Read Angguruk Yali ULANGAN 21 Bible Online

ULANGAN 21 - Angguruk Yali bible

ULANGAN 21

¹Musan ele uruk lit, ”NINIKNI Allahn og hisahu ambeg ap wareg angge kinangma yinggigmu aben hiyahakupteg san ware fesehek ulug enepeleg toho welamuhup halug

²o pumbuk walinggoho werehon onowesi men alem haltuk inap menen wirimangge fam ap warehon yinggig ambeg laruk ke wirim turuk lit o pumbuk horogma werehon ke ulug onoluk aruhu.

³Onoluk aruhumu o pumbuk horogma werehon onowesi arimanowen wam sapi heyon kabiniyon uwan kinang hebeltuk angge lisoho walug laruk elehon misig walug laruk lit

⁴yabuk wituk eleg ambeg ik firig atuk elehon eke ayegma lahup. Lahupteg wam ino anggolop kong tubusuhup.

⁵Kong tubusuhupmu Allah amingmingangge imam Lewi inap arimano ap suwon-suwon iniraham in arik wamuhup. Lewi inap NINIKNI Allahn hiyag isaruk lit, ’An niyabuk wituk lit An nunuk fam ap hi eneptuk lamuhup,’ ulug mumal eneptisiyon arimanowen alem eke hag eke hag turukon men ap unusuruk ane men haloho emberuk angge re onowesi arimano iniraham unduhuk lamuhup.

⁶Unduhukmu o pumbuk horogma werehon onowesi obog tohowen wam sapi wareg angge emberimu ininggik ik umaho fuhup.

⁷Umaho fuhupteg enele uruk lit, ’Nit nonotsi menen ap ari ware fesehe fug. San ware fesehek ulug ninilen oho yet hehe fug.

⁸NINIKNI Allah, Haren nit Hat humalikisi Israel ninap o Mesir weregma windat neneptikin. Ketiya ap alem ubam elegman ware feseheson amep ariyen nit Hat humalikisi welaheyon siyag amuhuk tohon ulug alem siyahon nenesehelimu teko lahayon ino hondo ribin,” uhup. Ari uhupmu ap arimano ap warehon amep inowen siyag alep ane ari Allahn apmayap tuhu.

⁹Ari roho hiren NINIKNI Allahn fano peruk ane turuk lit ap amep alem elegman hilil isarukon ariyen siyag alep ane elehap turuk lamuhup,” ulug hiyag isibag.

¹⁰Musan ele uruk lit, ”Hiren tog aptuk lit NINIKNI Allahn let heneptukmu ap seliyon apmayap eneplug ininggik hele wat eneptuk lit yet harukmen

¹¹ap seliyon enesehelimu hiyap tuhum anggolowon eke weregma yet hahupteg hit honori misihen nindi naruken nuhe hilamin puhu halug

¹²ap inowen hiyap ino hondoholug ibam lahu. Lahumu hiyap inowen unggul oruk men inggik ahap men paloho

¹³sum keron wan tebelug o ino fam wereg lit ikni isinga fahet uba yatukmen eneg pikalem misig aruhu. Pikalem misig aruhumu ap inowen hiyap ino hilahureg ambiyeg nohoruk lamuhup.

¹⁴Fobik ap inowen hiyap ino fahet nirim puhu halug ap inowen hiyap ino nuhe wereg lit an men ambiyeg nohoruk latukuk ulug amingminganggeyap tahu fug. Onggo og nitmisi ulug ap eke oho og uruhu fug. Hiyap ino fam haren fano lamin peruk lahen ambeg lamihin ulug hiyag uruhu,” ulug hiyag isibag.

¹⁵Musan ele uruk lit, ”Ap ekeyen hiyap piren og enesug lit hiyap eke indi reg lit eke irim teg laruhu angge famen hiyap imbilapmuhe inowen tam amloho indag uruhumu ebehe inowen fobik amloho indag uruhu.

¹⁶Ari regma inikniyen an war atuk lit anden angge lin isahukon numalikisi piren itano fibir isaruk sambil ino namloho tam indag atukon su roho og etle angge famen nuhe nirim tehonen indag nitisi ulug nungge-nungge og um fug angge namloho fobikon nuhe nindi haruk lahiyonen indag nitisi ulug su roho og uruhuk puhu halug ari siyag.

¹⁷Inikniyen malik imbilapmuhe inowen indag utukon fahet namloho wandabon wereg ulug palu piren at og uruhu, palu misig amloho ebehe inowen fobik indag utukon og uruhu,” ulug hiyag isibag.

¹⁸Musan ele uruk lit, ”Malik ubabut siyahonen ikni isinga enele ying eneptukmu ikni isingan nenele holukag ulug waroho komo ruhup angge famen holtuk eleg halug

¹⁹ikni men isinga menen enemloho hondoholug ap suwon-suwon alem haltuk inap weregma lahup.

²⁰Lahupteg ap suwon arimano hiyag isaruk lit, ’Nenemloho aru ubabut siyag teg lit nenele ying neneptuk. Niren komo ruruk lahe ane holuk fug angge tung nahun welahi ulug aren foroho angge hik-hak isaruk lit ik olokon narukmen eneg wereg,’ uhup.

²¹Ari uhupmu ap o pumbuk ino werehon obog tohowen malik ino helep fam wabuhupmu war aruhu. Ari roho turuk lit hiren alem siyahon hit henesehelimuwen eleha fusuhup. Malik ino war aruhu ane fahet Israel inap obog tohowen hol hahupteg enekol haruk lamuhup,” ulug hiyag isibag.

²²Musan ele uruk lit, ”Ap ekeyen siyag ane anggolo turuken war amag ulug kong toho umbuhupteg ware feselug e fam ililoho song tebesuhup halug

²³ap wareg angge ino hup hunduko song tegman eneg welaruhu fug. Ap e fam song tebeserukon eke Allahn siyag amag perukon wereg angge re ap wareg angge ariyen kinang NINIKNI Allahn og hisahuwon siyag aruhu rohon ulug mo uwan ubuk uk fugmu e famen pilabe felug kinangma sale fusuhup,” ulug hiyag isibag.