harukmu oriyen oho inindi enekol hahup tohon!’ uhup.

⁹Ari uhupteg hit sehen seneg hinap milal heneptukon in enebuhup.

¹⁰Hiren o pumbuk eke senerik lul ulug horogma lahup halug tam-tam ap arimano unubam tog umbusulen nenele ul ulug hiyag isahup.

¹¹Hiyap isahupmu iren tog abul fug uhupteg sok elehet inibam walinggoho ohowon kurukon hut henebuhupmu kuhup halug ap arimano obog toho hit henemingmingangge amuhupteg ininggik lisoho hiniyabuk wit hisaruk lamuhup.

¹²Ap o pumbuk werehon arimanowen nenele ul fug, tog abul uhup halug hiren o pumbuk ino waling enesug lamuhup.

¹³Waling enesugmu NINIKNI Allahn ap seliyon arimano hit hininggikmu umbuhu halug hiren ap obog toho karog fam unusuhup.

¹⁴We hiyap unumalikisi men enembohom men enenggengge obog toho men yoholiyangge hilahupteg mun angge man angge o pumbukmu foroho angge NINIKNI Allahn og hisahumu hit ngi amuhup.

¹⁵Ari hag toho o pumbuk yatma werehon obog toho unubam turuk lamuhup angge famen

¹⁶o pumbuk kinang NINIKNI Allahn og hisahuwon fam werehon mun angge man angge sat werehon misig oho oluk welaruhu fug.

¹⁷Abet hiyabet obog toho unusuruk lit NINIKNI Allahn hiyag hisarisi ane hikit toho Het inap, Amori inap, Kanaan inap, Feris inap, Hewi inap, Yebus inap men mondabi elehap eneptuk lamuhup.

¹⁸Ap arimanowen tu Allah hag toho wereg ulug unumbasi wel eneptuk lit ap inindimu siyahap eneptuk ane turukon ariyen hit hinindi ninap henebuhup tohon. Iren turuk ane hikit toho hiren oho turuk lit NINIKNI Allah indi siyahap tuhup tohon ap arimano mondabi elehap enebuhup!

¹⁹Hiren o pumbuk eke pin kuhuk ulug amusun toho waling enesug lit welamuhup halug e anggen narukon walinggoho werehon mutuk lamuhup fug. E arimano ap hag toho werehen niren e ap seliyonen tohon oho siyahap tuhuk peruk lahep ano? E arimano anggen yihikon hiren na reg lamuhup.

²⁰E anggen naruk elehon eneg hiren muhuk felug elehet o pumbuk walinggoho ohowon ino fene pila ruruk lit o ino pin kuhup,” ulug hiyag isibag.