Read Angguruk Yali ULANGAN 22 Bible Online

ULANGAN 22 - Angguruk Yali bible

ULANGAN 22

¹Musan ele uruk lit, ”Hare ambohom sapi ano domba ano eke longgo urukmu yet hahun halug fano longgo ehek puk fug angge wam ino hare ambeg suhuloho hondoko imbisik lahun.

²Wam ikni yatma werehen sa ulug hapeleg toho welaruhun halug wam ino hibam forohoman eneg wam ngi ahun yami rik waruhumu at ambohom ino hebeloho og uruhun.

³Ari hag toho hare ambohom keledai ano sum wan turukon ano nungge-nungge aren tohon longgo uhuwon hiyahakun halug hambingga roho umbusuk fug angge hare hebeloho og uruhun.

⁴Hare ambohom keledai ano sapi ano kalemma laruk lit ine elehen sahung til larukmu yet hahun halug haren imbisik puk fug angge wam ino nin in atug lawag ulug hare let tuhun,” ulug hiyag isibag.

⁵Musan ele uruk lit, ”Hiyap ekeyen aben wan turuk angge wan tahu fug. Aben sum hiyaben wan turukon wan tuhu fug. Ari hag toho turukon arimano fahet NINIKNI Allahn irim anggolo haruk.

⁶Haren kalemma laruk lit yet harukmen suweyen e fam ano kinangma ano ei wirig ambehen suwe isingan umalik ano ei ano walinggigmu yet hahun halug isinga wa fug angge

⁷fano wilip amag ulug umalik eneg hilahun. Ari roho turuk laruhun halug hat fano wereg lit amusun toho welaruhun.

⁸Haren o eke wit taruk lit ap o unggama lahalug emberimu unduhuk lit mako wambuhu rohon ulug ungga oholuk walinggoho e pila rebehun. E pila rebehun fug halug ap eke unggaman mako wamburuk lit war aruhu ane ariyen hat hibam werehon men alem angginon hunubam aruhu.

⁹Wen misig fam suburu ei men hom ei men sebe roho yatuk laruhun fug. Sebe roho yaho fuhun halug suburu yahaluhunon men hom enderuhunon men abirangge Allah fahet umbuhun.

¹⁰Wam sapi men keledai menen mangno roho kinang hebeltuk angge lisoho walug lahun fug.

¹¹Hekel moholop men yanggik men mangno roho sum misig uruk laruhun fug.

¹²Sum ebemon yihik feruk lit indit uhan fam wal toho aliliyangge hekel fam ililoho song tebehun,” ulug hiyag isibag.

¹³Musan ele uruk lit, ”Ap ekeyen hiyap eke hilahu angge famen fobik nirim puhureg

¹⁴at abug uruk lit, ’Hiyap ari hilarikikteg at men nohorukmen ap eke men nohorisi hiyap ulug noluk atisi,’ uhu halug

¹⁵hiyap ikni isinga menen nenehaloho ap eke men uwan nohuk fugmu ap ino og utukuk ane fahet enehangge tu ulug sum nohoruk angge enehalohowen tohon oko walug ap suwon-suwon alem haltuk inap weregma lahup.

¹⁶Lahupteg hiyap ikniyen alem haltuk inap hiyag isaruk lit, ’Anden nahaloho hun ari og itikik angge famen ketiya at inowen irimen umbusuhuk peruk.

¹⁷Umbusuhuk peruk lit nahaloho fahet ap eke men ambiyeg nohorisi he ulug abug uruk. Ele si ane uruk ulug honoluk atmisiyen enehangge tu yet homok!’ uruk lit hiyap ikni isinga menen sum iniyamalen enehaloho men atamtam hililip toho nohokup asum ino onowesi arimano onolohotman kinangma tuwale fuhup.

¹⁸Tuwale fuhupmu kim hahupteg onowesi arimanowen ap ele si ane urukon ino wol tulug sabiyap alem fam ware fusuhup.

¹⁹Ware fusuhupmu ap inowen Israel hiyap eke abug irisi ane fahet onggo ulug uang perak teng uhan iyamal og uruhu. Ari roho tuhureg hiyap ino nin embesemin puk fug angge og talugmen eneg welaruhu.

²⁰Ari roho ap ino ubam tuhup angge famen ap inowen uhe fahet ap eke men nohorisi he ulug tem toho uhu halug

²¹hiyap ino hondoholug ikni ibam sok iraham lahupteg o pumbuk ino inaben helep fam ware fusuhupmu war aruhu. Hiyap inowen ikni ibamen yaying turuk lit nit Israel ninap nenengginang siyahap tirisi ulug alem ari hit henesehelimuwen eleha fusuhup.

²²Ap ekeyen ap uhe men ambiyeg nohorukmu hahup halug ap ino men hiyap ino men mangno roho unusuhup. Ari roho turuk lit alem siyahon ari hit Israel hinap sehelimuwen eleha fusuhup.

²³Ap ekeyen hiyap tuhumon eke hilamin ulug elenggen kuhu angge famen at men uwan nohuk fugmu ap eke men hiyap ino men o pumbukmuwen salkal ulug ambiyeg nohokup halug

²⁴hiren it piren itano o pumbukmuwen hondog eneplug wilip amuhupteg helep fam unusuhupmu war amuhup. Ap inowen hiyap areyen tohon siyahap turuk ane fahet war amag. Hiyap ino o pumbukmuwen siyahap tirikim fano ele hi roho let nabik maniyek elep angge famen ap inowen ubam turuk ane fahet ahiyehen ele hi roho irisi fug ulug ar oho war amag. It piren unusuruk lit alem siyahon ari hit sehelimuwen eleha fusuhup.

²⁵Ap ekeyen hiyap tuhumon eke hilamin ulug elenggen kuhureg weregman ap winonen hiyap ino men anggenman salkal ulug inggik lisoho at men ambi amuhup halug ap ino eneg ware fusuhup angge famen

²⁶hiyap ino siyag ane tirisi fug ulug wabuhup fug. Hiyap ino ap inowen siyahap tirisi ane ari men ap ekeyen are inggiken seneg lit pinggi ware feserukon men ambi reg peruk lamuhup.

²⁷Ap inowen hiyap ino anggenman siyahap tirikim hiyap inowen ele hi roho elep halug oho ap at ele holtukon misig oho welalep fug.

²⁸Hiyap tuhumon eke ap enelenggen uwan kuk fugmu ap misihen ele ying turuk lit at men ambiyeg nohorukmu hahup halug

²⁹ap inowen uang perak teng piren hiyap ikni og uruhureg hiyap ino hilahu. Hilahureg hiyap ino siyahap tirisi angge re fobik oho umbusuhuk puk fug angge og talugmen eneg welaruhu.

³⁰Ap eke ikni uhe men ambiyeg nohoruk lit ikni apmayap tuhu fug,” ulug hiyag isibag.